ନୂଆଦିଲ୍ଲୀ: ମନି ଲାଣ୍ଡରିଂ ମାମଲାରେ ଗିରଫ ହୋଇଥିବା ଦିଲ୍ଲୀ ସ୍ବାସ୍ଥ୍ୟମନ୍ତ୍ରୀ ସତ୍ୟେନ୍ଦ୍ର ଜୈନଙ୍କୁ ଜେଲରେ ଦିଆଯାଉଥିବା ସୁବିଧା ସମ୍ପର୍କରେ କେନ୍ଦ୍ର ଗୃହ ମନ୍ତ୍ରାଳୟ ଏକ ରିପୋର୍ଟ ମାଗିଛନ୍ତି । ଏନେଇ ଦିଲ୍ଲୀ ମୁଖ୍ୟ ସଚିବଙ୍କୁ ରିପୋର୍ଟ ଦେବାକୁ କୁହାଯାଇଛି । ପୂର୍ବରୁ ସତ୍ୟେନ୍ଦ୍ର ନିଜ କ୍ଷମତାର ଦୁରୁପଯୋଗ କରି ଜେଲରେ ବିଭିନ୍ନ ସୁବିଧା ପାଉଥିବା ନେଇ ପ୍ରବର୍ତ୍ତନ ନିର୍ଦ୍ଦେଶାଳୟ କୋର୍ଟଙ୍କୁ ଜଣାଇଥିଲା । ଇଡି କୋର୍ଟରେ ଏକ ଭିଡ଼ିଓ ଜାରି କରି କହିଥିଲା, ତିହାର ଜେଲରେ ସତ୍ୟେନ୍ଦ୍ର ଜୈନଙ୍କୁ ମାଲିସ ସେବା ଯୋଗାଇ ଦିଆଯାଉଛି। ବିଭିନ୍ନ ସମୟରେ ହେଡ ମସାଜ, ପାଦ ମସାଜ ଏବଂ ବ୍ୟାକ ମସାଜ ଭଳି ସୁବିଧା ଦିଆଯାଉଛି ।
ସତ୍ୟେନ୍ଦ୍ରଙ୍କ ସହ ଜେଲ ଅଧିକ୍ଷକ ମିଶି ଜେଲ ନିୟମର ଉଲ୍ଲଂଘନ କରିଥିବା ଇଡି ଅଭିଯୋଗ କରିଛି । ନିକଟରେ ବିଜେପି ସାଂସଦ ମନୋଜ ତିୱାରି ମନ୍ତ୍ରୀ ସତ୍ୟେନ୍ଦ୍ର ଜୈନଙ୍କ ବିରୋଧରେ ସଙ୍ଗୀନ ଅଭିଯୋଗ ଆଣିଥିଲେ । ତାଙ୍କ ଅଭିଯୋଗ ଅନୁଯାୟୀ, "ତିହାର ଜେଲରେ ସେ ନିଜ କ୍ଷମତାର ଦୁରୁପଯୋଗ କରି ସାଥି ଅଭିଯୁକ୍ତ ଏବଂ ସାକ୍ଷୀଙ୍କୁ ଭେଟିଛନ୍ତି । ସେମାନଙ୍କୁ ଜେଲରେ ସମସ୍ତ ପ୍ରକାର ସୁବିଧା ଯୋଗାଇ ଦିଆଯାଉଛି । ଆଉ ଏହି ସବୁ ଘଟଣା ସିସିଟିଭିରେ କଏଦ ହୋଇଛି ।" ଜେଲ କର୍ତ୍ତୃପକ୍ଷଙ୍କ ସହଯୋଗ ବିନା ଏହା ସମ୍ଭବ ନୁହେଁ ବୋଲି ବିଜେପି କହିଛି । ତେଣୁ ସମ୍ପୃକ୍ତ ଥିବା ଜେଲ୍ କର୍ମଚାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଦାବି ହୋଇଛି ।
ଏହା ମଧ୍ୟ ପଢ଼ନ୍ତୁ: ହସ୍ପିଟାଲରେ ଦିଲ୍ଲୀ ସ୍ବାସ୍ଥ୍ୟମନ୍ତ୍ରୀ ସତ୍ୟେନ୍ଦ୍ର ଜୈନ
ଅନ୍ୟପଟେ ବିଜେପି ନେତା ଆଦେଶ ଗୁପ୍ତା କହିଛନ୍ତି, ସତ୍ୟେନ୍ଦ୍ର ଜୈନ ଏବେବି ଦିଲ୍ଲୀ ସରକାରଙ୍କ ମନ୍ତ୍ରୀମଣ୍ଡଳରେ ରହିଛନ୍ତି । ମେ 30 ତାରିଖରେ ଗିରଫ ହେବା ପୂର୍ବରୁ ସ୍ବାସ୍ଥ୍ୟ ବିଭାଗ ସମେତ ଜେଲ ବିଭାଗ ତାଙ୍କ ଅଧିନରେ ଥିଲା । ତେଣୁ ଜେଲ ଅଧିକାରୀଙ୍କ ସହ ପୂର୍ବରୁ ତାଙ୍କ ସମ୍ପର୍କ ରହିଛି । ଯାହାର ବର୍ତ୍ତମାନ ସେ ଲାଭ ଉଠାଉଛନ୍ତି । ପୂର୍ବରୁ ମଧ୍ୟ ସତ୍ୟେନ୍ଦ୍ର କ୍ଷମତାର ଅପବ୍ୟବହାର କରିଆସୁଛନ୍ତି । ସେହିପରି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ତାଙ୍କୁ ମନ୍ତ୍ରୀ ମଣ୍ଡଳରୁ ହଟାଇନଥିବା ନେଇ ମନୋଜ ତିୱାରି ପ୍ରଶ୍ନ ଉଠାଇଛନ୍ତି । କେଜ୍ରିୱାଲ ଜାଣିଶୁଣି କ୍ୟାବିନେଟରୁ ହଠାଉନାହାନ୍ତି । ଫଳରେ ସେ ଜେଲରେ ବେଆଇନ ଭାବେ କ୍ଷମତାର ଅପବ୍ୟବହାର କରୁଥିବା ମନୋଜ କହିଛନ୍ତି ।
