ନୂଆଦିଲ୍ଲୀ: ଯାନ୍ତ୍ରିକ ତୃଟି ଯୋଗୁଁ ପାକିସ୍ତାନର କରାଚିରେ ଜରୁରୀ କାଳୀନ ଅବତରଣ କଲା ଦିଲ୍ଲୀ-ଦୋହା ବିମାନ । ଆଜି ୧୦୦ ଜଣ ଯାତ୍ରୀଙ୍କୁ ନେଇ ଦିଲ୍ଲୀରୁ ଦୋହା ଅଭିମୁଖେ କତାର ଏୟାରଓ୍ବେ ଉଡାଣ ଆରମ୍ଭ କରିଥିଲା । କିନ୍ତୁ ଦୋହାରେ ପହଞ୍ଚିବା ପୂର୍ବରୁ ଅଧା ଆକାଶରେ ବିମାନର କାର୍ଗୋରୁ ଧୂଆଁ ବାହାରିଥିଲା । ଫଳରେ ସଙ୍ଗେ ସଙ୍ଗେ ବିମାନଟି ପାକିସ୍ତାନ କରାଚି ବିମାନ ବନ୍ଦରରେ ଅବତରଣ କରିଥିଲା । ଏନେଇ କତାର ଏୟାରଓ୍ବେଜ ଏକ ବିବୃତ୍ତି ଜାରି କରି ସୂଚନା ଦେଇଛି ।
ବିମାନରେ ଯାନ୍ତ୍ରିକ ତୃଟି ନେଇ ତଦନ୍ତ ଆରମ୍ଭ ହୋଇଥିବା କହିଛି କତାର ଏୟାରଓ୍ବେଜ । ଏଥି ସହ ବିମାନରେ ଯାତ୍ରା କରୁଥିବା ଯାତ୍ରୀଙ୍କୁ ଦୋହା ପଠାଇବା ପାଇଁ ସ୍ବତନ୍ତ୍ର ବିମାନର ବ୍ୟବସ୍ଥା ମଧ୍ୟ କରାଯାଇଥିବା ବିବୃତ୍ତିରେ ଉଲ୍ଲେଖ ରହିଛି ।
ସୂଚନା ଅନୁଯାୟୀ ଆଜି ସକାଳ ସମୟରେ ଦିଲ୍ଲୀରୁ ଦୋହା ଅଭିମୁଖେ ବିମାନ QR579 ଉଡାଣ ଆରମ୍ଭ କରିଥିଲା । କିଛି ସମୟ ପରେ କରାଚି ବିମାନ ବନ୍ଦରରେ ଏହା ଅବତରଣ କରିଥିଲା । ଯାତ୍ରୀମାନେ ନିରାପଦରେ ପହଞ୍ଚିବା ପରେ ସମସ୍ତ ସେବା ଯୋଗାଇ ଦିଆଯାଇଥିଲା। ଏଭଳି ଅସୁବିଧା ପାଇଁ ସମସ୍ତଙ୍କୁ କ୍ଷମା ମାଗିଛି କତାର ଏୟାରୱେଜ୍ ।
