ନୂଆଦିଲ୍ଲୀ: କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ(CBSE) ମୂଲ୍ୟାଙ୍କନ ଫର୍ମୁଲାକୁ ନେଇ ସନ୍ତୁଷ୍ଟ ନାହାଁନ୍ତି ଦଶମ ଓ ଦ୍ବାଦଶ ଶ୍ରେଣୀର ଅନେକ ଛାତ୍ରଛାତ୍ରୀ । ତେବେ ଏହି ଛାତ୍ରଛାତ୍ରୀଙ୍କୁ ଅଗଷ୍ଟରେ ଲିଖିତ ପରୀକ୍ଷା ଦେବାର ସୁଯୋଗ ଦେବ ସିବିଏସଇ । ଏନେଇ ଶୁକ୍ରବାର ଟ୍ବିଟ କରି ସୂଚନା ଦେଇଛନ୍ତି କେନ୍ଦ୍ର ଶିକ୍ଷା ମନ୍ତ୍ରୀ ରମେଶ ପୋଖରିୟାଲ ନିଶଙ୍କ ।
ଶିକ୍ଷାମନ୍ତ୍ରୀ କହିଛନ୍ତି, ଦଶମ ଓ ଦ୍ବାଦଶ ଶ୍ରେଣୀର ଯେଉଁ ଛାତ୍ରଛାତ୍ରୀ ସିବିଏସଇ ମୂଲ୍ୟାଙ୍କନରେ ସନ୍ତୁଷ୍ଟ ନାହାଁନ୍ତି ସେମାନଙ୍କୁ ଚିନ୍ତା କରିବାର ଆବଶ୍ୟକ ନାହିଁ । ଅଗଷ୍ଟରେ ଲିଖିତ ପରୀକ୍ଷା ପାଇଁ ବ୍ୟବସ୍ଥା କରାଯିବ ।
ପୂର୍ବରୁ ସିବିଏସଇ ସ୍ପଷ୍ଟ କରିସାରିଛି ଯେ ଯେଉଁ ଛାତ୍ରଛାତ୍ରୀ ଲିଖିତ ପରୀକ୍ଷାର ବିକଳ୍ପ ଚୟନ କରିବେ ଏଥିରେ ମିଳିବାକୁ ଥିବା ମାର୍କକୁ ମାନିବାକୁପଡିବ । ଲିଖିତ ପରୀକ୍ଷା ଦେବାକୁଥିବା ଛାତ୍ରଛାତ୍ରୀ ମୂଲ୍ୟାଙ୍କନ ଫର୍ମୁଲା ଆଧାରରେ ଦିଆଯାଇଥିବା ମାର୍କକୁ ପୁନର୍ବାର ଦେବାର ଦାବି କରିପାରିବେନି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନିଷ୍ପତ୍ତି ପରେ ସିବିଏସଇ ଦ୍ବାଦଶ ବୋର୍ଡ ପରୀକ୍ଷାକୁ ବାତିଲ କରିଦେଇଛି । ମହାମାରୀ ସଂକ୍ରମଣର ଦ୍ବିତୀୟ ଲହରୀ ବୃଦ୍ଧିକୁ ଦୃଷ୍ଟିରେ ରଖି ବିଭିନ୍ନ ମହଲରୁ ପରୀକ୍ଷା ବାତିଲ ପାଇଁ ଦାବି ହୋଇଥିଲା ।
