ନୂଆଦିଲ୍ଲୀ: ଭାରତୀୟ ନୌସେନାରେ ସାମିଲ ହେଲା୨ଟି MH୬୦R(MH 60R multi-role helicopters) ରୋମିଓ ହେଲିକପ୍ଟର । ଗୁରୁବାର ଭାରତୀୟ ନୌସେନା କୋଚି ଅନ୍ତର୍ଜାତୀୟ ବିମାନବନ୍ଦରରେ ଏହି ହେଲିକପ୍ଟରକୁ ଗ୍ରହଣ କରିଛି । ଆମେରିକାର ବାୟୁସେନାର ସ୍ପେଶାଲ ଏୟାର ଆସାଇନମେଣ୍ଟ ମିଶନ ଫ୍ଲାଇଟ୍ ଦ୍ୱାରା ଏହି ହେଲିକପ୍ଟର ଭାରତରେ ପହଞ୍ଚିଛି । ଏହା ପୂର୍ବରୁ ୨୦୨୧ରେ ଆମେରିକା ଭାରତକୁ ୩ଟି ରୋମିଓ ହେଲିକପ୍ଟର ପ୍ରଦାନ କରିଥିଲା । ବର୍ତ୍ତମାନ ଏହା ନୌସେନା କର୍ମଚାରୀଙ୍କୁ ତାଲିମ ଦେବା ପାଇଁ ବ୍ୟବହୃତ ହେଉଛି । ଅଗଷ୍ଟ 22ରେ ଅନ୍ୟ ଏକ ହେଲିକପ୍ଟର ଆସିବା ନେଇ ସୂଚନା ମିଳିଛି ।
୨୪ଟି ଏହି ପ୍ରକାରଭୁକ୍ତ ହେଲିକପ୍ଟର କ୍ରୟ କରିବା ପାଇଁ ଆମେରିକା ସହ ୨୦୨୦ରେ ଚୁକ୍ତି କରିଥିଲା ଭାରତ । ଦୁଇ ଦେଶ ମଧ୍ୟରେ ମୋଟ ୨.୪ ବିଲିୟନ ଆମେରିକୀୟ ଡଲାରରେ ଏହି ଚୁକ୍ତି ହୋଇଥିଲା । ତେବେ ବର୍ତ୍ତମାନ ସୁଦ୍ଧା ମୋଟ ୫ଟି ରୋମିଓ ହେଲିକପ୍ଟର ଆସିଥିବା ବେଳେ ୨୦୨୫ ସୁଦ୍ଧା ସମସ୍ତ ୨୪ଟି ହେଲିକପ୍ଟର ଭାରତରେ ପହଞ୍ଚିବ ବୋଲି କୁହାଯାଉଛି ।
