ନୂଆଦିଲ୍ଲୀ: ଦେଶର ରାଜଧାନୀ ଦିଲ୍ଲୀ ସ୍ଥିତ ସିବିଆଇ(CBI) ମୁଖ୍ୟାଳୟରେ ଅଗ୍ନିକାଣ୍ଡ । ବିଲ୍ଡିଂର ବେସମେଣ୍ଟରେ ଲାଗିଛି ନିଆଁ । ବର୍ତ୍ତମାନ ସମସ୍ତ ଅଧିକାରୀ ଓ କର୍ମଚାରୀଙ୍କୁ ବାହାରକୁ ଅଣାଯାଇଛି । ଘଟଣାସ୍ଥଳରେ ୮ଟି ଦମକଳ ଗାଡି ପହଁଞ୍ଚି ନିଆଁ ଲିଭା କାର୍ଯ୍ୟରେ ନିୟୋଜିତ ହୋଇଛନ୍ତି ।
ଦିଲ୍ଲୀର ଲୋଧି ରୋଡ୍ ଅଞ୍ଚଳର ସିଜିଓ କମ୍ପ୍ଲେକ୍ସରେ ରହିଛି ସିବିଆଇ ମୁଖ୍ୟାଳୟ । ସର୍ଟସର୍କିଟ କାରଣରୁ ସିବିଆଇ ମୁଖ୍ୟାଳୟରେ ଅଗ୍ନିକାଣ୍ଡ ଘଟିଥିବା କୁହାଯାଉଛି । ନିଆଁ ଲାଗିବା ପରେ ବିଲ୍ଡିଂକୁ ସମ୍ପୂର୍ଣ୍ଣ ଖାଲି କରିଦିଆଯାଇଛି ।
ସୂଚନା ଅନୁଯାୟୀ, ସିବିଆଇ ମୁଖ୍ୟାଳୟ କୋଠାରେ ଅଗ୍ନିକାଣ୍ଡ ଘଟିଥଇବା ନେଇ ଶୁକ୍ରବାର ଦିନ ଗୋଟାଏ ୩୦ରେ ଦମକଳବାହୀନିକୁ ଖବର ମିଳିଥିଲା । ବର୍ତ୍ତମାନସୁଦ୍ଧା ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଛି । ହେଲେ ସର୍ଟସର୍କିଟ କାରଣରୁ ନିଆଁ ଲାଗିଥିବା ଅନୁମାନ କରାଯାଉଛି ।
ସିବିଆଇ ମୁଖ୍ୟାଳୟରେ ବିଭିନ୍ନ ପ୍ରକାର ଅତ୍ୟନ୍ତ ଜରୁରୀ ଓ ଗୋପନୀୟ ଦସ୍ତାବିଜ ତଥା ଫାଇଲ ରହିଛି । ତେବେ ଏଠାରେ ଏଠାରେ ଅଗ୍ନିକାଣ୍ଡ ଘଟଣାକୁ ବଡ ଆକାରରେ ଦେଖାଯାଇପାରେ । ଏହାପୂର୍ବରୁ ଚଳିତ ବର୍ଷ ଜୁଲାଇରେ ମଧ୍ୟ ଏହି କୋଠାର ବେସମେଣ୍ଟରେ ସର୍ଟସର୍କିଟ କାରଣରୁ ଅଗ୍ନିକାଣ୍ଡ ଘଟିଥିଲା । ହେଲେ ଏଥିରେ କୌଣସି ଧନଜୀବନ ହାନୀ ହୋଇନଥିଲା ।
