ମୁମ୍ବାଇ: ପ୍ରଶାସନିକ ନିୟନ୍ତ୍ରଣ ପ୍ରସଙ୍ଗରେ କେନ୍ଦ୍ର ଆଣିଥିବା ଅଧ୍ୟାଦେଶ ବିରୋଧରେ ରାଜନୈତିକ ସମର୍ଥନ ହାସଲ ମିଶନରେ ଥିବା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଆଜି(ଗୁରୁବାର) ଏନସିପି ପ୍ରତିଷ୍ଠାତା ଶରଦ ପାଓ୍ବାରଙ୍କୁ ସାକ୍ଷାତ କରିଛନ୍ତି । ଶରଦଙ୍କ ବାସଭବନରେ ଏହି ସାକ୍ଷାତକାର ହୋଇଥିବା ବେଳେ କେଜ୍ରିଓ୍ବାଲଙ୍କ ସହ ତାଙ୍କର ପୁରା ଟିମ୍ ଥିଲେ । ଦିଲ୍ଲୀରେ ପ୍ରଶାସନିକ ନିୟନ୍ତ୍ରଣ ପାଇଁ କେନ୍ଦ୍ର ସରକାର ଆଣିଥିବା ଅଧ୍ୟାଦେଶ ପ୍ରସଙ୍ଗରେ ଏହି ଆଲୋଚନା ହୋଇଛି ।
ଗତକାଲି (ବୁଧବାର) କେଜ୍ରିଓ୍ବାଲଙ୍କ ଟିମ୍ ଶିବସେନା (ଉଦ୍ଧବ ଗୋଷ୍ଠୀ) ମୁଖ୍ୟ ଉଦ୍ଧବ ଠାକରେଙ୍କୁ ସାକ୍ଷାତ କରି ଏହି ପ୍ରସଙ୍ଗରେ ଆଲୋଚନା କରିଥିଲା । ଏଥିରେ ଉଦ୍ଧବ ଠାକରେ କେଜ୍ରିଓ୍ବାଲଙ୍କୁ ସମର୍ଥନ ଜଣାଇଥିଲେ । ଉଦ୍ଧବ କହିଥିଲେ, ‘‘ଆମେ ସମସ୍ତେ ଦେଶର ସମ୍ବିଧାନ ରକ୍ଷା କରିବା ପାଇଁ ଏକାଠି ହୋଇଛୁ । ବିଜେପି ଗଣତନ୍ତ୍ର ଓ ସମ୍ବିଧାନ ବିରୋଧୀ କାର୍ଯ୍ୟ କରୁଛି । ବିଜେପିକୁ ହିଁ ପ୍ରକୃତ ବିରୋଧୀ ଦଳ ବୋଲି କହିବା ଠିକ ହେବ ।’’ ଗତକାଲି ପରି ଆଜି ମଧ୍ୟ ଶରଦଙ୍କ ସହ ଆଲୋଚନା ବେଳେ ଦଳର ବରିଷ୍ଠ ନେତା ତଥା ରାଜ୍ୟସଭା ସାଂସଦ ସଞ୍ଜୟ ସିଂ, ସାଂସଦ ରାଘବ ଚଡ୍ଡା, ଦିଲ୍ଲୀ ସରକାରରେ ମନ୍ତ୍ରୀ ଥିବା ଅତିଶି ପ୍ରମୁଖ କେଜ୍ରିଓ୍ବାଲଙ୍କ ସହ ଥିଲେ ।
