ଚେନ୍ନାଇ: ୬ ବର୍ଷ ତଳେ ଚୋରି ହୋଇଥିବା ଦୁଇଟି ମୂର୍ତ୍ତିକୁ ଉଦ୍ଧାର କଲା ତାମିଲନାଡୁ ପୋଲିସ । କୁମ୍ବାକୋନମ ମନ୍ଦିରରୁ ଚୋରି ହୋଇଥିବା ଏହି ଦୁଇ ମୂର୍ତ୍ତିକୁ ଆମେରିକାରୁ ଉଦ୍ଧାର କରିଛି ତାମିଲନାଡୁ ପୋଲିସର CID ୱିଙ୍ଗ । ମୂର୍ତ୍ତି ୱିଙ୍ଗ୍ DGP ଜୟନ୍ତ ମୁରାଲୀଙ୍କ ନିକଟରେ ଦାଖଲ ହୋଇଥିବା ଏକ ଆବେଦନକୁ ଆଧାର କରି ପୋଲିସ ତଦନ୍ତ ଆରମ୍ଭ କରିଥିଲା । କୁମ୍ବକୋନମ୍ ନିକଟ ଶିବପୁରମ ଗ୍ରାମର ନାରାୟଣସ୍ୱାମୀ ଏନେଇ ଏକ ଅଭିଯୋଗ କରିଥିଲେ । ଆବେଦନରେ ସେ ଉଲ୍ଲେଖ କରିଥିଲେ ଯେ, 'ଶିବପୁରମ ସ୍ଥିତ ଶିବଗୁରୁନାଥନ ସ୍ବାମୀ ମନ୍ଦିରରେ ଥିବା ମୂର୍ତ୍ତି ନକଲି, ସେଠାରୁ କେହି ଦୁର୍ବୃତ୍ତ ଅସଲି ମୂର୍ତ୍ତି ଚୋରାଇ ନେଇ ନକଲି ମୂର୍ତ୍ତି ରଖିଛନ୍ତି ।'
ଏହା ପରେ ଅନୁସନ୍ଧାନ ଆରମ୍ଭ କରିଥିଲା ପୋଲିସ, ମୂର୍ତ୍ତିଗୁଡ଼ିକର ପୁରୁଣା ଚିତ୍ର ସହିତ ରେଫରେନ୍ସ ପାଇଁ ଫ୍ରେଞ୍ଚ ଇନଷ୍ଟିଚ୍ୟୁଟ୍ ଅଫ୍ ପୁଡୁଚେରୀରୁ ସଂଗ୍ରହ କରାଯାଇଥିଲା । ଏହା ପାଇବା ପରେ ସୋମାସ୍କନ୍ଦର ଏବଂ ଥାନି ଆମ୍ମନ ମନ୍ଦିରରେ ଥିବା ମୂର୍ତ୍ତି ସହିତ ମେଳ ଖାଉ ନଥିଲା । ତାହା ଚୋରି ହୋଇ ପ୍ରତିକୃତି ସହିତ ସ୍ଥାନିତ ହୋଇଥିବା ଜଣାପଡିଥିଲା । ବ୍ରୋଞ୍ଜରେ ନିର୍ମିତ ସୋମାସ୍କନ୍ଦର ମୂର୍ତ୍ତି କାଲିଫର୍ନିଆର ନର୍ଟନ୍ ସାଇମନ୍ ସଂଗ୍ରହାଳୟରୁ ଏବଂ ଥାନି ଅମ୍ମନ ମନ୍ଦିର ଡେନଭର ମ୍ୟୁଜିୟମରୁ ଠାବ କରାଯାଇଛି ।
