ପାଟନା: ବିହାରରେ ଏଲଜେପି ମୁଖ୍ୟ ଚିରାଗ ପାଶୱାନଙ୍କୁ ଝଟକା ଲାଗିଛି । ଏଲଜେପି(ଲୋକ ଜନଶକ୍ତି ପାର୍ଟି)ର 200ରୁ ଅଧିକ ନେତା ଦଳ ଛାଡି ଶାସକ ଜେଡିୟୁ(ଜନତା ଦଳ ୟୁନାଇଟେଡ)ରେ ସାମିଲ ହୋଇଛନ୍ତି ।
ପୂର୍ବତନ ବିଧାୟକ ରାମେଶ୍ବର ପ୍ରସାଦ ଚୌରାସିଆ ଦଳ ଛାଡିବା ପରେ ଏପରି ସ୍ଥିତି ଦେଖିବାକୁ ମିଳିଛି । ଦଳର ପୂର୍ବତନ ମୁଖପାତ୍ର କେଶବ ସିଂଙ୍କ ନେତୃତ୍ବରେ ଏହି ନେତା ମାନେ ଜେଡିୟୁର ଦଳୀୟ କାର୍ଯ୍ୟାଳୟରେ ସାମିଲ ହୋଇଛନ୍ତି ।
ଜେଡିୟୁ ସଭାପତି ଆରସିପି ସିଂ ଏବଂ ବିହାର ରାଜ୍ୟ ସଭାପତି ଉମେଶ ସିଂ କୁଶୱାହା ସେମାନଙ୍କୁ ଦଳକୁ ସ୍ବାଗତ କରିଛନ୍ତି । ସେପଟେ ଦଳରେ ସାମିଲ ହେବା ପରେ ପୂର୍ବତନ ଏଲଜେପି ନେତା ରାମନାଥ ରାମନ ପାଶୱାନ, ଚିରାଗ ପାଶୱାନଙ୍କ ଉପରେ ବର୍ଷିଛନ୍ତି ।
ଚିରାଗ ପାଶୱାନଙ୍କୁ ଜେଲ ଯିବାରୁ କେହି ବଞ୍ଚାଇପାରିବେ ନାହିଁ ବୋଲି ସେ କହିଛନ୍ତି । ଅନ୍ୟପଟେ 208 ଜଣ ଏଲଜେପି ନେତାଙ୍କୁ ଦଳକୁ ସ୍ବାଗତ କରିବା ସହ ଏହା ଦଳକୁ ଆହୁରି ମଜବୁତ କରିବ ବୋଲି ଜେଡିୟୁ ସଭାପତି କହିଛନ୍ତି ।
@IANS
