ନୂଆଦିଲ୍ଲୀ: ଇଂରାଜୀରେ ପାଣ୍ଡିତ୍ୟ ଅର୍ଜନ କରିଥିବା ବରିଷ୍ଠ କଂଗ୍ରେସ ନେତା ଶଶି ଥରୁର ଅନେକ ଥର ସୋସିଆଲ ମିଡିଆରେ ସେୟାର କରିଛନ୍ତି ଅପ୍ରଚଳିତ ଶବ୍ଦ । ଆଉ ଶଶିଙ୍କ ଶବ୍ଦକୁ ନେଇ ଆରମ୍ଭ ହୋଇଯାଏ ତର୍କ ବିତର୍କ । ଶୁକ୍ରବାର ଟ୍ବିଟରରେ ଫ୍ଲୋସିନାଉସିନିହିଲିପିଲିଫିକେସନ୍(floccinaucinihilipilification) ଶବ୍ଦର ପ୍ରୟୋଗ କରିଛନ୍ତି ଶଶି ଥରୁର । ଯାହାକୁ ନେଇ ଆରମ୍ଭ ହୋଇଛି ଚର୍ଚ୍ଚା ।
ଲୋକସଭା ସାଂସଦ ଶଶି ଥରୁର ତେଲେଙ୍ଗାନା ରାଷ୍ଟ୍ର ସମିତିର କାର୍ଯ୍ୟକାରୀ ଅଧ୍ୟକ୍ଷ କେଟି ରାମାରାୱଙ୍କ ସହ ବନ୍ଧୁତ୍ବପୂର୍ଣ୍ଣ ଆଲୋଚନା ସମୟରେ ଏହି ଶବ୍ଦର ପ୍ରୟୋଗ କରିଛନ୍ତି । ରାୱଙ୍କ କହିବାନୁଯାୟୀ, କୋରୋନା ଭାଇରସର ସଂକ୍ରମଣ ଉପଚାର ପାଇଁ ଉପଯୋଗରେ ଅଣାଯାଉଥିବା ଔଷଧର ନାଁ ବହୁତ କଠିନ । ଏହାର ଉଚ୍ଚାରଣ ସହଜ ହୋଇନଥାଏ ।
ଏହାପରେ ରାୱଙ୍କ ଟ୍ବିଟକୁ ରିଟ୍ବିଟ କରି ଥରୁର ଲେଖିଛନ୍ତି, 'ଫ୍ଲୋସିନାଉସିନିହିଲିପିଲିଫିକେସନ୍' । ଅକ୍ସଫୋର୍ଡ ଶବ୍ଦକୋଷ ଅନୁଯାୟୀ, ଏହି ଶବ୍ଦର ଅର୍ଥ ବ୍ୟର୍ଥ ଜିନିଷରେ ବିଚାର କରିବାର ଅଭ୍ୟାସ । ଏହି ଶବ୍ଦର ପ୍ରୟୋଗ ପରେ ଏହାର ଅର୍ଥକୁ ନେଇ ଅନେକ ଟ୍ବିଟର ୟୁଜର୍ସଙ୍କ ମଧ୍ୟରେ ବିତର୍କ ଆରମ୍ଭ ହୋଇଯାଇଛି ।
