ମୁମ୍ବାଇ: ଦେଶର ବାଣିଜ୍ୟିକ ରାଜଧାନୀ ମୁମ୍ବାଇର ଭିଲେ ପାର୍ଲ ଅଞ୍ଚଳରେ ସିଲିଣ୍ଡର ବିସ୍ଫୋରଣ । ଏହି ବିସ୍ଫୋରଣରେ ପାଞ୍ଚ ଜଣ ଆହତ ହୋଇଛନ୍ତି । ମଙ୍ଗଳବାର ସକାଳ 6 ଟାରେ ଏହି ଘଟଣା ୱେଷ୍ଟର୍ଣ୍ଣ ଏକ୍ସପ୍ରେସ ରାଜପଥ ନିକଟସ୍ଥ ନ୍ୟୁକଳପନା ଚାୱଲରେ ଘଟିଛି ।
ଏ ସମ୍ପର୍କରେ ବ୍ରୁହନମୁମ୍ବାଇ ନଗର ନିଗମ କହିଛି, ''ଦୁର୍ଘଟଣାରେ 27 ରୁ 45 ବର୍ଷ ବୟସର ପାଞ୍ଚ ଜଣ ଆହତ ହୋଇଛନ୍ତି। ସମସ୍ତ ଆହତଙ୍କୁ ନିକଟସ୍ଥ ଭି.ଏନ୍.ଦେଶାଇ ଡାକ୍ତରଖାନାରେ ଭର୍ତ୍ତି କରାଯାଇଛି। ବର୍ତ୍ତମାନ ଆହତଙ୍କ ଅବସ୍ଥା ସ୍ଥିର ଥିବା କୁହାଯାଉଛି। ତେବେ ଆହତମାନେ ହେଲେ ଜୟରାମ ୟାଦବ, ହରେ କୁମାର ରାଏ,ରାକେଶ କୁମାର ରାଏ, ଅରୁଣ କୁମାର ରାଏ ଏବଂ ଅମର ରାଏ ।
ତେବେ ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଏକ ପ୍ରକାରର ଭୟର ବାତାବରଣ ଖେଳିଯାଇଛି । ଏପରିକି ସ୍ଥାନୀୟ ବାସିନ୍ଦାଙ୍କୁ କିଛି ସମୟ ଯାଏଁ ଘରୁ ନବାହାରିବାକୁ କୁହାଯାଇଛି । କୌଣସି ବୈଦ୍ୟୁତିକ ଜିନିଷ ଅଧିକ ବ୍ୟବହାର ନକରିବାକୁ ପରାମର୍ଶ ଦିଆଯାଇଛି । ସେହିପରି ଛୋଟ ପିଲାଙ୍କୁ ମଧ୍ୟ ବାହାରକୁ ନବାହାରିବାକୁ କୁହାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
