ବେଙ୍ଗାଲୁରୁ: ୨୨୪ ଆସନ ବିଶିଷ୍ଟ କର୍ଣ୍ଣାଟକ ବିଧାନସଭା ପାଇଁ ଆଜି ସକାଳୁ ଭୋଟ ଗ୍ରହଣ ଆରମ୍ଭ ହୋଇଛି । ସକାଳ ୭ଟାରୁ ଭୋଟ ଗ୍ରହଣ ଆରମ୍ଭ ହୋଇ ସନ୍ଧ୍ୟା ୬ଟା ପର୍ଯ୍ୟନ୍ତ ଚାଲିବ । ୨୬୧୫ ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ ୫,୧୦,୫୫,୧୭୨ ଭୋଟର। ତେବେ ମତଦାନ ଜାରି ରହିଥିବା ବେଳେ ଏହି ପରିପ୍ରେକ୍ଷୀରେ ଅନେକ କନ୍ନଡ କଳାକାର ନିଜ ପରିବାର ସହ ଭୋଟ ଦେଇଛନ୍ତି।
ଅଭିନେତା ପ୍ରକାଶ ରାଜ ବେଙ୍ଗାଲୁରୁର ଶାନ୍ତି ନାଗରର ଏକ ମତଦାନ ବୁଥରେ ନିଜର ଭୋଟ୍ ଦେଇ କହିଛନ୍ତି, "ସାମ୍ପ୍ରଦାୟିକ ରାଜନୀତି ବିରୋଧରେ ଆମେ ଭୋଟ୍ ଦେବା ଉଚିତ୍ । କର୍ଣ୍ଣାଟକ ସୁନ୍ଦର ହେବା ଜରୁରୀ ଅଟେ।" ଅଭିନେତା ତଥା ଗାୟକ ଚନ୍ଦନ ଶେଟ୍ଟୀ ନାଗାର୍ବାଭିରେ ଭୋଟ୍ ଦେଇଛନ୍ତି।
ଭେଟେରାନ ଅଭିନେତା ତଥା ରାଜ୍ୟସଭା ସଦସ୍ୟ ଜଗେଶ ତାଙ୍କ ପରିବାର ସହ ଭୋଟ ଦେଇଛନ୍ତି। ସେହିପରି ଅଭିନେତ୍ରୀ ଅମୂଲ୍ୟା ଏବଂ ସ୍ୱାମୀ ଜଗଦୀଶ ଆର ଚନ୍ଦ୍ର ମଧ୍ୟ ଭୋଟ୍ ଦେଇଛନ୍ତି। ଏବଂ ଅମୂଲ୍ୟା ଭୋଟ ଦେଇ କହିଛନ୍ତି, ମତଦାନ ଆମର ଅଧିକାର। କୌଣସି ପ୍ରକାରେ ଆପଣଙ୍କର ଭୋଟ୍ ହାତଛଡା କରନ୍ତୁ ନାହିଁ। ମୁଁ ଏପର୍ଯ୍ୟନ୍ତ 5 ଥର ଭୋଟ୍ ଦେଇଛି। ଚାର୍ଲି 777 ର ଅଭିନେତ୍ରୀ ସଂଗୀତ ଶ୍ରୀଙ୍ଗେରୀ ମଧ୍ୟ ଭୋଟ୍ ଦେଇଥିଲେ। ସେ ସୋସିଆଲ ମିଡିଆରେ ଭୋଟର ଫଟୋ ଏବଂ ଭିଡିଓ ସେୟାର କରି ଲେଖିଛନ୍ତି, "ମୁଁ ମଧ୍ୟ ଭୋଟ୍ ଦେଇଛି। ଆପଣ ମଧ୍ୟ ଯାଇ ଭୋଟ୍ ଦିଅନ୍ତୁ।"
ସେପଟେ ଅଭିନେତା ରମେଶ ଅରବିନ୍ଦ ତାଙ୍କ ପତ୍ନୀ ଅର୍ଚ୍ଚନାଙ୍କ ସହ ଭୋଟ୍ ଦେଇଥିଲେ। ବରିଷ୍ଠ ଅଭିନେତ୍ରୀ ତଥା ପୂର୍ବତନ ବିଧାୟକ ଉମାଶ୍ରୀ, ଅଭିନେତା ଗଣେଶ ଏବଂ ତାଙ୍କ ସ୍ତ୍ରୀ, ଅଭିନେତା ଉପେନ୍ଦ୍ର ଭୋଟ୍ ଦେଇଛନ୍ତି। ଭୋଟ୍ ଦେବା ପୂର୍ବରୁ ଉପେନ୍ଦ୍ର କହିଥିଲେ ଯେ କର୍ଣ୍ଣାଟକର ଭବିଷ୍ୟତ, ଦେଶର ଭବିଷ୍ୟତ, ଆମର ଭବିଷ୍ୟତ, ଆମ ପିଲାମାନଙ୍କର ଭବିଷ୍ୟତ ବିଷୟରେ କହିବା ପରିବର୍ତ୍ତେ ସମସ୍ତଙ୍କ ଭବିଷ୍ୟତ ଗୁରୁତ୍ୱପୂର୍ଣ୍ଣ। ଗଣତନ୍ତ୍ରର ସବୁଠାରୁ ଗୁରୁତ୍ୱପୂର୍ଣ୍ଣ ଦିନ। ସମସ୍ତେ ଆସି ଭୋଟ୍ ଦିଅନ୍ତୁ।
