ପାଟନା: ପୁଣି ଥରେ ବିହାରରେ ଫୁଟିଛି ଗୁଳି । ବିହାରର ରାଜଧାନୀ ପାଟନାରେ ଆଉଥରେ ଦେଖିବାକୁ ମିଳିଛି ପେଶାଦାର ଅପରାଧୀଙ୍କ ତାଣ୍ଡବ । ପାଟନାର ଦିଘା ଥାନା ଅନ୍ତର୍ଗତ ନକଟା ଦିୟାରାରେ ଗୁଳିକାଣ୍ଡର ଘଟଣା ସାମନାକୁ ଆସିଛି । ଯେଉଁଥିରେ ୩ ଜଣ ଲୋକ ଗୁଳି ବାଜିବା ଦ୍ବାରା ଆହତ ହୋଇଛନ୍ତି । ଏହି ଗୁଳିକାଣ୍ଡରେ ଗମ୍ଭୀର ଭାବେ ଆହତ ହୋଇ ୩ ଜଣଙ୍କ ପାଟନା ସ୍ଥିତ ପିଏମସିଏଚରେ ଚିକିତ୍ସା ଚାଲିଛି ।
ଏହା ମଧ୍ୟ ପଢନ୍ତୁ ... ଗୁଳିମାଡ ଘଟଣାରେ ଦୁର୍ଦ୍ଦାନ୍ତ ଅପରାଧୀକୁ ୧୦ ବର୍ଷ ଜେଲ
ଏହି ଘଟଣା ଫଳରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି । ଘଟଣାର ସୂଚନା ପାଇବା ମାତ୍ରେ ପୋଲିସ ଯାଞ୍ଚ ଆରମ୍ଭ କରିଛି । ପାଟନାର ଦିଘା ଥାନା ସ୍ଥିତ ପୋଲସନ ରୋଡ଼ରେ ଘଟିଛି ଏହି କାଣ୍ଡ । ଆହତ ମାନଙ୍କ ନାମ ହେଉଛି କାମେଶ୍ବର ରାୟ , ତାଙ୍କ ପୁଅ ବିକାଶ ଏବଂ ବିକାଶଙ୍କ ବନ୍ଧୁ ଦୀପକ । ଏକ ଶ୍ରାଦ୍ଧ ଭୋଜିରେ ଘଟିଛି ଏଭଳି ଆଖିବୁଜା ଗୁଳିକାଣ୍ଡ । ସୂଚନା ଅନୁସାରେ ନକଟା ଦିୟାରା ଅଞ୍ଚଳରେ ଆହତ ହୋଇ ଥିବା କାମେଶ୍ବର ରାୟଙ୍କ ପିତାଙ୍କ ଦେହାନ୍ତ ହୋଇଥିଲା । ସେଥିପାଇଁ ମୃତକଙ୍କ ଶ୍ରାଦ୍ଧ ଭୋଜି ଆୟୋଜିତ ହୋଇଥିଲା । ଏହି ସମୟରେ ପଡ଼ିଶା ଘରେ ରହୁଥିବା କିଛି ଲୋକଙ୍କ ସହ ତାଙ୍କର କୌଣସି କଥାକୁ ନେଇ ବଚସା ହୋଇଥିଲା ।
ଏହା ମଧ୍ୟ ପଢନ୍ତୁ ... ତ୍ରିକୋଣୀୟ ପ୍ରେମରୁ ଜଘନ୍ୟ କାଣ୍ଡ, ଯୁବକଙ୍କୁ 50 ଥର ଛୁରୀ ଭୁସି ହତ୍ୟା
ଏଥିରେ ଉତକ୍ଷିପ୍ତ ହୋଇ ଅପରପକ୍ଷ ଗୁଳି ଫୁଟାଇବା ଆରମ୍ଭ କରିଥିଲେ । ଫଳରେ ଉପସ୍ଥିତ ଲୋକ ପ୍ରାଣ ବିକଳରେ ଦୌଡି ପଳାଇ ଥିଲେ । ଆହତ କାମେଶ୍ବର ରାୟ ଙ୍କ ବାହୁ, ପୁଅ ବିକାଶର ଛାତି ରେ ଗୁଳି ବାଜି ଥିବା ବେଳେ ବିକାଶର ସାଙ୍ଗ ଦୀପକର ଗୋଡ଼ରେ ଗୁଳି ବାଜିଥିଲା । ଗୁରୁତର ଭାବେ ୩ ଜଣ ଆହତମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ଅଭିଯୁକ୍ତମାନେ ଏକ ଡଜନରୁ ଅଧିକ ରାଉଣ୍ଡ ଗୁଳି ଚଳାଇଥିଲେ । ଘଟଣା ବାବଦରେ ସୂଚନା ପାଇ ପୋଲିସ ସେଠାରେ ପହଞ୍ଚି ତଦନ୍ତ ଆରମ୍ଭ କରିବା ସହ ଅନେକ ଖାଲି ଖୋଖା ଜବତ କରିଛି । ଏନେଇ ପୋଲିସ ପକ୍ଷରୁ କୌଣସି ଆଧିକାରିକ ବୟାନ ଦିଆଯାଇ ନାହିଁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
