ଚେନ୍ନାଇ: ତାମିଲନାଡୁ ସରକାର ମହିଳାଙ୍କ ସଶକ୍ତିକରଣ ସମେତ ଏକାଧିକ କ୍ଷେତ୍ରରେ ବିଭିନ୍ନ ଜନକଲ୍ୟାଣକାରୀ ଯୋଜନା ପ୍ରଣୟନ ଜାରି ରଖିଛନ୍ତି । ଋଣ ଭାର ଓ ଆର୍ଥିକ ନିଅଣ୍ଟ ସ୍ଥିତି ମଧ୍ୟରେ କେନ୍ଦ୍ରୀୟ ଅନୁଦାନରେ ପକ୍ଷପାତିତା କରାଯାଉଛି । ପ୍ରଶାସନିକ କ୍ଷେତ୍ରରେ ରାଜ୍ୟ ମଧ୍ୟ କିଛି ସମସ୍ୟାର ସମ୍ମୁଖୀନ ହେଉଛି । ତଥାପି ଏକାଧିକ ଆହ୍ବାନ ସତ୍ତ୍ବେ ମଧ୍ୟ ରାଜ୍ୟ ଆଗକୁ ବଢୁଛି । ଆଜି ‘ଇଟିଭି ଭାରତ’କୁ ସ୍ବତନ୍ତ୍ର ସାକ୍ଷାତକାରରେ ତାମିଲନାଡୁ ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ ବିଭିନ୍ନ ପ୍ରସଙ୍ଗରେ ବିଜେପି ସରକାରକୁ ଟାର୍ଗେଟ କରିବା ସହ ତାଙ୍କ ସରକାରଙ୍କ ଆଭିମୁଖ୍ୟ ସମ୍ପର୍କରେ ଏପରି କହିଛନ୍ତି ।
ଷ୍ଟାଲିନ କହିଛନ୍ତି ରାଜ୍ୟରେ ଶାସନରେ ଥିବା ଦ୍ରାବିଡ଼ ମଡେଲ ସରକାରର କଲ୍ୟାଣ କାର୍ଯ୍ୟକ୍ରମ ମଧ୍ୟରେ ମହିଳାମାନଙ୍କ ପାଇଁ ସମ୍ମାନ ସବୁଠାରୁ ଗୁରୁତ୍ୱପୂର୍ଣ୍ଣ ଯୋଜନା । ଏହି ସମସ୍ତ ଯୋଜନାଗୁଡିକର ଉଦ୍ଦେଶ୍ୟ କେବଳ ଦୈନନ୍ଦିନ ଆବଶ୍ୟକତା ପୂରଣ କରିବା ନୁହେଁ ବରଂ ଭବିଷ୍ୟତର ବିକାଶ ପାଇଁ ମୂଳଦୁଆ ପକାଇବା । ତେଣୁ, ଯାହା ବି ହେଲେ ମଧ୍ୟ ଦ୍ରାବିଡ଼ ମଡେଲ ସରକାର ଏହାକୁ କାର୍ଯ୍ୟକାରୀ କରିବାକୁ ସଂକଳ୍ପବଦ୍ଧ ।
ବର୍ଷ ବର୍ଷ ଧରି, ଆମେ ଋଣ ଭାର, ଆର୍ଥିକ ନିଅଣ୍ଟ ଏବଂ ପ୍ରଶାସନିକ ବିଶୃଙ୍ଖଳାକୁ ମଧ୍ୟ ଦୂର କରିବାରେ ସଫଳ ହୋଇଛୁ । ମାତ୍ର ଏପର୍ଯ୍ୟନ୍ତ ଆମେ କେନ୍ଦ୍ର ସରକାରଙ୍କ ଭେଦଭାବପୂର୍ଣ୍ଣ ଆର୍ଥିକ ଅନୁଦାନରୁ ସମ୍ପୂର୍ଣ୍ଣ ମୁକ୍ତ ହୋଇ ନାହୁଁ । ତଥାପି ଆମେ ରାଜ୍ୟକୁ ବିକାଶ ପଥରେ ଆଗେଇ ନେବାରେ ଲାଗିଛୁ । ଆଗଧାଡିର ଲୋକ କଲ୍ୟାଣକାରୀ ଯୋଜନା ଓ ନିର୍ବାଚନ ସମୟରେ ରାଜ୍ୟବାସୀଙ୍କୁ ଦିଆଯାଇଥିବା ପ୍ରତିଶ୍ରୁତି କାର୍ଯ୍ୟକାରୀ କରାଯାଉଥିବାରୁ ସମଗ୍ର ଦେଶର ନଜର ଏବେ ତାମିଲନାଡୁ ପ୍ରତି ରହିଛି ।
ପ୍ରଶ୍ନ: ଉତ୍ତର ଭାରତରେ ଶକ୍ତିଶାଳୀ ହିନ୍ଦୁତ୍ୱ ହ୍ବାଓ୍ବାକୁ ଭାଙ୍ଗିବା ପାଇଁ ବିରୋଧୀ ମେଣ୍ଟ ‘ଇଣ୍ଡିଆ’ର ରଣନୀତି କ’ଣ ?
