ଚଣ୍ଡିଗଡ: ଆଜି ବିବାହ କରିବେ ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନ । ଚଣ୍ଡିଗଡ଼ ସ୍ଥିତ ତାଙ୍କ ବାସଭବନରେ ଡ ଗୁରୁପ୍ରିତ କୌରଙ୍କୁ ବିବାହ କରିବେ ଭଗବନ୍ତ । ପୂର୍ବରୁ ଥରେ ବିବାହ କରିଥିବା ବେଳେ ଏହା ତାଙ୍କର ଦ୍ବିତୀୟ ବିବାହ । ପ୍ରାୟ 6 ବର୍ଷ ତଳେ ମୁଖ୍ୟମନ୍ତ୍ରୀ ମାନଙ୍କର ଛାଡପତ୍ର ହୋଇଥିଲା । ଏବେ ପୁଣି ଥରେ ସେ ବିବାହ ବନ୍ଧନରେ ବାନ୍ଧି ହେବାକୁ ଯାଉଛନ୍ତି । ଆଜି ତାଙ୍କ ବାସଭବନରେ ବିବାହ ଉତ୍ସବ ଅନୁଷ୍ଠିତ ହେବ ।
ଡ ଗୁରୁପ୍ରିତ କୌର କିଏ ?
ପଞ୍ଜାବ ମୁଖ୍ୟମନ୍ତ୍ରୀଙ୍କ ସହ ହାତ ଗଣ୍ଠି ପଡିବାକୁ ଥିବା ଡ ଗୁରୁପ୍ରିତ କୌର ହେଉଛନ୍ତି ହରିୟାଣାର ପେହୋଓ୍ବାର ବାସିନ୍ଦା । ବର୍ତ୍ତମାନ ତାଙ୍କ ପରିବାର ମୋହାଲିରେ ରହୁଛନ୍ତି । ତାଙ୍କ ପିତାଙ୍କ ନା ଇନ୍ଦ୍ରଜିତ ସିଂ, ଯିଏ ସ୍ଥାନୀୟ ଗ୍ରାମପଞ୍ଚାୟତର କ୍ରମାଗତ ଭାବେ ସରପଞ୍ଚ ରହିଆସିଛନ୍ତି । ଗୁରୁପ୍ରୀତଙ୍କ ବୟସ ୩୨ ହୋଇଥିବା ବେଳେ ମାନଙ୍କ ବୟସ ୪୮ । ତାଙ୍କର ତିନି ଭଉଣୀ ରହିଥିବା ବେଳେ ୨ ଜଣଙ୍କର ବିବାହ ହୋଇସାରିଛି । ଗୁରୁପ୍ରୀତ ଅମ୍ବାଲାର ମେଡିକାଲ କଲେଜରେ ଡାକ୍ତରୀ ପଢିଥିଲେ ।
ଭଗବନ୍ତ ମାନଙ୍କ ସହ ଗୁରୁପ୍ରିତ କୌରଙ୍କ ସାକ୍ଷାତ
ଗୁରୁପ୍ରିତ କୌର ଭଗବନ୍ତ ମାନଙ୍କ ମା’ ଓ ଭଉଣୀଙ୍କ ଅତି ନିକଟତର । ୨୦୧୯ରେ ଭଗବନ୍ତ ମାନଙ୍କ ସହ ଗୁରୁପ୍ରୀତ କୌରଙ୍କ ସାକ୍ଷାତ ହୋଇଥିଲା। ଏହାପରେ ଗୁରୁପ୍ରୀତ ମାନଙ୍କୁ ପସନ୍ଦ କରିଥିଲେ ।
ମାନଙ୍କ ଦ୍ବିତୀୟ ବିବାହ
ଏହା ହେଉଛି ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କର ଦ୍ୱିତୀୟ ବିବାହ। ୬ ବର୍ଷ ପୂର୍ବେ ତାଙ୍କ ପ୍ରଥମ ସ୍ତ୍ରୀଙ୍କୁ ସେ ଛାଡପତ୍ର ଦେଇଥିଲେ । ତାଙ୍କର ପ୍ରଥମ ସ୍ତ୍ରୀ ଥିଲେ ଇନ୍ଦ୍ରାବତୀ କୌର, ତାଙ୍କୁ ଗୋଟିଏ ପୁଅ ଓ ଝିଅ ମଧ୍ୟ ରହିଛନ୍ତି । ଉଭୟ ଆମେରିକାରେ ପାଠ ପଢୁଛନ୍ତି । ଯେତେବେଳେ ଭଗୱନ୍ତ ମାନ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ, ସେତେବେଳେ ଦୁହେଁ ପିତାଙ୍କୁ ଭେଟିବା ପାଇଁ ଶପଥ ଗ୍ରହଣ ସମାରୋହରେ ଯୋଗ ଦେଇଥିଲେ ।
