ନୂଆଦିଲ୍ଲୀ: ପୁଣି ଘୁଞ୍ଚିଲା ଜେଇ ଆଡଭାନ୍ସ ପରୀକ୍ଷା । JEE(ଆଡଭାନ୍ସଡ୍)-୨୦୨୨ ଅଗଷ୍ଟ ୨୮ ତାରିଖକୁ ଘୁଞ୍ଚିଛି । ଆସନ୍ତା ଅଗଷ୍ଟ ୨୮ ତାରିଖରେ ଦୁଇଟି ସିଟିଂରେ ହେବ ପରୀକ୍ଷା । ପୂର୍ବରୁ ଜୁଲାଇ ୩ରେ JEE (ଆଡଭାନ୍ସଡ୍) ହେବାକୁ ସ୍ଥିର ହୋଇଥିଲା ।
JEE ଆଡଭାନ୍ସ 2022 ପାଇଁ ଆବେଦନ ପ୍ରକ୍ରିୟା ଅଗଷ୍ଟ 7 ରୁ 11, 2022 ପର୍ଯ୍ୟନ୍ତ ଅନୁଷ୍ଠିତ ହେବ । ଆବେଦନ ଶୁଳ୍କ ଦେବାର ଶେଷ ତାରିଖ ହେଉଛି ଅଗଷ୍ଟ 12 । JEE ଆଡଭାନ୍ସ ପାଇଁ ପରୀକ୍ଷାର୍ଥୀ ମାନେ ଅଗଷ୍ଟ 23 ରୁ 28, 2022 ପର୍ଯ୍ୟନ୍ତ ସେମାନଙ୍କ ଆଡମିଟ୍ କାର୍ଡ ଡାଉନଲୋଡ୍ କରିପାରିବେ । ଅଫିସିଆଲ୍ ୱେବସାଇଟ୍ jeeadv.ac.inରେ ଉପଲବ୍ଧ ହେବ ।
ସକାଳ ଏବଂ ଅପରାହ୍ନ 2ଟି ସ୍ପିପ୍ଟରେ ପରୀକ୍ଷା ହେବ । ପ୍ରଥମ ପେପର ସକାଳ 9ରୁ ପୂର୍ବାହ୍ନ 12 ଓ ଦ୍ବିତୀୟ ପେପର ଅପରାହ୍ନ 2ଟା 30ରୁ 5ଟା 30 ଯାଏଁ ହେବ । ପରୀକ୍ଷା ଫଳ ସେପ୍ଟେମ୍ବର 11ରେ ପ୍ରକାଶ ପାଇବ । ରେଜଲ୍ଟର ପ୍ରୋଭିଜନାଲ ଉତ୍ତର ସିଟ ସେପ୍ଟେମ୍ବର 3ରୁ 4 ଭିତରେ ଉପଲବ୍ଧ ହେବ ।
ପ୍ରକାଶ ଥାଉ କି, ମେଡିକାଲ ପ୍ରବେଶିକା ପରୀକ୍ଷା ନ୍ୟାସନାଲ ଏଲିଜିବିଲିଟି-କମ-ଏଣ୍ଟ୍ରାନ୍ସ ଟେଷ୍ଟ ଆସନ୍ତା ଜୁଲାଇ ୧୭ରେ ଅନୁଷ୍ଠିତ ହେବ । ଏନେଇ ନ୍ୟାସନାଲ ଟେଷ୍ଟିଂ ଏଜେନ୍ସଂ ପକ୍ଷରୁ ଘୋଷଣା କରାଯାଇଛି । NEET (UG)-2022 ପାଇଁ ଆବେଦନ ପ୍ରକ୍ରିୟା ଆରମ୍ଭ ହୋଇଛି । ମେ ୬ ତାରିଖ ପର୍ଯ୍ୟନ୍ତ ଅନଲାଇନରେ ଆବେଦନ କରିପାରିବେ ଛାତ୍ରଛାତ୍ରୀ । ଓଡ଼ିଆ ସମେତ ୧୩ଟି ଭାଷାରେ ହେବ ଚଳିତ ବର୍ଷର NEET ପରୀକ୍ଷା । JEE (ମେନ୍) ସେସନ-୧ ଓ ୨ ସୂଚୀ ମଧ୍ୟ ବଦଳିଛି । ସେସନ-୧ ପରୀକ୍ଷା ଜୁନ୍ ୨୦ରୁ ୨୯ ତାରିଖ ଏବଂ ସେସନ-୨ ପରୀକ୍ଷା ଜୁଲାଇ ୨୧ରୁ ୩୦ ତାରିଖ ପର୍ଯ୍ୟନ୍ତ ହେବ ।
