ଗାନ୍ଧୀନଗର: କେନାଲରେ ବୁଡ଼ି ଗୋଟିଏ ପରିବାରର ୫ ଜଣଙ୍କ ମୃତ୍ୟୁ ହୋଇଛି । ଗୁଜରାଟରେ କଚ୍ଛ ମୁଣ୍ଡ୍ରା ଇଲାକାରେ ଏଭଳି ଦୁଃଖଦ ଘଟଣା ଘଟିଛି । ଗୁଣ୍ଡଲା ଗ୍ରାମର ନର୍ମଦା କେନାଲ୍ ପାର୍ ହେଉଥିବା ୫ ଜଣ ବୁଡ଼ି ଯାଇଥିଲେ । ତୁରନ୍ତ ତାଙ୍କୁ ଉଦ୍ଧାର କରି ସ୍ଥାନୀୟ ଡାକ୍ତରଖାନା ନିଆଯାଇଥିଲା, ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି ।
ତଦନ୍ତବେଳେ ସମସ୍ତ ମୃତକ ଗୋଟିଏ ଗାଁର ଗୋଟିଏ ପରିବାରର ବୋଲି ଜଣା ପଡ଼ିଛି । ଏମାନେ ଶ୍ରମିକ ଭାବରେ କାମ କରି ନିଜ ପରିବାର ପେଟ ପାଳୁଥିଲେ । ହେଲେ ସୋମବାର ସେମାନେ ମୁଣ୍ଡ୍ରାରେ କାମ ସାରି ଫେରୁଥିଲେ । ତେବେ କେନାଲ ପାର୍ ହେବା ସମୟରେ ଏମାନେ ବୁଡ଼ି ଯାଇଥିଲେ । ଏହାଦେଖି ସ୍ଥାନୀୟ ଲୋକେ ସେମାନଙ୍କୁ ବଞ୍ଚାଇବାକୁ ଚେଷ୍ଟା କରିଥିଲେ ହେଲେ ସଫଳ ହୋଇ ପାରିନଥିଲେ ।
ଶେଷର ସ୍ଥାନୀୟ ଲୋକ ହିଁ ମୃତଦେହ ଉଦ୍ଧାର କରିଥିଲେ । ଏହାପରେ ଉଦ୍ଧାରକାରୀ ଦଳ ପହଞ୍ଚି ମଧ୍ୟ ସର୍ଚ୍ଚ ଅପରେସନ କରିଥିଲା । ତେବେ ଆଉ କେହି ବୁଡିନଥିବା ସ୍ପଷ୍ଟ ହୋଇଛି । ସେପଟେ ଏଭଳି ଘଟଣାକୁ ନେଇ ଗୁଣ୍ଡଲା ଗ୍ରାମରେ ଶୋକର ଛାୟା ଖେଳି ଯାଇଛି । ଏଠାରେ ଗୋଟିଏ ପରିବାରର ଏକା ସାଙ୍ଗରେ ୫ଟି ଜୁଇ ଜଳିଛି । ସେପଟେ ଘଟଣାକୁ ନେଇ ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ଏହାକୁ ନେଇ ସ୍ଥାନୀୟ ସାଂସଦ ଶୋକ ପ୍ରକାଶ କରିଛନ୍ତି ।
