ଦିସପୁର: ସରିଲା ପ୍ରଚାର । ପ୍ରସ୍ତୁତ ନିର୍ବାଚନୀ ମୈଦାନ । ପ୍ରାର୍ଥୀଙ୍କ ହେବ ଭାଗ୍ୟ ନିର୍ଦ୍ଧାରଣ ଆଉ ମତଦାନ କରିବେ ଜନସାଧାରଣ । ଶନିବାର ପ୍ରଥମ ପର୍ଯ୍ୟାୟରେ ଆସାମର 47ଟି ବିଧାନସଭା ଆସନରେ ହେବ ମତଦାନ ।
ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୋୱାଲଙ୍କ ନେତୃତ୍ୱରେ ଆସାମରେ ସ୍ୱାଧୀନତା ପରଠାରୁ ପ୍ରଥମ ଭାରତୀୟ ଜନତା ପାର୍ଟିର ସରକାର । ତେବେ ଶାସନ ବଜାୟ ରଖିବା ପାଇଁ କୌଣସି ସୁଯୋଗକୁ ହାତଛଡା କରିବାକୁ ଚାହୁଁନାହିଁ ବିଜେପି ।
10ରୁ ଅଧିକ ରାଜନୈତିକ ଦଳର 264 ଜଣ ପ୍ରାର୍ଥୀ ପ୍ରଥମ ପର୍ଯ୍ୟାୟରେ 47 ବିଧାନସଭା ନିର୍ବାଚନମଣ୍ଡଳୀ ପାଇଁ ନାମାଙ୍କନ ଦାଖଲ କରିଛନ୍ତି । ତେବେ ଆସାମ ନିର୍ବାଚନ ପାଇଁ ADR ତଥ୍ୟ ଅନୁଯାୟୀ 264 ଜଣ ପ୍ରାର୍ଥୀଙ୍କ ମଧ୍ୟରୁ 259 ଜଣଙ୍କ ସତ୍ୟପାଠକୁ ଯାଞ୍ଚ କରାଯାଇଛି । ଅନ୍ୟପକ୍ଷେ ନିର୍ବାଚନ ଆୟୋଗଙ୍କ ୱାବସାଇଟରେ ସମ୍ପୂର୍ଣ୍ଣ ଆଫିଡେବିଟ ଅପଲୋଡ ହୋଇନଥିବା ଯୋଗୁଁ 5 ଜଣ ପ୍ରାର୍ଥୀଙ୍କ ତଥ୍ୟ ବିଶ୍ଳେଷଣ କରାଯାଇ ନାହିଁ ।
ସେପଟେ ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ମତଦାନ କେନ୍ଦ୍ର ସଂଖ୍ୟା 2016ରେ 24,890 ଥିବାବେଳେ 2021ରେ ଏହା 33,530କୁ ବୃଦ୍ଧି କରାଯାଇଛି। ଆସାମରେ ବର୍ତ୍ତମାନର ସରକାରଙ୍କ କାର୍ଯ୍ୟକାଳ 31 ମଇରେ ଶେଷ ହେବାକୁ ଯାଉଛି ।
259 ଜଣ ପ୍ରାର୍ଥୀଙ୍କ ମଧ୍ୟରୁ 97 (37%) ପ୍ରାର୍ଥୀ ସେମାନଙ୍କର ଶିକ୍ଷାଗତ ଯୋଗ୍ୟତା ପଞ୍ଚମରୁ ଦ୍ୱାଦଶ ମାନ୍ୟତା ମଧ୍ୟରେ ଘୋଷଣା କରିଥିବାବେଳେ, 157 (61%) ପ୍ରାର୍ଥୀ ସ୍ନାତକ କିମ୍ବା ତଦୁର୍ଦ୍ଧ୍ୱ ଶିକ୍ଷାଗତ ଯୋଗ୍ୟତା ଘୋଷଣା କରିଛନ୍ତି। ଚାରିଜଣ ପ୍ରାର୍ଥୀ ହେଉଛନ୍ତି ଡିପ୍ଲୋମା ଡିଗ୍ରୀଧାରୀ ଏବଂ ଜଣେ ପ୍ରାର୍ଥୀ କେବଳ ସାକ୍ଷର।
259 ଜଣଙ୍କ ମଧ୍ୟରୁ 25 (10%) ମହିଳା ପ୍ରାର୍ଥୀ ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟ ପାଇଁ ନାମାଙ୍କନ ଦାଖଲ କରିଛନ୍ତି ।
ମତଦାନର ପ୍ରଥମ ପର୍ଯ୍ୟାୟରେ ପ୍ରତିଦ୍ୱନ୍ଦ୍ୱିତା କରୁଥିବା 101 ପ୍ରାର୍ଥୀଙ୍କ ଆର୍ଥିକ ପୃଷ୍ଠଭୂମି (39%) ସହିତ କୋଟିପତି ବର୍ଗର ଅଟେ । ଭାରତୀୟ ଜାତୀୟ କଂଗ୍ରେସ ସର୍ବାଧିକ ସଂଖ୍ୟକ କୋଟିପତି ଥିବା ଶୀର୍ଷ ଦଳ ଭାବେ ରେକର୍ଡ କରିଛି ।
ବିଶ୍ଳେଷଣ କରାଯାଇଥିବା 259 ଜଣ ପ୍ରାର୍ଥୀଙ୍କ ମଧ୍ୟରୁ 41 (16%) ପ୍ରାର୍ଥୀ ଅପରାଧିକ ମାମଲା ଘୋଷଣା କରିଥିବାବେଳେ 34 (13%)ଙ୍କ ବିରୋଧରେ ଗୁରୁତର ଅପରାଧିକ ମାମଲା ରହିଛି ।
ପ୍ରଥମ ପର୍ଯ୍ୟାୟରେ 47 ଟି ନିର୍ବାଚନମଣ୍ଡଳୀ ମଧ୍ୟରୁ 3ଟି (6%) ରେଡ୍ ଆଲର୍ଟ ନିର୍ବାଚନମଣ୍ଡଳୀ ଘୋଷିତ ହୋଇଛି, ଯେଉଁଠାରେ ତିନି କିମ୍ବା ଅଧିକ ପ୍ରତିଯୋଗୀ ପ୍ରାର୍ଥୀଙ୍କ ବିରୋଧରେ ଅପରାଧିକ ମାମଲା ରହିଛି ।