ଉତ୍ତର:- ସାମ୍ପ୍ରଦାୟିକତା ବ୍ୟତୀତ ବିଜେପିର ଅନ୍ୟ କୌଣସି ଆଦର୍ଶ ନାହିଁ । ବିଜେପି ସରକାର ନିଜର କାର୍ଯ୍ୟ ଓ ପ୍ରଦର୍ଶନକୁ ଆଧାର କରି ଭୋଟ୍ ହାସଲ କରିବାକୁ ଅସମର୍ଥ । ତେଣୁ ଘୃଣା ରାଜନୀତି ଉପରେ ସେମାନେ ନିର୍ଭରଶୀଳ । କିନ୍ତୁ ଇଣ୍ଡିଆ ମେଣ୍ଟ ହେଉଛି ଧାର୍ମିକ ସମନ୍ୱୟର ଗଠବନ୍ଧନ । ଆମେ ସାମ୍ବିଧାନିକ ନୀତି ଉପରେ ବିଶ୍ବାସ କରୁ । ବହୁମୁଖୀ ରାଜ୍ୟଗୁଡିକର ଅଧିକାରରେ ବିଶ୍ବାସ କରୁ । ଲୋକେ ସମ୍ମୁଖୀନ ହେଉଥିବା ମୌଳିକ ପ୍ରସଙ୍ଗ ଉପରେ ଆମ ମେଣ୍ଟ ଧ୍ୟାନ ଦେଉଛି । ନିର୍ବାଚନ ମଞ୍ଚରେ ବିଜେପିର ସାମ୍ପ୍ରଦାୟିକ ରାଜନୀତିକୁ ବିରୋଧ କରୁଥିବା ସମସ୍ତ ଗଣତାନ୍ତ୍ରିକ ଶକ୍ତିକୁ ଏକତ୍ର କରି ବିଜୟର ଆଶା ସହ ସମନ୍ୱୟ ସୁନିଶ୍ଚିତ କରିବା ଆମ ମେଣ୍ଟର ପ୍ରାଥମିକତା । ନିକଟରେ ହୋଇଥିବା ଏକାଧିକ ରାଜ୍ୟରେ ଉପ-ନିର୍ବାଚନ ଓ କର୍ଣ୍ଣାଟକ ବିଧାନସଭା ନିର୍ବାଚନରେ ତାହା ପ୍ରମାଣିତ ହୋଇଛି ଯେ ବିଜୟ ସମ୍ଭବ ।
ପ୍ରଶ୍ନ: ଜାତୀୟ ରାଜନୀତିରେ DMK ଏକ ଛାପ ସୃଷ୍ଟି କରିବାକୁ ଚେଷ୍ଟା କରୁଛି କି ? ଆପଣଙ୍କ ଅଭିଭାଷଣ ହିନ୍ଦୀରେ ପ୍ରକାଶିତ ହୋଇଛି । ଯାହା ପୂର୍ବରୁ ହେଉନଥିଲା । ପ୍ରଧାନମନ୍ତ୍ରୀ ହେବାର ଇଚ୍ଛା ରଖନ୍ତିକି ଷ୍ଟାଲିନ ?
