ଗାନ୍ଧୀନଗର : 2012 ପରଠାରୁ ଗୁଜରାଟର କଂଗ୍ରେସ ନେତାମାନଙ୍କର କ୍ରମାଗତ ବିଜେପିରେ ଯୋଗ ଦେବା ପର୍ବ ଆରମ୍ଭ ହୋଇଛି (60 Congress leaders changed parties)। 2012 ମସିହା ପରଠାରୁ ଆଜି ପର୍ଯ୍ୟନ୍ତ ପ୍ରଦେଶ କଂଗ୍ରେସର ପ୍ରାୟ 60 ଜଣ ବଡ ନେତା ଦଳ ଛାଡି ବିଜେପିରେ ସାମିଲ ହୋଇଛନ୍ତି । ଏହି ଦଳ ଛାଡିଥିବା ନେତାଙ୍କ ମଧ୍ୟରେ ବିଧାୟକ, ସାଂସଦ ଏବଂ ସଂଗଠନର ଗୁରୁତ୍ବପୂର୍ଣ୍ଣ ଦାୟିତ୍ବରେ ଥିବା ନେତା ବା କାର୍ଯ୍ୟକର୍ତ୍ତା ରହିଛନ୍ତି ।
2012 ବିଧାନସଭା ନିର୍ବାଚନରେ ସର୍ବପ୍ରଥମେ କଂଗ୍ରେସ ନେତା ନରହରି ଆମିନ କଂଗ୍ରେସ ଛାଡି ଶାସକ ବିଜେପିରେ ଯୋଗ ଦେଇଥିଲେ । ପରେ ତାଙ୍କୁ ରାଜ୍ୟସଭା ସାଂସଦ ଭାବେ ବିଜେପି ଦିଲ୍ଲୀ ପଠାଇଥିଲା । ଏହାପରେ ଏହି କଂଗ୍ରେସ କ୍ୟାମ୍ପ ଛାଡି ବିଜେପିରେ ସାମିଲ ହେବା ଏକ ଧାରାରେ ପରିଣତ ହୋଇଥିବା ପରି ଦୃଷ୍ଟିଗୋଚର ହୁଏ । ଏବେ ସୁଦ୍ଧା ଗତ 10 ବର୍ଷ ମଧ୍ୟରେ କଂଗ୍ରେସର ପ୍ରାୟ 60 ବଡ ନେତା ଦଳ ଛାଡି ସାରିଛନ୍ତି ।
ବିଠଲ ରାଡିଆ 2012 ରେ କଂଗ୍ରେସରୁ ଇସ୍ତଫା ଦେଇ ବିଜେପିରେ ଯୋଗ ଦେଇଥିଲେ । 2017 ରେ, ବିଠଲ ରାଡିଆ ଏବଂ ତାଙ୍କ ପୁଅ ଜୟେଶ ରାଡିଆ ବିଜେପି ସରକାରରେ ମନ୍ତ୍ରୀ ହୋଇଥିଲେ । ସେହିବର୍ଷ ଲୀଳାଧର ବାଘେଲା ମଧ୍ୟ କଂଗ୍ରେସ ଛାଡି ବିଜେପିରେ ସାମିଲ ହେବା ସହ ବିଜେପି ଟିକେଟରେ ସାଂସଦ ହୋଇଥିଲେ । ସେହିପରି ଅନ୍ୟତମ ବରିଷ୍ଠ କଂଗ୍ରେସ ନେତା ପରବତ ପଟେଲ ମଧ୍ୟ ସେହିବର୍ଷ (2012) ବିଜେପିରେ ଯୋଗ ଦେଇଥିଲେ ଓ ବର୍ତ୍ତମାନ ସାଂସଦ ରହିଛନ୍ତି । ପୁନମ ମାଦମ କଂଗ୍ରେସ ସହିତ ସମ୍ପର୍କ ଛିନ୍ନ କରି ବିଜେପିରେ ସାମିଲ ହୋଇଥିଲେ । 2014 ଓ 2019 ରେ ବିଜେପି ଟିକେଟରେ ଦୁଇ ଥର ସାଂସଦ ରହିଥିଲେ । ଅନ୍ୟତମ ବରିଷ୍ଠ କଂଗ୍ରେସ ନେତା ଦେବନ ସିଂ ଚୌହାନ କଂଗ୍ରେସ କ୍ୟାମ୍ପ ଛାଡି ବିଜେପିରେ ଯୋଗ ଦେବା ପରେ ଏବେ ସେ ବିଜେପି ସରକାରରେ ରାଜ୍ୟ ମନ୍ତ୍ରୀ ଭାବେ ଦାୟିତ୍ବରେ ଅଛନ୍ତି ।
