ଡେରାଡୁନ୍ : କେଦାରନାଥକୁ ଆସିଥିବା ଜଣେ ଯାତ୍ରୀ ଏଭଳି କାଣ୍ଡ ଭିଆଇଛନ୍ତି, ଯାହାକୁ ନେଇ ଚାରିଆଡୁ ଚର୍ଚ୍ଚା ହେଉଛି । ଏଠାକୁ ଆସିଥିବା ଜଣେ ଭକ୍ତ ମହାଦେବ ଶିବଶମ୍ଭୁଙ୍କୁ ଦର୍ଶନ କଲାବେଳେ ତାଙ୍କ ପୋଷା କୁକୁରର ପାଦର ପଞ୍ଝା ଦ୍ବାରା ମନ୍ଦିର ପରିସରରେ ସ୍ଥାପିତ ନନ୍ଦୀଙ୍କ ପ୍ରତିମାକୁ ଛୁଆଁଇ ପୂଜାପାଠ କରାଇଥିଲେ । ଏହି ଭିଡିଓ ଭାଇରାଲ ହେବାପରେ ଏବେ ଚାରିଆଡୁ ନିନ୍ଦା ପ୍ରକାଶ ପାଉଛି । ଘଟଣାରେ ରୁଦ୍ରପ୍ରୟାଗ ପୋଲିସ ତଦନ୍ତ ପ୍ରକ୍ରିୟାକୁ ଜୋରଦାର କରିଛି। ଏହି ଘଟଣାରେ ତଦନ୍ତ ଚାଲିଛି ବୋଲି ଏସପି ଆୟୁଷ ଅଗ୍ରୱାଲ କହିଛନ୍ତି। ତଦନ୍ତ ଶେଷ ହେବା ପରେ ଉପଯୁକ୍ତ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
ମେ ୨ ତାରିଖରୁ ଉତ୍ତରାଖଣ୍ଡରେ ଚାରିଧାମ ଯାତ୍ରା ଆରମ୍ଭ ହୋଇଛି । ଭଗବାନଙ୍କ ଦର୍ଶନ ପାଇବାକୁ ଦେଶର ପ୍ରତ୍ୟେକ କୋଣରୁ ଲକ୍ଷ ଲକ୍ଷ ଭକ୍ତ ପହଞ୍ଚୁଛନ୍ତି। ଏହି ସମୟରେ ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହେବାରେ ଲାଗିଛି। ଭିଡିଓରେ ଜଣେ ଭକ୍ତ ନିଜ ପୋଷା କୁକୁର ସହିତ କେଦାରନାଥ ଧାମରେ ପହଞ୍ଚିଥିଲେ ।
ମନ୍ଦିର ବାହାରେ ଭକ୍ତ ପ୍ରଥମେ ନିଜ ପୋଷା କୁକୁରର ପାଦରେ ପ୍ରଭୁ ନନ୍ଦୀଙ୍କୁ ଛୁଆଇଁବା ପରେ ନିଜେ ଜୋତା ପିନ୍ଧି ପ୍ରଭୁ ନନ୍ଦୀଙ୍କୁ ଛୁଇଁଛନ୍ତି। ଭିଡିଓ ଭାଇରାଲ ହେବା ପରେ ବଦ୍ରିନାଥ-କେଦାରନାଥ ମନ୍ଦିର କମିଟି କାର୍ଯ୍ୟାନୁଷ୍ଠାନ ପାଇଁ ନିର୍ଦ୍ଦେଶ ଦେଇଛି ।
ଏଥି ସହିତ, ପୁରା ମାମଲାରେ ରୁଦ୍ରପ୍ରୟାଗର ପୋଲିସ ଅଧୀକ୍ଷକ ଆୟୁଷ ଅଗ୍ରୱାଲ କହିଛନ୍ତି ଯେ ଜଣେ ବ୍ୟକ୍ତି ମନ୍ଦିର ପରିସରରେ ନିଜ ପୋଷା କୁକୁର ସହ ପ୍ରଭୁ ନନ୍ଦୀଙ୍କ ପ୍ରତିମାକୁ ଛୁଇଁବା ଘଟଣାର ତଦନ୍ତ ଚାଲିଛି । ତଦନ୍ତ ଶେଷ ହେବା ପରେ ଅଭିଯୁକ୍ତଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ସେହିପରି, ବିକେଟିସି ସଭାପତି ଅଜେନ୍ଦ୍ର ଅଜୟ କହିଛନ୍ତି ଯେ କେଦାରନାଥରେ ଯାହା ଘଟିଛି ତାହା ଠିକ୍ ନୁହେଁ। ଦେଶ ତଥା ବିଦେଶର ଭକ୍ତମାନେ ବିଶ୍ୱାସ ଏବଂ ସମ୍ମାନ ସହିତ ଧାମରେ ପହଞ୍ଚୁଛନ୍ତି ।
ଏପରି ପରିସ୍ଥିତିରେ ଜଣେ ଯାତ୍ରୀଙ୍କ କୁକୁରର ପାଦରେ ନନ୍ଦୀଙ୍କ ପ୍ରତିମାକୁ ଛୁଇଁବା ଧାର୍ମିକ ଭାବନା ପ୍ରତି ଅପମାନ ଅଟେ । କାର୍ଯ୍ୟନିର୍ବାହୀ ଅଧିକାରୀ ଆରସି ତିୱାରୀ ଭକ୍ତମାନଙ୍କୁ ଗୃହପାଳିତ ପଶୁମାନଙ୍କ ସହିତ ମନ୍ଦିରକୁ ନ ଆସିବାକୁ ନିବେଦନ କରିଛନ୍ତି । ଭିଡିଓଟି ସୋସିଆଲ ମିଡିଆରେ ଭାଇରାଲ ହେବା ମାତ୍ରେ ଲୋକମାନେ ଏଥିରେ ତୀବ୍ର ଆପତ୍ତି ଉଠାଇଥିଲେ ଏବଂ ଏହି ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