ଉତ୍ତର: ଜାତୀୟ ରାଜନୀତିରେ DMK ତୃତୀୟ ବୃହତ୍ତମ ଦଳ ହୋଇସାରିଛି । ବ୍ୟାଙ୍କ ରାଷ୍ଟ୍ରୀୟକରଣ ସମେତ ସ୍ୱର୍ଗତ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ପ୍ରଗତିଶୀଳ ପଦକ୍ଷେପକୁ ସମର୍ଥନ କରି ଜାତୀୟ ରାଜନୀତିରେ ଏମ. କରୁଣାନିଧି ଦଳର ଛାପ ଛାଡିଥିଲେ । ଜରୁରୀକାଳୀନ ପରିସ୍ଥିତିରେ ମଧ୍ୟ ସେ ଗଣତାନ୍ତ୍ରିକ ସ୍ୱରର ନେତୃତ୍ୱ ନେଇଥିଲେ । ଡିଏମକେ ଦଳ ପୂର୍ବତନ ପ୍ରଧାନମନ୍ତ୍ରୀ ଭି.ପି ସିଂଙ୍କ ନ୍ୟାସନାଲ ଫ୍ରଣ୍ଟ ସରକାରର ଏକ ମେରୁଦଣ୍ଡ ପରି କାର୍ଯ୍ୟ କରିଥିଲା । ପଛୁଆ ବର୍ଗଙ୍କ ପାଇଁ 27% କୋଟା କାର୍ଯ୍ୟକାରୀ କରି ସମଗ୍ର ଦେଶରେ ସାମାଜିକ ନ୍ୟାୟ ସୁନିଶ୍ଚିତ କରିବା ପାଇଁ ଦଳ ପୂର୍ବରୁ କାର୍ଯ୍ୟ କରିସାରିଛି । ଏକ ସାଧାରଣ ସର୍ବନିମ୍ନ କାର୍ଯ୍ୟକ୍ରମ ପାଇଁ ଦଳ ବାଜପେୟୀ ସରକାରଙ୍କୁ ସମର୍ଥନ କରିଥିଲା । ଡିଏମକେର ଉପସ୍ଥିତିରେ ରାଜନୈତିକ ମେଣ୍ଟରେ ସାମ୍ପ୍ରଦାୟିକତାର କୌଣସି ସ୍ଥାନ ନାହିଁ ବୋଲି ଦଳ ପ୍ରଶଂସା ମଧ୍ୟ ସାଉଁଟି ଥିଲେ । ସେହିପରି ପ୍ରଧାନମନ୍ତ୍ରୀ ଡ. ମନମୋହନ ସିଂଙ୍କ ନେତୃତ୍ବାଧୀନ ଦୁଇଟି ସରକାରରେ ଡିଏମକେ ଏକ ଗୁରୁତ୍ୱପୂର୍ଣ୍ଣ ଅଂଶୀଦାର ଥିଲା ।
ପ୍ରଶ୍ନ: କେନ୍ଦ୍ର ସରକାର ହିନ୍ଦୀରେ ପ୍ରତ୍ୟେକ ନୂତନ ବିଲ୍ ନାମକରଣ କରୁଛନ୍ତି । ଏପରିକି ପୂର୍ବ ନିୟମର ନାମ ହିନ୍ଦୀରେ ପରିବର୍ତ୍ତନ କରାଯାଇଛି । ଏସମ୍ପର୍କରେ ଡିଏମକେ ଏବଂ ତାମିଲନାଡୁର ପ୍ରତିକ୍ରିୟା କ’ଣ ହେବ ?
ଉତ୍ତର: ସଂସଦର ଉଭୟ ଗୃହରେ ଡିଏମକେ ସାଂସଦମାନେ ଏହି ପ୍ରସଙ୍ଗ ଉଠାଇଛନ୍ତି । ସେ ହିନ୍ଦୀରେ ନିମନ୍ତ୍ରଣ ପତ୍ର ଚିରି ନିଜର ବିରୋଧ ପ୍ରଦର୍ଶନ କରିଛନ୍ତି । ବିଜେପିର ଏହି ପ୍ରୟାସ, ଗୋଟିଏ ତାମିଲ ନୁହେଁ ଅନ୍ୟ ରାଜ୍ୟର ସମସ୍ତ ଭାଷା ପାଇଁ କ୍ଷତିକାରକ ବୋଲି ଡିଏମକେ କହିସାରିଛି । ବିଜେପିର ଲୁକ୍କାୟିତ ଉଦ୍ଦେଶ୍ୟ 'ଏକ ଦେଶ, ଏକ ଭାଷା' ଫଳରେ ସୃଷ୍ଟି ହେବାକୁ ଥିବା ବିପଦକୁ କ୍ରମାଗତ ଭାବରେ ଦଳ ଆଲୋକପାତ ମଧ୍ୟ କରିଆସିଛି । ଏହା ଉପରେ ସଚେତନତା ବଢିବାରେ ଲାଗିଛି । ଆମେ କୌଣସି ଭାଷା ବିରୋଧୀ ନୁହେଁ । କିନ୍ତୁ, କୌଣସି ଭାଷାକୁ ନେଇ ଏପରି ଆଭିମୁଖ୍ୟ ସହ କାର୍ଯ୍ୟ କରାଗଲେ ଆମେ ବିରୋଧ କରିବୁ ।
ପ୍ରଶ୍ନ: ନିର୍ବାଚନ ପ୍ରଚାର ପାଇଁ ବିଜେପି ସୋସିଆଲ ମିଡିଆ ପ୍ଲାଟଫର୍ମର ଅପବ୍ୟବହାର କରୁଥିବା ନେଇ ୱାଶିଂଟନ୍ ପୋଷ୍ଟ ଏକ ରିପୋର୍ଟ ପ୍ରକାଶ କରିଛି । ଡିଜିଟାଲ ମିଡିଆ ବ୍ୟବହାର କରିବା କିମ୍ବା କ୍ଷମତାର ଅପବ୍ୟବହାର କରିବା ଏହା କେବଳ ରଣନୀତି କି ?
