ଚଣ୍ଡିଗଡ: ପଞ୍ଜାବର ପଟିଆଲାରେ ଶିଖ ସଂଗଠନ ଏବଂ ଶିବସେନା ସମର୍ଥକଙ୍କ ମଧ୍ୟରେ ଗୋଷ୍ଠୀ ସଂଘର୍ଷ ଘଟଣା । ସ୍ଥିତିକୁ ନିୟନ୍ତ୍ରଣକୁ ଆଣିବା ପାଇଁ ଆଜି ପଞ୍ଜାବରେ ଇଣ୍ଟରନେଟ ସେବା ବନ୍ଦ କରାଯାଇଛି । ଆଜି ସକାଳ ୯ଟା ୩୦ରୁ ସନ୍ଧ୍ୟା ୬ଟା ପର୍ଯ୍ୟନ୍ତ ବନ୍ଦ ରହିବ ଇଣ୍ଟରନେଟ ସେବା । କେବଳ ମୋବାଇଲରେ କଥା ହେବା ବ୍ୟତିତ ଇଣ୍ଟରନେଟ୍ ସେବା 2G 3G 4G CDMA, ସମସ୍ତ SMS ସେବା ବନ୍ଦ କରାଯାଇଛି । ହିଂସାକୁ ନେଇ ଗୁଜବ ବ୍ୟାପିବା ଆଶଙ୍କା ଥିବାରୁ ସୁରକ୍ଷା ଦୃଷ୍ଟିରୁ ପ୍ରଶାସନ ତରଫରୁ ଏହି ପଦକ୍ଷପ ଗ୍ରହଣ କରାଯାଇଛି ।
ଅନ୍ୟପଟେ ହିଂସା ରୋକିବାରେ ବିଫଳ ହେବାରୁ ମଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ୩ଜଣ ବରିଷ୍ଠ ପୋଲିସ ଅଧିକାରୀଙ୍କୁ ବଦଳି କରାଯାଇଛି । ପଟିଆଲାର ପୋଲିସ ଇନ୍ସପେକ୍ଟର ଜେନେରାଲ, ବରିଷ୍ଠ ପୋଲିସ ସୁପରିଟେଣ୍ଡେଣ୍ଟ ଏବଂ ପଟିଆଲା ଏସିପଙ୍କୁ ବଦଳି କରିଛନ୍ତି ମୁଖ୍ୟମନ୍ତ୍ରୀ ଭଗୱନ୍ତ ମାନ୍।
ସୂଚନାଅନୁଯାୟୀ ଗତକାଲି ପଞ୍ଜାବରେ ଶିବସେନାର ମୁଖ୍ୟ କାର୍ଯ୍ୟକର୍ତ୍ତା ହରିଶ ସିଙ୍ଗଲାଙ୍କ ନେତୃତ୍ବରେ ଖାଲିସ୍ତାନ ବିରୋଧୀ ଶୋଭଯାତ୍ରା ଆର୍ଯ୍ୟ ସମାଜ ଛକ ନିକଟରୁ ପଟିଆଲାକୁ ଆରମ୍ଭ ହୋଇଥିଲା । ଏହି ସମୟରେ କିଛି ଶିଖ୍ ସମ୍ପ୍ରଦାୟର ଲୋକେ ଏହାକୁ ବିରୋଧ କରିଥିଲେ । ଏହାକୁ ନେଇ ଦୁଇ ଗୋଷ୍ଠୀ ମଧ୍ୟରେ ପଥର ଫିଙ୍ଗାଫିଙ୍ଗି ଆରମ୍ଭ ହୋଇଥିଲା । ଶିଖ୍ ସମ୍ପ୍ରଦାୟର ଲୋକଙ୍କୁ ରୋକିବାକୁ ଚେଷ୍ଟା କରିବାକୁ ଯାଇ ଏସଏଚଓ କରନବୀର ମଧ୍ୟ ଆହତ ହୋଇଛନ୍ତି । ଏହାପରେ ଏସଏସପି ନାନକ ସିଂ ଘଟଣାସ୍ଥଳରେ ପହଞ୍ଚି ଆକାଶକୁ ଫାଙ୍କା ଗୁଳି ଚଳାଇବବା ପରେ ପରିସ୍ଥିତ ଶାନ୍ତ ହୋଇଥିଲା ।
ଏହି ଘଟଣାକୁ ନେଇ ପଞ୍ଜାବ ମୁଖ୍ୟମନ୍ତ୍ରୀ ଭଗୱନ୍ତ ମାନଙ୍କୁ ଅଧ୍ୟକ୍ଷତାରେ ଏକ ଉଚ୍ଚ ସ୍ତରୀୟ ବୈଠକ ଅନୁଷ୍ଠିତ ହୋଇଥିଲା । ବୈଠକ ପରେ ପଞ୍ଜାବ ପୋଲିସ ଶିବାସେନା ମୁଖ୍ୟ ହରିଶ ସିଙ୍ଗଲାଙ୍କୁ ଗିରଫ କରିଥିଲେ । ଏଥିସହ ଏଭଳି କାଣ୍ଡ ଭିଆଇଥିବା ଅପରାଧିକଙ୍କୁ କ୍ଷମା କରାଯିବ ନାହିଁ ବୋଲି ମାନ କହିଥିଲେ । ଏହି ଘଟଣା ପରେ ଗତକାଲି ପଞ୍ଜାବରେ କର୍ଫ୍ୟୁ ଜାରି କରାଯାଇଥିଲା ।
