ତେଜପୁର: ଦେଶର 4 ରାଜ୍ୟ ଓ ଗୋଟିଏ କେନ୍ଦ୍ରଶାସିତ ଅଞ୍ଚଳରେ ଘୋଷଣା ହୋଇସାରିଛି ବିଧାନସଭା ନିର୍ବାଚନ ତାରିଖ । ଏହି ନିର୍ବାଚନ କଂଗ୍ରେସ ପାଇଁ ଡେଡ ଲାଇନ ବୋଲି କୁହାଯାଇପାରେ । ଦଳରେ ନେତୃତ୍ବ ସଙ୍କଟ ମଧ୍ୟରେ ଅଗ୍ନି ପରୀକ୍ଷାରେ ପାସ ହେବାକୁ ଆପ୍ରାଣ ଚେଷ୍ଟା ଜାରି ରଖିଛି ଗାନ୍ଧୀ ପରିବାର ।
ବିଧାନସଭା ନିର୍ବାଚନରେ କଂଗ୍ରେସକୁ ସଫଳତା ମିଳିବାର ଆଶା କ୍ଷୀଣ ରହିଛି । ଏହାରି ମଧ୍ୟରେ ଭାଇ ରାହୁଲ ଗାନ୍ଧୀଙ୍କ ଫୋକସରେ ଦକ୍ଷିଣ ଭାରତ ରହିଥିବା ବେଳେ ଏପଟ ଆସାମରେ ଆଶାର କିରଣ ଖୋଜିବାରେ ଲାଗିଛନ୍ତି ଭଉଣୀ ପ୍ରିୟଙ୍କା ଗାନ୍ଧୀ । ଏହିକ୍ରମରେ ପ୍ରିୟଙ୍କା ଆସାମ ଗସ୍ତରେ ଯାଇ ତେଜପୁରରେ ପହଞ୍ଚିଛନ୍ତି । ତେଜପୁରର ଏକ ରାଲିରେ ପ୍ରିୟଙ୍କାଙ୍କୁ ଦୌଡୁଥିବାର ଦେଖିବାକୁ ମିଳିଛି । ରାଲିରେ ପହଞ୍ଚିବା ବିଳମ୍ବ ହେବାରୁ ସେ ମଞ୍ଚ ଆଡକୁ ଦୌଡି ଡୌଡି ପହଞ୍ଚିଛନ୍ତି ।
ସେପଟେ ଭାଇ ରାହୁଲ ଦକ୍ଷିଣ ଭାରତ ଗସ୍ତରେ ଯାଇ କେତେବେଳେ ସମୁଦ୍ରକୁ ଡେଇଁ ପହଁରୁଛନ୍ତି ତ ଆଉ କେତେବେଳେ ଛାତ୍ରଛାତ୍ରୀଙ୍କ ସହ ମିଶି ପୁସଅପ ମାରି ଫିଟନେସର ଫଣ୍ଡା ବାଣ୍ଟୁଛନ୍ତି । ତେବେ ଆଗାମୀ ଦିନରେ ଉଭୟ ଭାଇ ଭଉଣୀଙ୍କ କଠିନ ପରିଶ୍ରମ କଂଗ୍ରେସକୁ ବିଜୟ ଦେବ ନା ପୂନର୍ବାର ଅଗ୍ନିପରୀକ୍ଷାରେ ପରାଜୟର ସାମ୍ନା କରିବାକୁ ପଡିବ ତାହା ସମୟ କହିବ ।