ଉତ୍ତର: ବିଜେପିର ମିଥ୍ୟା ପ୍ରଚାର ପାଇଁ ଏବେ ହ୍ବାଟ୍ସଆପ ୟୁନିଭର୍ସିଟି ଖୋଲିଲାଣି । ଡିଜିଟାଲଠାରୁ ଟେଲିଭିଜନ୍ ଓ ପ୍ରିଣ୍ଟ୍ ପର୍ଯ୍ୟନ୍ତ ବିଜେପି ସରକାର କ୍ଷମତା ବଳରେ ଅପବ୍ୟବହାର କରିବାରେ ବେଶ ଅଭ୍ୟସ୍ତ । ତେଣୁ ଇଣ୍ଡିଆ ମେଣ୍ଟ କିଛି ଗଣମାଧ୍ୟମ ଓ ସମ୍ବାଦ ଉପସ୍ଥାପକଙ୍କୁ ବର୍ଜନ କରିଛି । ରାଜନୈତିକ କ୍ଷମତାର ଅପବ୍ୟବହାରକୁ ଦର୍ଶାଇବା ପାଇଁ ଏହା ଏକ ପ୍ରୟାସ ମାତ୍ର । ଏହାର ଉଦ୍ଦେଶ୍ୟ ହେଉଛି ଖବରକାଗଜ ଏବଂ ଅନ୍ୟାନ୍ୟ ଗଣମାଧ୍ୟମକୁ ନିରପେକ୍ଷତାକୁ ଫେରାଇବା ।
ପ୍ରଶ୍ନ: ଇଣ୍ଡିଆ ମେଣ୍ଟର ସାମ୍ପ୍ରତିକ ସ୍ଥିତି କ’ଣ ?
କର୍ଣ୍ଣାଟକ ବିଧାନସଭା ନିର୍ବାଚନ ଓ ନିକଟରେ ଉପ-ନିର୍ବାଚନ ସହିତ ଇଣ୍ଡିଆ ମେଣ୍ଟ ପ୍ରଥମ ରାଉଣ୍ଡରେ ସଫଳତାର ସ୍ୱାଦ ଚାଖିଛି । ଏହା ହେଉଛି 9 ବର୍ଷର ଅଗଣତାନ୍ତ୍ରିକ, ଜନ ବିରୋଧୀ ଓ ବିଜେପିର ସାମ୍ବିଧାନିକ ବିରୋଧୀ ଶାସନ ବିରୋଧରେ ଲଢେଇ । ବିଜେପିର ଛାୟା ସହଯୋଗୀ - ଇଡି ଓ ଆୟକର ବିଭାଗର କାର୍ଯ୍ୟାନୁଷ୍ଠାନ ବିରୋଧରେ ଅନ୍ୟ କିଛି ଦଳ ମଧ୍ୟ ଇଣ୍ଡିଆ ମେଣ୍ଟରେ ସାମିଲ ହେବେ ।
ପ୍ରଶ୍ନ: ବିଜେପି- AIADMK ମେଣ୍ଟ ପ୍ରକୃତରେ ଭାଙ୍ଗିଛି କି ? ଏହା ଫଳରେ କୌଣସି ପରିବର୍ତ୍ତନ ହେବ କି ?
ଉତ୍ତର: ବିଜେପିର ସହଯୋଗୀ ସମ୍ପର୍କ ଛିନ୍ନ ହେବା ପରେ ଆପଣ ନିଶ୍ଚିତ ଭାବରେ ଏକ ରାଜ୍ୟର ବିକାଶ ବିଷୟରେ ଅବଗତ ହେବା ଆବଶ୍ୟକ । AIADMK ଓ ବିଜେପି ଅଲଗା ହୋଇଛନ୍ତି କି ନାହିଁ ସେ ସନ୍ଦେହ ଆପଣଙ୍କ ମନରେ ଥାଇପାରେ । ଆମେ ଏହି ପ୍ରସଙ୍ଗରେ ବ୍ୟସ୍ତ ନୁହଁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
