ନୂଆଦିଲ୍ଲୀ: ମଡର୍ଣ୍ଣ ଭ୍ୟାକ୍ସିନ ଉପରେ ଯୋଗଗୁରୁ ବାବା ରାମଦେବଙ୍କ ବୟାନକୁ ନେଇ ଜୋର ଧରିଛି ବିବାଦ । ଏପଟେ ବାବାଙ୍କ ବିରୋଧରେ ଦିଲ୍ଲୀରେ ଦାଖଲ ହୋଇଛି ଅଭିଯୋଗ । ଏଫଆଇଆର ଦାଏର ପାଇଁ ଦାବି କରିଛି ଇଣ୍ଡିଆନ ମେଡିକାଲ ଆସୋସିଏସନ (IMA) ।
ରାଜଧାନୀ ଦିଲ୍ଲୀରେ ଆଇଏମଏ ବାବା ରାମଦେବଙ୍କ ବିରୋଧରେ ଅଭିଯୋଗ ଦାଖଲ କରିଛି । ଆଇଏମଏର ମହାସଚିବ ଡଃ. ଜୟଶ ଲେଲେ କହିଛନ୍ତି, ରାମଦେବ ତାଙ୍କ ସହଯୋଗୀଙ୍କ ସହ ମିଶି ଲାଭବାନ ହେବା ଓ ସାଧାରଣ ଜନତାଙ୍କୁ କ୍ଷତି ପହଞ୍ଚାଇବା ଉଦ୍ଦେଶ୍ୟରେ ନିଜ ଅସାଧୁ ବୁଦ୍ଧିକୁ ଆଗକୁ ବଢାଉଛନ୍ତି ।
ଅଭିଯୋଗରେ ଦର୍ଶାଯାଇଛି ଯେ, ଅଭିଯୁକ୍ତ ସଙ୍ଗୀନ ଅପରାଧ କରିଛି, ଯାହା ବିରୋଧରେ ଆଇନର ସମସ୍ତ ପ୍ରଯୁଜ୍ୟ ନିୟମାବଳୀ ଅନୁଯାୟୀ ମାମଲା ରୁଜୁ କରାଯାଇପାରିବ । ଏଥିରେ ମହାମାରୀ ରୋଗ ଅଧିନିୟମ 1897ର ଧାରା 3 ମଧ୍ୟ ସାମିଲ ରହିଛି ।
ଆଇଏମଏ ଆହୁରି ମଧ୍ୟ କହିଛି ଯେ ରାମଦେବ ସର୍ବସାଧାରଣରେ ଅପମାନଜନକ ତଥା କୁତ୍ସିତ ବିବୃତ୍ତି ଦେବା ଏବଂ ଭୁଲ ଚିକିତ୍ସାକୁ ପ୍ରୋତ୍ସାହନ ଦେଇ ଅନ୍ୟାୟ ଲାଭପ୍ରାପ୍ତ କରିବାର ଷଡଯନ୍ତ୍ର ନେଇ ପୋଲିସର ତଦନ୍ତ ଆବଶ୍ୟକ ।
