ଡେରାଡୁନ: ଭେଟେରାନ କଂଗ୍ରେସ ନେତା ତଥା ଉତ୍ତରାଖଣ୍ଡ ପୂର୍ବତନ ମୁଖ୍ୟମନ୍ତ୍ରୀ ହରିଶ ରାୱତ ବିଧାନସଭା ନିର୍ବାଚନ ପରାଜିତ ହୋଇଛନ୍ତି । ନୈନିତାଲ ଜିଲ୍ଲାର ଲାଲକୁଆନ ବିଧାନସଭା ଆସନରୁ ପ୍ରତିଦ୍ବନ୍ଦିତା କରୁଥିବା ହରିଶ ରାୱତଙ୍କୁ ବିଜେପି ପ୍ରାର୍ଥୀ ମୋହନ ସିଂ ବିଷ୍ଟଙ୍କ ଠାରୁୁ ପ୍ରାୟ 14 ହଜାରରୁ ଅଧିକ ଭୋଟ ବ୍ୟବଧାନରେ ପରାଜୟର ସାମ୍ନା କରିବାକୁ ପଡିଛି ।
୧୪ ଫେବୃଆରୀରେ ହୋଇଥିବା ମତଦାନ ପରେ ସେ ଉତ୍ତରାଖଣ୍ଡରେ କଂଗ୍ରେସ ସତ୍ତାକୁ ଆସିବା ନେଇ ଦୃଢୋକ୍ତି ପ୍ରକାଶ କରିବା ସହ ନିଜକୁ ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ମଧ୍ୟ ପରୋକ୍ଷରେ ଦର୍ଶାଇଥିଲେ । ଏପରିକି ଗତକାଲି ମଧ୍ୟ କଂଗ୍ରେସ ପ୍ରାୟ ୪୮ ରୁ ଉର୍ଦ୍ଧ୍ବ ଆସନରେ ବିଜୟ ଲାଭ କରିବାକୁ ଯାଉଥିବା ନେଇ ସେ ଗଣମାଧ୍ୟମରେ ପ୍ରତିକ୍ରିୟା ରଖିଥିଲେ ।
ଏଠାରେ ଉଲ୍ଲେଖ ଯୋଗ୍ୟ ଯେ, 2017 ବିଧାନସଭା ନିର୍ବାଚନରେ ମଧ୍ୟ ହରିଶ ରାୱତ ମୁଖ୍ୟମନ୍ତ୍ରୀ ଥାଇ ମଧ୍ୟ ଦୁଇଟି ଆସନରୁ ପ୍ରତିଦ୍ବନ୍ଦିତା କରି ହାରିଥିଲେ । 2017 ରେ ହରିଶ ଉଧମ ସିଂ ନଗରର କିଚା ବିଧାନସଭା ଆସନ ଏବଂ ହରିଦ୍ୱାର ଜିଲ୍ଲାର ଗ୍ରାମାଞ୍ଚଳ ଆସନରୁ ପ୍ରତିଦ୍ୱନ୍ଦ୍ୱିତା କରିଥିଲେ । କିନ୍ତୁ ତାଙ୍କୁ ଉଭୟ ସିଟରେ ପରାଜୟର ସାମ୍ନା କରିବାକୁ ପଡିଥିଲା । ତେବେ ଚଳିତଥର ମଧ୍ୟ ତାଙ୍କୁ ପରାଜୟର ସାମ୍ନା କରିବାକୁ ପଡିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
