ହାଇଦ୍ରାବାଦ: ଝାଡଖଣ୍ଡର ରାଞ୍ଚିରେ ଜଣେ ଆଦାବାସୀ ମହିଳାଙ୍କୁ ଗୁଳି କରି ହତ୍ୟା ଉଦ୍ୟମ । ଗୁଳିମାଡର ଶିକାର ହୋଇଥିବା ମହିଳା 2005ରେ ଝାଡଖଣ୍ଡ ପୋଲିସ୍ ଆଇଜି ପି.ଏସ ନଟରାଜନଙ୍କ ବିରୋଧରେ ଯୌନ ଶୋଷଣ ଅଭିଯୋଗ ସହ ମାମଲା ଦାୟର କରିଥିଲେ । ମହିଳାଙ୍କ ନାମ ସୁଷମା ବାରାଇକ ବୋଲି ଜଣାପଡିଛି (Criminals shot Sushma Baraik in ranchi)। ରାଞ୍ଚି ସହରର ଏକ ବ୍ୟସ୍ତବହୁଳ ଆର୍ଗୋରା ପୋଲିସ ଷ୍ଟେସନ ଅଞ୍ଚଳର ସାହାଜାନନ୍ଦ ଏରିଆରେ ଏହି ଗୁଳିକାଣ୍ଡ ହୋଇଛି । ଏଥିରେ ମହିଳାଜଣଙ୍କ ଗୁରୁତର ହୋଇଛନ୍ତି । ତାଙ୍କୁ ଉଦ୍ଧାର କରି ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି ।
ତେବେ ଅନ୍ୟ ଏକ ସୂଚନା ଅନୁସାରେ, ମହିଳାଜଣଙ୍କ ପୋଲିସ ଅଧିକାରୀଙ୍କ ବିରୋଧରେ 2005 ମସିହାରେ ଦାଏର କରିଥିବା ଯୌନ ଶୋଷଣ ମାମଲାର ଶୁଣାଣି ଗତକାଲି (ମଙ୍ଗଳବାର) ହାଇକୋର୍ଟରେ ହେବାର ଥିଲା । ଏହାର କିଛି ଘଣ୍ଟା ପୂର୍ବରୁ ସକାଳେ ତାଙ୍କୁ ସ୍ପଷ୍ଟ ଦିବାଲୋକରେ ରାସ୍ତା ଉପରେ ଗୁଳି କରି ହତ୍ୟା କରିବା ପାଇଁ ଉଦ୍ୟମ କରାଯାଇଛି । ଏପରି ସ୍ଥଳେ ମାମଲା ସହ ଏହି ଗୁଳିକାଣ୍ଡର ସମ୍ପର୍କ ଥିବା ମଧ୍ୟ ସନ୍ଦେହ କରାଯାଉଛି ।
ପୋଲିସ ଅଧିକାରୀଙ୍କ ବିରୋଧରେ ମାମଲା ଲଢୁଥିବା ସୁଷମାଙ୍କୁ ମଧ୍ୟ ଜଣେ ଅଙ୍ଗରକ୍ଷୀ ମଧ୍ୟ ଦିଆଯାଇଥିଲା । ହେଲେ ଏହା ସତ୍ତ୍ବେ ମଧ୍ୟ ତାଙ୍କୁ ଗୁଳି ଚଳାଇ ଘଟଣାସ୍ଥଳରୁ ଫେରାର ହେବାରେ ଅଭିଯୁକ୍ତ ସଫଳ ହୋଇଛନ୍ତି । ଘଟଣା ସମ୍ପର୍କରେ ହାଟିଆ ଡିଏସପି ରାଜା ମିଶ୍ରା କହିଛନ୍ତି, ସୁଷମା ନିଜ ଅଙ୍ଗରକ୍ଷୀଙ୍କ ସହିତ ଏକ ବାଇକରେ ଯାଉଥିଲେ । ଏହି ସମୟରେ ତିନିଜଣ ଅପରାଧୀ ପଛରୁ ଆସି ଗୁଳି ଚଳାଇବା ଆରମ୍ଭ କରିଥିଲେ । ବାଇକ୍ ପଛରେ ବସିଥିବା ସୁଷମାଙ୍କ ଦେହରେ ଏକାଧିକ ଗୁଳି ଲାଗିଥିଲା । ତାଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରାଯାଇଛି । ଘଟଣାରେ ଏକ ମାମଲା ରୁଜୁ ହୋଇ ତଦନ୍ତ ମଧ୍ୟ ଆରମ୍ଭ ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
