ମେଙ୍ଗାଲୁରୁ: ପ୍ଲାଷ୍ଟିକରୁ ଘର ନିର୍ମାଣ । ଆପଣ ବ୍ୟବହାର କରୁଥିବା ପାନମସଲା ଜରି, ଚିପ୍ସ ଜରି ଓ ବିଭିନ୍ନ ପ୍ଲାଷ୍ଟିକରୁ ନିର୍ମାଣ ହୋଇଛି ଘର । ତା ପୁଣି ବେଶ୍ ଶାନଦାର ଭାବରେ । ଦେଖିଲେ ଆଖି ଲାଖି ଯିବ । କଥାଟା ଶୁଣିବାକୁ ଟିକେ ଅଜବ ଲାଗୁଥିଲେ ବି ହଁ ଆଜ୍ଞା ପ୍ଲାଷ୍ଟିକରୁ ଘର ନିର୍ମାଣ ହୋଇଛି । ମେଙ୍ଗାଲୁରୁରେ ଏଭଳି ପ୍ଲାଷ୍ଟିକ ଘର ନିର୍ମାଣ କରିଛି ପ୍ଲାଷ୍ଟିକ ଫର୍ ଚେଞ୍ଜ ଇଣ୍ଡିଆ ଫାଉଣ୍ଡେସନ ।
ସାଧାରଣତଃ ପଲିଥିନ, ପ୍ଲାଷ୍ଟିକ ପଦାର୍ଥ ପ୍ରକୃତି ପାଇଁ ବିପଦ ହୋଇଥାଏ । କିନ୍ତୁ ଏହି ସବୁ ଅଳିଆ ଆବର୍ଜନାରୁ ସୁନ୍ଦର ଘର ଯେ ନିର୍ମାଣ କରିହେବ ତାହା କଳ୍ପନା ବାହାରେ । ହେଲେ ଏହାକୁ ସତ ପ୍ରମାଣିତ କରି ଦେଖାଇଛି ପ୍ଲାଷ୍ଟିକ ଫର୍ ଚେଞ୍ଜ ଇଣ୍ଡିଆ ଫାଉଣ୍ଡେସନ । ପ୍ଲାଷ୍ଟିକ ଗୁଡିକୁ ପୁନଃବ୍ୟବହାର ଯୋଗ୍ୟ କରାଇ ଘର ନିର୍ମାଣ ହୋଇଛି । 360 ସ୍କୋୟାର ଫୁଟ୍ ଘର ନିର୍ମାଣ ପାଇଁ ବ୍ୟବହାର ହୋଇଛି 1500 କେଜି ପ୍ଲାଷ୍ଟିକ । ଆଉ ଘର ନିର୍ମାଣ ପାଇଁ ଖର୍ଚ୍ଚ ହୋଇଛି 4.50 ଲକ୍ଷ ଟଙ୍କା ।
କିପରି ହୋଇଛି ପ୍ଲାଷ୍ଟିକ ଘର ନିର୍ମାଣ ?
ଘର ଭିତ୍ତି ପ୍ରସ୍ତର ପାଇଁ ପଥର, ସିମେଣ୍ଟ, ଲୁହା ବ୍ୟବହାର କରାଯାଇଛି । ଘରକୁ ମଜବୁତ କରିବା ପାଇଁ ସେଥିରେ ପ୍ଲାଷ୍ଟିକ ବ୍ୟବହାର ହୋଇଛି । ଏବଂ ଘରର ଛାତ ମଧ୍ୟ ପ୍ଲାଷ୍ଟିକରେ ତିଆରି ହୋଇଛି । ବଡକଥା ହେଉଛି ଏହି ଘର ନିର୍ମାଣ ପାଇଁ ମାତ୍ର 10 ଦିନ ସମୟ ଲାଗିଛି ।
ସାଧାରଣତଃ ସମସ୍ତଙ୍କ ମନରେ ପ୍ରଶ୍ନ ଉଠିଥାଏ ପ୍ଲାଷ୍ଟିକ ଘର କଣ ? ନିରାପଦ । ହଁ ଆଜ୍ଞା ଏହି ପ୍ଲାଷ୍ଟିକ ଘର 30 ବର୍ଷ ପର୍ଯ୍ୟନ୍ତ ରହିପାରେ । ଏଥିରେ କୌଣସି କ୍ଷତି ହୋଇନଥାଏ । ଏପରିକି 120 ବେଗରେ ପବନ ହେଲେ ମଧ୍ୟ ଘରର କୌଣସି କ୍ଷତି କରିପାରେ ନାହିଁ । ପ୍ରାଥମିକ ଭାବେ ଜଣଙ୍କ ପାଇଁ ଘର ନିର୍ମାଣ ହୋଇଥିବା ବେଳେ ଆଗକୁ 20 ଜଣଙ୍କ ପାଇଁ ଘର ନିର୍ମାଣର ଯୋଜନା ରଖିଛି ଫାଉଣ୍ଡେସନ ।
ବ୍ୟୁରୋ ରିପୋର୍ଟ, ଇଟିଭି ଭାରତ
