ଲକ୍ଷ୍ନୌ: ସମାଜବାଦୀ ପାର୍ଟି ନେତା ଆଜମ ଖାନ (SP Leader Azam Khan)ଙ୍କ ବିରୋଧରେ ରୁଜୁ ହେଲା ଆଉ ଏକ ମାମଲା । ଗତ ଗୁରୁବାର ବିଳମ୍ବିତ ରାତିରେ ଗଞ୍ଜ ଥାନାରେ ଏହି ମାମଲା ରୁଜୁ ହୋଇଛି । ମହିଳାଙ୍କ ବିରୋଧରେ ଆଜମ ରାମପୁରରେ ଆପତ୍ତିଜନକ ମନ୍ତବ୍ୟ ଦେଇଛନ୍ତି । ଯାହାକୁ ବିରୋଧ କରି ଥାନାର ଦ୍ବାରସ୍ଥ ହୋଇଛନ୍ତି କିଛି ମହିଳା । ସେମାନେ ଆଜମଙ୍କ ବିରୋଧରେ ଥାନାରେ ଅଭିଯୋଗ କରିବା ସହ ଆଇନ ଅନୁଯାୟୀ ଦୃଢ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି ।
ସପା ନେତା ଆଜମ ଖାନ ନିଜ ବିବାଦୀୟ ମନ୍ତବ୍ୟକୁ ନେଇ ପୂର୍ବରୁ ମଧ୍ୟ ଚର୍ଚ୍ଚାରେ ରହିଆସିଛନ୍ତି । ଏପରିକି ଆଜମଙ୍କ ଏହି ମନ୍ତବ୍ୟକୁ ନେଇ କୋର୍ଟ ତାଙ୍କୁ ୩ ବର୍ଷ କାରା ଦଣ୍ଡାଦେଶ ଶୁଣାଇଥିଲେ । ଏହାସହିତ ତାଙ୍କ ବିଧାୟକ ପଦ ମଧ୍ୟ ରଦ୍ଦ ହୋଇଥିଲା । ଏହାପରେ ମଧ୍ୟ ସେ ରାମପୁର ଉପନିର୍ବାଚନରେ ସପା ପ୍ରାର୍ଥୀ ଆସିମ ରାଜାଙ୍କ ନିର୍ବାଚନୀ ପ୍ରଚାରର ପୁଣି ମହିଳାଙ୍କ ବିରୋଧରେ ଆପତ୍ତିଜନକ ମନ୍ତବ୍ୟ ଦେଇଛନ୍ତି । ପୂର୍ବରୁ ଦଣ୍ଡ ପାଇଥିବା ସତ୍ତ୍ବେ ସେ ନିଜ ଭାଷାରେ ସଞ୍ଜମତା ରକ୍ଷା କରିନଥିବା ମହିଳାମାନେ ଅଭିଯୋଗ କରିଛନ୍ତି ।
ଏହା ବି ପଢନ୍ତୁ- BIG ACCIDENT: ଖୋଦେଇ ବେଳେ ଚାପି ହୋଇ ୭ ଜଣ ମୃତ, ଫସିଛନ୍ତି ଆଉ 15 ଗ୍ରାମବାସୀ
ଗତ ୨୯ ନଭେମ୍ବରରେ ଶୁତରଖାନାରେ ଅନୁଷ୍ଠିତ ଏକ ନିର୍ବାଚନ ରାଲିରେ ଆଜମ ଖାନ ଏହି ଭାଷଣ ଦେଇଥିଲେ । ଆଜମ ଖାନ କହିଥିଲେ ଯେ ସେ ଉତ୍ତରପ୍ରଦେଶ ସରକାରରେ ୪ଥର ମନ୍ତ୍ରୀ ରହିଛନ୍ତି । ଏହି ସମୟରେ ଏକ ବିବାଦୀୟ ମନ୍ତବ୍ୟ ଦେଇଥିଲେ । ଯାହାକୁ ମହିଳାମାନେ ବିରୋଧ କରି ରାମପୁରର ଥାନା ଗଞ୍ଜରେ ଗୁରୁବାର ଆଜମ ଖାନଙ୍କ ବିରୋଧରେ ଅଭିଯୋଗ କରିଛନ୍ତି । ଅଭିଯୋଗକାରିଣୀ ଶେହନାଜ କହିଛନ୍ତି, " ଆଜମ ଖାନଙ୍କ ବୟାନ ଅତ୍ୟନ୍ତ ଆପତ୍ତିଜନକ । ଏହି ମନ୍ତବ୍ୟରେ ସେ ସମସ୍ତ ମହିଳାଙ୍କୁ ଆକ୍ଷେପ କରିଛନ୍ତି ।
ତାଙ୍କୁ କଣ କେହି ପଚାରି ସନ୍ତାନ ଜନ୍ମ କରିବେ ? ତାଙ୍କ ଭାଷା ଆପତ୍ତିଜନକ, ଯାହାକି ମହିଳାଙ୍କୁ ଅପମାନ କରିଛି । ସେ ମହିଳା ମାନଙ୍କୁ ସମ୍ମାନ କରନ୍ତି ନାହିଁ ।" ଆଜମଙ୍କ ବୟାନ ଅନେକ ମହିଳାଙ୍କୁ କଷ୍ଟ ଦେଇଛି । ଏନେଇ ଅନେକ ମହିଳା ଆକ୍ରୋଶ ଭାବ ଆଣିଛନ୍ତି । ଘଟଣାର ଯାଞ୍ଚ କରାଯାଉଛି ବୋଲି ଗଞ୍ଜ ଥାନାଧିକାରୀ ସୂଚନା ଦେଇଛନ୍ତି ।
