ହାଇଦ୍ରାବାଦ: ଲାଲଗଡ ଭାବେ ସମଗ୍ର ଦେଶରେ କୁଖ୍ୟାତି ଅର୍ଜନ କରିଥିବା ଛତିଶଗଡ ବିଜାପୁରରେ ପୁଣି ଥରେ ଲାଲବାହିନୀ ତାର ଉପସ୍ଥିତି ଜାହିର କରିଛି । ଡିସେମ୍ବର 24ରେ ଅପହରଣର ଶିକାର ହୋଇଥିବା 4ଜଣ କଣ୍ଟ୍ରାକ୍ଟରଙ୍କୁ ଗତ ଦୁଇ ଦିନ ମଧ୍ୟରେ ମୁକ୍ତ କରିଛି ଲାଲ ବାହିନୀ(Naxalites released kidnapped contractors) । 24 ତାରିଖରେ ଏହି 4 ଠିକାଦାରଙ୍କୁ ନକ୍ସଲ ଉଠାଇ ନେଇଥିଲେ । ଗତକାଲି 2ଜଣଙ୍କୁ ମୁକ୍ତ କରିଦେଇଥିବା ବେଳେ ଆଜି (ବୁଧବାର) ଅବଶିଷ୍ଟ ଦୁଇ ଜଣ ଠିକାଦାରଙ୍କୁ ସୁରକ୍ଷିତ ମୁକ୍ତ କରିଛନ୍ତି ନକ୍ସଲ ।
ଅପହରଣ ପରେ ଏମାନଙ୍କୁ ନକ୍ସଲ କ୍ୟାମ୍ପରେ ରଖାଯାଇଥିଲା । ଜଙ୍ଗଲ ମଧ୍ୟରେ 11 ଦିନ ଧରି ବାରମ୍ବାର ସ୍ଥାନ ମଧ୍ୟ ପରିବର୍ତ୍ତନ କରାଯାଇଥିଲା । ଦୀର୍ଘ ଦିନ ଧରି ଅପହୃତ ଠିକାଦାରମାନେ ଲାଲ କ୍ୟାମ୍ପରେ ରହିବା ପରେ ସୁରକ୍ଷିତ ମୁକ୍ତ ହୋଇଛନ୍ତି । ଗତକାଲି(3 ତାରିଖ)ରେ ଅପହୃତ ଠିକାଦାର କୋଣ୍ଡାଗାଓଁ ବାସିନ୍ଦା ନିମେନ୍ଦ୍ର କୁମାର ଦେୱାନ ଏବଂ ନୀଲଚାନ୍ଦ ନାଗଙ୍କୁ ଏକ ନାଟକୀୟ ଘଟଣାରେ ମୁକ୍ତ କରିଥିଲା ଲାଲ ବାହିନୀ । ସେହିପରି ଆଜି ଆଉ ଦୁଇ ଜଣ ଠିକାଦାର ଟେମୁରୁ ନାଗ ଓ ଚାପଡି ବେତାୟଙ୍କୁ ମୁକ୍ତ କରାଯାଇଛି (Naxalites released kidnapped contractors) ।
ଅପହରଣ ପରେ ପରିବାର ସଦସ୍ୟଙ୍କୁ ଲାଲ କ୍ୟାମ୍ପରେ ଥିବା ଠିକାଦାରଙ୍କ ସହ ଯୋଗାଯୋଗ କରିବାକୁ କୌଣସି ସୁଯୋଗ ଦେଇନଥିଲେ ନକ୍ସଲ । ସମସ୍ତ ଅପହୃତଙ୍କ ପରିବାର ସଦସ୍ୟ ସେମାନଙ୍କୁ ଛାଡି ଦେବା ପାଇଁ ନକ୍ସଲଙ୍କ ନିକଟରେ ନିବେଦନ ମଧ୍ୟ କରିଥିଲେ । ତେବେ ଘଟଣାର 11 ଦିନ ପରେ ନାଟକୀୟ ଢଙ୍ଗରେ ସମସ୍ତ ଅପହୃତଙ୍କୁ ମୁକ୍ତ କରାଯାଇଛି । ଅପହରଣକୁ ଦୀର୍ଘ 11 ଦିନ ବିତିବା ପରେ ଅପହୃତମାନେ ମୁକ୍ତ ହୋଇଥିଲେ ସୁଦ୍ଧା ଗୁଇନ୍ଦା ବିଭାଗ କିମ୍ବା ପୋଲିସ କୌଣସି ସୁରାକ ପାଇନଥିଲା । ବିଜାପୁରରେ କ୍ରମାଗତ ନକ୍ସଲ ବିରୋଧୀ ଅପରେସନ ଜାରି ରହିଥିଲେ ସୁଦ୍ଧା ଲାଲବାହିନୀର ଅସ୍ତିତ୍ବକୁ ପୋଲିସ ପ୍ରଶାସନ ମୂଳୋତ୍ପାଟନ କରିବାରେ ସଫଳତା ପାଇନି ।
ବ୍ୟୁରୋ ରିପୋର୍ଟ, ଇଟିଭି ଭାରତ