ସେହିପରି 2017 ରେ କଂଗ୍ରେସ ଛାଡି ବିଜେପିରେ ସାମିଲ ହୋଇଥିବା ରାମସିଂହ ପରମାର ଏବେ ଅମୁଲ କମ୍ପାନୀର ଅଧ୍ୟକ୍ଷ ଭାବେ ଦାୟିତ୍ବରେ ରହିଛନ୍ତି । କଂଗ୍ରେସ ଛାଡିଥିବା କୁମ୍ବରଜୀ ବାଭାଲିଆ ବିଜେପିରେ ଯୋଗ ଦେବା ପରେ ଉପନିର୍ବାଚନରେ ଜିତି କ୍ୟାବିନେଟ ମନ୍ତ୍ରୀ ହୋଇଥିଲେ । ରାଘବଜୀ ପଟେଲ ମଧ୍ୟ ବିଜେପିରେ ଯୋଗ ଦେଇ ଭୁପେନ୍ଦ୍ର ପଟେଲଙ୍କ ସରକାରରେ କ୍ୟାବିନେଟ ମନ୍ତ୍ରୀ ହୋଇଥିଲେ । ଜବାହର ଚାଭଡା ମଧ୍ୟ ବିଜେପିରେ ଯୋଗ ଦେଇ ଉପନିର୍ବାଚନରେ ଜିତି ବିଜୟ ରୁପାନି ସରକାରରେ ମନ୍ତ୍ରୀ ହୋଇଥିଲେ ।
ସେହିପରି ତେଜଶ୍ରୀ ବେନ ପଟେଲ, କାମସି ପଟେଲ ଏବଂ ବଲବନ୍ତ ସିଂ ରାଜପୁତ ପ୍ରମୁଖ କଂଗ୍ରେସ କ୍ୟାମ୍ପ ଛାଡି ବିଜେପିରେ ଯୋଗ ଦେଇଥିଲେ । କାମସି ପଟେଲଙ୍କ ପୁଅ କନୁ ପଟେଲ ସାନନ୍ଦ ଆସନରୁ ବିଧାୟକ ନିର୍ବାଚିତ ହୋଇଥିଲା ବେଳେ 2017 ବିଧାନସଭା ନିର୍ବାଚନରେ ତେଜଶ୍ରୀବେନ ବିରାମଗାମ ଆସନରୁ ପ୍ରତିଦ୍ୱନ୍ଦ୍ୱିତା କରି ହାରି ଯାଇଥିଲେ । ସେହିପରି ବଲବନ୍ତ ସିଂ ରାଜପୁତ GIDC ବୋର୍ଡ ନିଗମର ଅଧ୍ୟକ୍ଷ ଭାବେ ଦାୟିତ୍ବରେ ଥିବା ବେଳେ ନିକଟରେ ସେ ଇସ୍ତଫା ଦେଇଛନ୍ତି ।
ଅନ୍ୟମାନଙ୍କ ମଧ୍ୟରେ ମଙ୍ଗଲ ଗାଭିତ, ଅକ୍ଷୟ ପଟେଲ, ଜେ.ଭି କାକାଡିଆ, ପ୍ରଦ୍ୟୁମ୍ନ ସିଂ ଜାଡେଜା, ସୋମା ପଟେଲ, ପ୍ରବୀଣ ମାରୁ, ଜିତୁ ଚୌଧୁରୀ ଏବଂ ପରେ ବ୍ରିଜେଶ ମର୍ଜା କଂଗ୍ରେସରୁ ଇସ୍ତଫା ଦେଇ ବିଜେପିରେ ସାମିଲ ହୋଇଥିଲେ । ସେମାନଙ୍କ ମଧ୍ୟରୁ ପ୍ରବୀଣ ମାରୁ, ମଙ୍ଗଲ ଗାଭିତ ଏବଂ ସୋମା ପଟେଲ କୌଣସି ପାର୍ଟିରେ ଯୋଗ ଦେଇନଥିଲା ବେଳେ ଭୁପେନ୍ଦ୍ର ପଟେଲ ସରକାରରେ ବ୍ରିଜେଶ ମର୍ଜା, ଜିତୁ ଚୌଧୁରୀଙ୍କୁ ମନ୍ତ୍ରୀ ଭାବେ ସ୍ଥାନ ପାଇଥିଲେ । ଅକ୍ଷୟ ପଟେଲ, ଜେ.ଭି କାକାଡିଆ, ପ୍ରଦ୍ୟୁମ୍ନ ସିଂ ଜାଡେଜା ବିଜେପିରେ ଯୋଗ ଦେବା ପରେ ଉପନିର୍ବାଚନରେ ପୁନର୍ବାର ବିଧାୟକ ନିର୍ବାଚିତ ହୋଇଥିଲେ ।