ଅନ୍ୟପଟେ ଦିବଙ୍ଗତ ଅଭିନେତା ପୁନିତ ରାଜକୁମାରଙ୍କ ପରିବାର ମଧ୍ୟ ଭୋଟ ଦେଇଛନ୍ତି। ରାଘବେନ୍ଦ୍ର ରାଜକୁମାର, ଅଶ୍ୱିନୀ ପୁନିତ ରାଜକୁମାର, ଯୁବ ରାଜକୁମାର ଭୋଟ୍ ଦେଇଛନ୍ତି। ଗଣମାଧ୍ୟମ ସହ କଥା ବାର୍ତ୍ତା ବେଳେ ପୁନିତଙ୍କ ଭାଇ ରାଘବେନ୍ଦ୍ର ରାଜକୁମାର ତାଙ୍କୁ ମନେ ପକାଇ ଭାବପ୍ରବଣ ହୋଇଥିଲେ। ଏବଂ କହିଥିଲେ ଯେ, "ଅପୁ ବିନା ଭୋଟ୍ ଯନ୍ତ୍ରଣାଦାୟକ ଅଟେ। ମୁଁ, ଶିବନା ଏବଂ ଅପୁ ଆସୁଥିଲୁ। କିନ୍ତୁ ପ୍ରଥମ ଥର ପାଇଁ ଆମେ ଅପୁ ବିନା ଭୋଟ୍ ଦେବାକୁ ଆସିଛୁ। ସେହିପରି ଯୁବ ରାଜକୁମାର କହିଛନ୍ତି, "ମୁଁ ଆଜି ଅପୁ ମାମୁଁଙ୍କୁ ହରାଇଛି। ତାଙ୍କୁ ପ୍ରତି ମୁହୂର୍ତ୍ତରେ ସ୍ମରଣ କରୁଛି। ଏଥିସହ ସମସ୍ତଙ୍କୁ ଭୋଟ ଦେବାକୁ ଅପିଲ କରିଛନ୍ତି।
ସେହିପରି ଅନେକ ଅଭିନେତା ଭୋଟ ପାଇଁ ନିଜ ଗାଁକୁ ଫେରିଛନ୍ତି। ଅଭିନେତା ବିକି ବାଙ୍ଗାଲୋରରୁ ନିଜ ଗାଁ ଚାମରାଜନଗର ତାଲୁକର ମଡଲୁପୁରା ଗାଁକୁ ଆସି ଭୋଟ ଦେଇଛନ୍ତି। ଭୋଟ୍ ଦେବା ପରେ ଗଣମାଧ୍ୟମକୁ ସୂଚନା ଦେଇ ସେ କହିଛନ୍ତି, "ମୁଁ ଆଜି ଗାଁରେ ପ୍ରଥମ ଭୋଟ୍ ଦେବାର ଉଦ୍ଦେଶ୍ୟରେ ବାଙ୍ଗାଲୋରରୁ ଆସିଛି। ମୁଁ ଜଣେ ଦକ୍ଷ ନେତାଙ୍କୁ ଭୋଟ୍ ଦେବି। ସେହିଭଳି ସମସ୍ତେ ନିଜର ମୂଲ୍ୟବାନ ଭୋଟ୍ ଦେବା ଉଚିତ୍। ମତଦାନରୁ କେହି ପ୍ରତ୍ୟାହାର କରିବା ଉଚିତ୍ ନୁହେଁ।
ସୂଚନା ଥାଉ କି, ନିର୍ବାଚନ ଆୟୋଗ ଅନୁଯାୟୀ, ସକାଳ 9 ଟା ପର୍ଯ୍ୟନ୍ତ ବ୍ରୁହାଟ ବେଙ୍ଗାଲୁରୁ ମହାନଗର ପାଲିକେ (ବିବିଏମ୍ପି) ସେଣ୍ଟ୍ରାଲରେ 7.89 ପ୍ରତିଶତ ଭୋଟରଙ୍କ ସଂଖ୍ୟା ରେକର୍ଡ ହୋଇଥିବାବେଳେ ବିବିଏମପି (ଉତ୍ତର) 7.55 ପ୍ରତିଶତ, ବିବିଏମ୍ପି (ଦକ୍ଷିଣ) 8.22 ପ୍ରତିଶତ, ବାଗାଲକୋଟ 8.52 ପ୍ରତିଶତ, ବାଙ୍ଗାଲୋର ଗ୍ରାମୀଣରେ 7.72 ପ୍ରତିଶତ, ବାଙ୍ଗାଲୋର ସହରୀ 9.11 ପ୍ରତିଶତ, ବେଲଗାମ୍ 7.47 ଏବଂ ବେଲାରୀ 8.84 ପ୍ରତିଶତ ମତଦାନ ହୋଇଛି।
