ନୂଆଦିଲ୍ଲୀ: କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (CBSE)ର ଦ୍ବିତୀୟ ଟର୍ମ ପରୀକ୍ଷା ନେଇ ବିଜ୍ଞପ୍ତି ଜାରି ହୋଇଛି । ବୋର୍ଡ ଦ୍ବାରା ଜାରି ବିଜ୍ଞପ୍ତି ଅନୁଯାୟୀ ଦ୍ୱିତୀୟ ପର୍ଯ୍ୟାୟ ପରୀକ୍ଷା 26 ଏପ୍ରିଲରୁ ଆରମ୍ଭ ହେବ । ବର୍ତ୍ତମାନ ସମ୍ପୂର୍ଣ୍ଣ ତାରିଖ କାର୍ଯ୍ୟସୂଚୀ ଜାରି ହୋଇ ନଥିବା ବେଳେ ଏହା ମଧ୍ୟ ଖୁବଶୀଘ୍ର ପ୍ରକାଶ ପାଇବ । ସେହିପରି ପରୀକ୍ଷା ଅଫଲାଇନ ମୋଡରେ ହେବା ନେଇ ସ୍ପଷ୍ଟ କରିଛନ୍ତି ବୋର୍ଡ କର୍ତ୍ତୃପକ୍ଷ ।
ଜାରି ବିଜ୍ଞପ୍ତିରେ କୁହାଯାଇଛି ଯେ ଦଶମ ଏବଂ ଦ୍ୱାଦଶ ଶ୍ରେଣୀ ପରୀକ୍ଷା ପାଇଁ ଖୁବଶୀଘ୍ର ତାରିଖ ଚୂଡାନ୍ତ ହେବ ଏବଂ ଛାତ୍ରଛାତ୍ରୀ ବୋର୍ଡର ଅଫିସିଆଲ ୱେବସାଇଟ www.cbse.nic.in ରେ ପରବର୍ତ୍ତୀ ସମୟରେ ଏନେଇ ସୂଚନା ପାଇପାରିବେ । ସେହିପରି ସାମାଜିକ ଗଣମାଧ୍ୟରେ ପରୀକ୍ଷା ସମ୍ପର୍କିତ କୌଣସି ତଥ୍ୟ ପ୍ରଘଟ କରାଗଲେ ତାକୁ ବିଶ୍ବାସ ନକରିବା ପାଇଁ ମଧ୍ୟ ବୋର୍ଡ ଛାତ୍ରଛାତ୍ରୀଙ୍କୁ ପରାମର୍ଶ ଦେଇଛି ।
ଏଥିସହିତ ବୋର୍ଡର ପରୀକ୍ଷା ନିୟନ୍ତ୍ରକ ଡ.ସଂୟମ ଭରଦ୍ୱାଜ କହିଛନ୍ତି, ପରୀକ୍ଷା କୋଭିଡ ପ୍ରୋଟୋକଲ ଅନୁପାଳନ ସହ ଅଫଲାଇନରେ ପରୀକ୍ଷା ହେବ । ସେହିପରି ପରୀକ୍ଷାରେ ଆସିବାକୁ ଥିବା ପ୍ରଶ୍ନପତ୍ର ସମ୍ପର୍କରେ ଭରଦ୍ବାଜ କହିଛନ୍ତି ଯେ, ବୋର୍ଡର ଅଫସିଆଲ ଓ୍ବେବସାଇଟରେ ଉପଲବ୍ଧ ଥିବା ପ୍ରଥମ ପର୍ଯ୍ୟାୟ ପରୀକ୍ଷାର ପ୍ରଶ୍ନପତ୍ର ନମୂନା ଢାଞ୍ଚାରେ ଚଳିତ ପ୍ରଶ୍ନପତ୍ର ପ୍ରସ୍ତୁତ ହେବ । ଆବଶ୍ୟକ ହେଲେ ଛାତ୍ରଛାତ୍ରୀ ଉକ୍ତ ନମୂନାକୁ ଅନୁଧ୍ୟାନକୁ ନେଇପାରନ୍ତି । ନଭେମ୍ବର-ଡିସେମ୍ବର ମାସରେ ପ୍ରଥମ ପର୍ଯ୍ୟାୟ ପରୀକ୍ଷା ଶେଷ କରିଥିଲା ବୋର୍ଡ ।
ବ୍ୟୁରୋ ରିପୋର୍ଟ, ଇଟିଭି ଭାରତ