37 ବର୍ଷ ଧରି କଂଗ୍ରେସ ସଂଗଠନରେ ଗୁରୁ ଦାୟିତ୍ବରେ ଥିବା ଜୟରାଜ ସିଂ ମଧ୍ୟ କଂଗ୍ରେସକୁ ବାଏ ବାଏ କରି ବିଜେପିରେ ଯୋଗ ଦେଇଥିଲେ । କଂଗ୍ରେସର ଭେଟେରାନ ତଥା ପୂର୍ବତନ ବିଧାୟକ ଅଶ୍ୱିନ କୋଟୱାଲ ମଧ୍ୟ ସାମାନ ଧାରା ଆପଣାଇଥିଲେ । କଂଗ୍ରେସ ଆଗଧାଡିର ଆଦିବାସୀ ନେତା ଅନିଲ ଜୋଶିଆରାଙ୍କ ପୁଅ କେବଲ ଜୋଶିଆରା ମଧ୍ୟ ବିଜେପିରେ ସାମିଲ ହୋଇଥିଲେ । ତେବେ ବର୍ତ୍ତମାନ ଯୁବନେତା ହାର୍ଦ୍ଦିକ ପଟେଲ ଏବଂ ଶ୍ୱେତା ବ୍ରହ୍ମବତଙ୍କ ସମେତ ଆଉ ଦୁଇଜଣ କଂଗ୍ରେସ ନେତା ମଧ୍ୟ ସି.ଆର ପାଟିଲଙ୍କ ନେତୃତ୍ବରେ ବିଜେପିରେ ଯୋଗ ଦେଇଥିଲେ । ହାର୍ଦ୍ଦିକ ପଟେଲ ଚଳିତ (2022) ବିଧାନସଭା ନିର୍ବାଚନ ପାଇଁ ବିରାମଗାମ ଆସନରୁ ଟିକେଟ ପାଇଛନ୍ତି ।
ସେହିପରି କେବଳ ପୁରୁଣା ଧାରା ନୁହେଁ ବରଂ ଗତ 48 ଘଣ୍ଟା ମଧ୍ୟରେ ବିଧାୟକ ମୋହନ ସିଂ ରଠୱା, ତାଲା ବିଧାୟକ ଭଗ ବରାଦ ଏବଂ ଭବସ କାଟାରାଙ୍କ ସମେତ ତିନିଜଣ କଂଗ୍ରେସ ବିଧାୟକ କଂଗ୍ରେସ ଛାଡି ବିଜେପିରେ ଯୋଗ ଦେଇଛନ୍ତି । ମୋହନ ସିଂ ରଠୱା କ୍ରମାଗତ 10 ଥର ବିଧାୟକ ଭାବେ ଜିତିଛନ୍ତି । ସୂଚନା ଅନୁସାରେ ତାଙ୍କ ପୁଅକୁ କଂଗ୍ରେସ ଟିକେଟ ଦେବାକୁ ମନା କରିବାରୁ ସେ ଦଳ ଛାଡି ବିଜେପିରେ ସାମିଲ ହୋଇଥିବା ଚର୍ଚ୍ଚା ହେଉଛି । ତଙ୍କ ପୁଅ ମୋହନ ସିଂ ରଠୱାଙ୍କୁ ଭାରତୀୟ ଜନତା ପାର୍ଟି ମଧ୍ୟ ଚଳିତ ନିର୍ବାଚନରେ ଟିକେଟ ଦେଇଛି । ତେବେ ପ୍ରାୟ 20 ବିଧାୟକ କଂଗ୍ରେସ ଛାଡି ବିଜେପିରେ ସାମିଲ ହୋଇସାରିଛନ୍ତି ।
କଂଗ୍ରେସ ଛାଡି ବିଜେପିରେ ମିଶିଥିବା ବିଧାୟକ :
- କୁମ୍ବରଜୀ ବାଭାଲିଆ
- ଜେ.ଭି କାକାଡିଆ
- ଜବାହର ଚାବଡା
- ମଙ୍ଗଲ ଗାଭିତ
- ବ୍ରିଜେଶ ମର୍ଜା
- ଜିତୁ ଚୌଧୁରୀ
- ସୋମାଭାଇ ପଟେଲ
- ପୁରିଷୋତ୍ତମ ଭାଇ ସାବରିଆ
- ଆଶା ପଟେଲ
- ଆଳ୍ପେଶ ଠାକୁର
- ପଦ୍ୟୁମ୍ନ ସିଂ ଜାଡେଜା
- ପ୍ରବୀଣ ମାରୁ
- ଅକ୍ଷୟ ପଟେଲ
- ଧବଲ ସିଂ ଜାଲା
- ଧର୍ମେନ୍ଦ୍ର ସିଂ ଜାଡେଜା
- ଅଶ୍ୱିନ କୋଟୱାଲ
- ହର୍ଷଦ ରିବାଡିଆ
- ମୋହନ ସିଂ ରଠାୱା
- ଭାଗା ବରାଦ
- ଭବେଶ କାଟାରା
ବ୍ୟୁରୋ ରିପୋର୍ଟ, ଇଟିଭି ଭାରତ
