ଚଣ୍ଡିଗଡ: ଚଣ୍ଡିଗଡ ମହାନଗର ନିଗମ ନିର୍ବାଚନ ଫଳାଫଳ ଘୋଷଣା ହୋଇଛି । ଏଥିରେ ଚଳିତ ଥର ନୂଆ କରି ମୈଦାନକୁ ଓହ୍ଲାଇଥିବା ଆପ ଆଦମୀ ପାର୍ଟି (AAP) ଭଲ ପ୍ରଦର୍ଶନ କରି ରେକର୍ଡ କରିଛି । ମୋଟ ୩୫ଟି ଆସନ ମଧ୍ୟରୁ ଆପ ୧୪ଟି ଆସନ ଜିତିଥିବା ବେଳେ ବେଜେପି ୧୨ ଆସନ ଜିତି ଆପ ଠାରୁ ପଛରେ ତଥା ଦ୍ବିତୀୟ ସ୍ଥାନରେ ରହିଛି ।
ସେହିପରି ପଞ୍ଜାବରେ କ୍ଷମତାରେ ଥିବା କଂଗ୍ରେସ ମାତ୍ର ୮ଟି ଓ୍ବାର୍ଡରେ ବିଜୟୀ ହୋଇଥିବା ବେଳେ ଶିରୋମଣୀ ଅକାଳି ଦଳ ମାତ୍ର ଗୋଟିଏ ଆସନ ହାତେଇବାରେ ସଫଳ ହୋଇଥିବା ରାଜ୍ୟ ନିର୍ବାଚନ କମିଶନ ପକ୍ଷରୁ ସୂଚନା ମିଳିଛି ।
ବର୍ତ୍ତମାନର ମେୟର ତଥା ବିଜେପି ପ୍ରାର୍ଥୀ ରବି କୁମାର ଶର୍ମା ଆମ ଆଦମୀ ପ୍ରାର୍ଥୀଙ୍କ ଠାରୁ ପରାଜିତ ହୋଇଛନ୍ତି । ଗତ ୨୪ ତାରିଖରେ ଚଣ୍ଡିଗଡ ମହାନଗର ନିଗମ ଅନ୍ତର୍ଗତ ସମସ୍ତ ୩୫ ଓ୍ବାର୍ଡରେ ମତଦାନ ହୋଇଥିଲା । ତେବେ ଆଜି ମତ ଗଣନା ସହ ଫଳ ମଧ୍ୟ ପ୍ରକାଶ ପାଇଛି ।
ପ୍ରଥମ କରି ଚଣ୍ଡିଗଡ ମହାନଦଗର ନିଗନ ନିର୍ବାଚନୀ ମୈଦାନରେ ଅଂଶ ଗ୍ରହଣ କରିଥିବା ଆପ ଏପରି ବିଜୟ ପରେ ଉତ୍ସାହିତ ନଜର ଆସିଛି । ଦଳ ମୁଖ୍ୟ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଏହି ବିଜୟକୁ ପରିବର୍ତ୍ତନର ସଙ୍କେତ ବୋଲି କହିଛନ୍ତି । ଆସନ୍ତା ବର୍ଷ ପଞ୍ଜାବରେ ବିଧାନସଭା ନିର୍ବାଚନ ହେବାକୁ ଯାଉଥିବା ବେଳେ ଏହି ଫଳାଫଳ ଦ୍ବାରା ପଞ୍ଜାବବାସୀ ପରିବର୍ତ୍ତନ ଚାହୁଁଥିବା ସ୍ପଷ୍ଟ ଦୃଶ୍ୟମାନ ବୋଲି କହିଛନ୍ତି କେଜ୍ରିଓ୍ବାଲ ।
ବିଜୟୀ ପ୍ରାର୍ଥୀଙ୍କୁ ଶୁଭେଚ୍ଛା ଜଣାଇବା ସହ ପଞ୍ଜାବବାସୀଙ୍କୁ ମଧ୍ୟ ଧନ୍ୟବାଦ ଜଣାଇଛନ୍ତି କେଜ୍ରିଓ୍ବାଲ ।
ବ୍ୟୁରୋ ରିପୋର୍ଟ, ଇଟିଭି ଭାରତ
