ଚେନ୍ନାଇ: ଆଇଆଇଟି ମାଡ୍ରାସ (Indian Institute of Technology Madras) ଛାତ୍ରଛାତ୍ରୀମାନଙ୍କ ରଫ୍ତାର ଫର୍ମୁଲା ରେସିଂ ଟିମ୍ (Raftar Formula Racing Team) ଏହାର ପ୍ରଥମ ଇଲେକ୍ଟ୍ରିକ୍ ରେସିଂ କାର୍ 'RFR 23' ଲଞ୍ଚ କରିଛି । ଏହି ଇଞ୍ଜିନ ଇଲେକ୍ଟ୍ରିକ୍ ଡ୍ରାଇଭ୍ ଦ୍ବାରା ଅଧିକ ଶକ୍ତି ଯୋଗାଉଥିବାରୁ ପୂର୍ବରୁ ବ୍ୟବହୃତ ଇନ୍ଧନଯୁକ୍ତ ଇଞ୍ଜିନ୍ ତୁଳନାରେ ଏହାର ଗତିରେ ଉଲ୍ଲେଖନୀୟ ଉନ୍ନତି ହେବ ବୋଲି ଆଶା କରାଯାଉଛି ।
ଏହା ସମ୍ପୂର୍ଣ୍ଣ ଭାବେ ଛାତ୍ରଛାତ୍ରୀଙ୍କର ଏକ ଟିମ୍ 'ରଫ୍ତାର' ଦ୍ବାରା ବିକଶିତ ହୋଇଛି । ଏହି କାର୍ର ଡିଜାଇନ୍, ଟେଷ୍ଟିଂ ଓ ମାନୁଫ୍ୟାକ୍ଚରିଂ ଆଦି ପ୍ରକ୍ରିୟାରେ ଏହାର ସମ୍ପୂର୍ଣ୍ଣ ନିର୍ମାଣ ପାଇଁ ପ୍ରାୟ ୧ ବର୍ଷ ଲାଗିଥିବା ଜଣାପଡ଼ିଛି । ପୂର୍ବରୁ ବ୍ୟବହୃତ ଇନ୍ଧନଯୁକ୍ତ ଇଞ୍ଜିନ୍ ତୁଳନାରେ ଏହି ଇଞ୍ଜିନ ଇଲେକ୍ଟ୍ରିକ୍ ଡ୍ରାଇଭ୍ ଦ୍ବାରା ଅଧିକ ଶକ୍ତି ଯୋଗାଉଥିବାରୁ ଏହାର ଗତିରେ ଉଲ୍ଲେଖନୀୟ ଉନ୍ନତି ହେବ ବୋଲି ଛାତ୍ରମାନେ ଆଶା କରିଛନ୍ତି ।
ଟିମ୍ ରଫ୍ତାରରେ ଆଇଆଇଟି ମାଡ୍ରାସର (IIT Madras) ବିଭିନ୍ନ ବିଭାଗର ୪୫ ଜଣ ଛାତ୍ରଛାତ୍ରୀ ରହିଛନ୍ତି । ତେବେ ଛାତ୍ରଛାତ୍ରୀଙ୍କ ଏହି ଫର୍ମୁଲା ଟିମ୍ ବିଶ୍ବର ସର୍ବୋତ୍ତମ ଫର୍ମୁଲା ଛାତ୍ର ଦଳ ହେବାକୁ ଲକ୍ଷ୍ୟ ରଖିଛି । ଏହା ଭାରତରେ ଫର୍ମୁଲା ଛାତ୍ର ସଂସ୍କୃତିକୁ ବୈଷୟିକ ପ୍ରଗତି ସହିତ ପ୍ରୋତ୍ସାହିତ କରିବାକୁ ଇଚ୍ଛା ରଖିଛି । ବିଶ୍ବର ସର୍ବୋଚ୍ଚ ଇଞ୍ଜିନିୟରିଂ ପ୍ରତିଷ୍ଠାନଗୁଡିକର ଫର୍ମୁଲା ଛାତ୍ରମାନଙ୍କ ସହ ତାଳ ଦେଇ ଟିମ୍ ରଫ୍ତାର ପ୍ରତିବର୍ଷ ଏକ ଉଚ୍ଚ କ୍ଷମତା ସମ୍ପନ୍ନ ରେସିଂ କାର୍ ଡିଜାଇନ୍ ଓ ନିର୍ମାଣ କରୁଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
