ଲକ୍ଷ୍ନୌ: ମାନବିକତା ହରାଉଛି ମଣିଷ। ସୀମା ଲଂଘିଲା ପଶୁ ପ୍ରତି ମନୁଷ୍ୟର କୃରତା । ଉତ୍ତରପ୍ରଦେଶର ଫରିଦପୁର ଥାନା ଅଞ୍ଚଳରୁ ଏକ ଅଭବାନୀୟ ଘଟଣା ସାମ୍ନାକୁ ଆସିଛି । ଦୁଇ ଜଣ ଯୁବକ ନିଶାସକ୍ତ ଅବସ୍ଥାରେ ଦୁଇ କୁକୁର ଛୁଆଙ୍କ କାନ ଏବଂ ଲାଞ୍ଜ କାଟିଦେଛନ୍ତି । ଖାଲି ଏତିକି ନୁହେଁ କଟା କାନ ଏବଂ ଲାଞ୍ଜକୁ ଚାଖଣାରେ ବ୍ୟବହାର କରିଛନ୍ତି । ଏହି ଘଟଣା ନେଇ ଅଭିଯୋଗ ହେବା ପରେ ପୋଲିସ ଉକ୍ତ ଯୁବକଙ୍କ ବିରୋଧରେ ମାମଲା ରୁଜୁ କରି ତଦନ୍ତ କରୁଛି ।
PFA( People for Animal)ର ଉଦ୍ଧାରକାରୀ ଧୀରଜ ପାଠକଙ୍କ କହିବା ଅନୁଯାୟୀ, ଫରିଦପୁର ବାସିନ୍ଦା ମୁକେଶ ବାଲ୍ମିକୀ ନାମକ ଜଣେ ଯୁବକ ନିଜ ବନ୍ଧୁ ସହ ମିଶି ନିଶାସକ୍ତ ଅବସ୍ଥାରେ ରାସ୍ତାରେ ବୁଲୁଥିବା ଦୁଇ କୁକୁର ଛୁଆଙ୍କ ଉପରେ ଆକ୍ରମଣ କରିଥିଲେ । ଜଣେ ଗୋଟିଏ କୁକୁରର କାନ କାଟି ଦେଇଥିବାବେଳେ ଅନ୍ୟ ଜଣେ ଲାଞ୍ଜ କାଟିଦେଇଥିଲା । ଖାଲି ସେତିକି ନୁହେଁ ମାନବିକତାର ସବୁ ସୀମାକୁ ଅତିକ୍ରମ କରି ଦୁଇ ମଦ୍ୟପ କୁକୁରଙ୍କ କଟା କାନ ଏବଂ ଲାଞ୍ଜ ଚାଖଣା ଭାବେ ବ୍ୟବହାର କରି ମଦ୍ଯପାନ କରିଥିଲେ । ଏହି ଘଟଣା ନେଇ ସୂଚନା ପାଇବା ପରେ PFA ଉଦ୍ଧାରକାରୀ ଧୀରଜ ପାଠକ ଦୁଇ କୁକୁର ଛୁଆଙ୍କୁ ଗୁରୁତର ଅବସ୍ଥାରେ ଉଦ୍ଧାର କରିଥିଲେ ।
ଉକ୍ତ ଯୁବକ ମୁକେଶ ଏବଂ ତାଙ୍କ ବନ୍ଧୁ ବିରୋଧରେ ଫରିଦପୁର ଥାନାରେ ଅଭିଯୋଗ କରି କାର୍ଯ୍ୟାନୁଷ୍ଠାନ ଦାବି କରିଥିଲେ । ଧୀରଜଙ୍କ ଅଭିଯୋଗ ଆଧାରରେ ପଶୁ କୃରତା ଅଧିନିୟମ ଅନୁଯାୟୀ ଉଭୟଙ୍କ ବିରୋଧରେ ମାମଲା ରୁଜୁ ହୋଇଛି । ଏହି ଘଟଣାର ତଦନ୍ତ ପରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ପୋଲିସ ଅଧିକାରୀ ସୂଚନା ଦେଇଛନ୍ତି । ଅନ୍ୟପଟେ ଦୁଇ ଆହତ କୁକୁରଙ୍କୁ ପ୍ରାଣୀଧନ ଚିକିତ୍ସାଳୟରେ ଭର୍ତ୍ତି କରି ଚିକିତ୍ସା କରାଯାଉଛି ।
