ଚେନ୍ନାଇ: ପେରିୟାର ଇଭି ରାମାସ୍ବାମୀଙ୍କ ପ୍ରତିମୂର୍ତ୍ତିକୁ ଅସମ୍ମାନ । ତାମିଲନାଡୁର ଭେଲୋରର ପେରିୟାର ଇଭି ରାମାସ୍ବାମୀଙ୍କ ପ୍ରତିମୂର୍ତ୍ତିକୁ ଅପମାନିତ କରାଯାଇଛି। ଭେଲୋର ପେରିୟାର ଅଧ୍ୟୟନ କେନ୍ଦ୍ର ସମ୍ମୁଖରେ ଥିବା ପ୍ରତିମୂର୍ତ୍ତିରେ ଚପଲ ମାଳ ପିନ୍ଧାଯାଇଥିବା ସହ ତାଙ୍କ ମୁଣ୍ଡରେ ଗେରୁଆ ରଙ୍ଗ ବୋଳାଯାଇଥିବା ଦେଖିବାକୁ ମିଳିଛି । ଏହା ପରେ ଏହି ଅଞ୍ଚଳରେ ଏହାକୁ ବିରୋଧ କରାଯାଇଥିଲା । ଘଟଣାସ୍ଥଳରେ ପୋଲିସ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି।
ସ୍ଥାନୀୟ ଲୋକେ ଏ ସମ୍ପର୍କରେ ଦ୍ରାବିଡ଼ କାଜାଗାମ (ଡି.କେ) ସଦସ୍ୟଙ୍କୁ ଅବଗତ କରିଥିଲେ। ଖବର ପାଇ ସେମାନେ ଘଟଣାସ୍ଥଳରେ ପହଞ୍ଚିଥିଲେ। ଘଟଣା ସମ୍ପର୍କରେ ପୋଲିସ ଷ୍ଟେସନକୁ ଅବଗତ କରାଯାଇଥିଲା । ପୋଲିସ ଏବଂ ଡି.କେ କର୍ମୀମାନେ ଏହି ପ୍ରତିମୂର୍ତ୍ତିକୁ ଯାଞ୍ଚ କରି ଚପଲ ବାହାର କରିଛନ୍ତି । ପରେ ଡି.କେ କର୍ମୀମାନେ ମୂର୍ତ୍ତି ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ।
ତେବେ ପେରିୟାରଙ୍କୁ ଅପମାନିତ କରିଥିବା ଅଭିଯୁକ୍ତଙ୍କୁ ଧରାଯିବ ବୋଲି ପୋଲିସ ପ୍ରତିଶ୍ରୁତି ଦେବା ପରେ ବିକ୍ଷୋଭକାରୀମାନେ ଓହରିଥିଲେ । ଅପରାଧୀଙ୍କୁ ଚିହ୍ନଟ କରିବା ପାଇଁ ପୋଲିସ ଉକ୍ତ ଅଞ୍ଚଳର ସିସିଟିଭି କ୍ୟାମେରା ଯାଞ୍ଚ କରିଛି। ଏହା ସହ ଏହି ଅଞ୍ଚଳରେ ରାତିରେ କିଏ ଆସିଥିଲା ସେନେଇ ମଧ୍ୟ ତଦନ୍ତି କରୁଛି ପୋଲିସ । ଏହି ମାମଲାର ପୋଲିସ ତଦନ୍ତ ଜାରୀ ରଖିଛି ।
ବ୍ୟୁରୋ ରିପୋର୍ଟ,ଇଟିଭି ଭାରତ
