କୋଲକତା: ଅଶାନ୍ତ ପଶ୍ଚିମବଙ୍ଗରେ ଭୟଙ୍କର ବିସ୍ଫୋରଣ । ସୁଲଭ ଶୌଚାଳୟରେ ବୋମା ବିସ୍ଫୋରଣ ଯୋଗୁଁ ଚାଲିଗଲା 12 ବର୍ଷୀୟ ବାଳକର ଜୀବନ । ସୂଚନା ଅନୁସାରେ, ପଶ୍ଚିମବଙ୍ଗ ସ୍ଥିତ ବଙ୍ଗାଓଁରେ ଥିବା ଏକ ଶୌଚାଳୟରେ ଖଞ୍ଜାଯାଇଥିଲା ବୋମା । ଫଳରେ ଶୌଚାଳୟକୁ ଯାଇଥିବା ସମୟରେ ବିସ୍ଫୋରଣ କାରଣରୁ ଜଣେ ନାବାଳକର ଜୀବନ ଚାଲିଯାଇଛି । ତେବେ ମୃତ ବାଳକର ନାଁ ରାଜୁ ରାୟ ବୋଲି ଜଣାପଡିଛି । ରାଜୁ ନିକଟସ୍ଥ ସୁବାସପଲ୍ଲୀ ଅଞ୍ଚଳର ହୋଇଥିବାବେଳେ ସେ ଏକ ସାଇକେଲ ମରାମତି ଗ୍ୟାରେଜରେ କାମ କରୁଥିଲା । ସୋମବାର ସକାଳ ପ୍ରାୟ 8ଟା ସମୟରେ ସେ ବକ୍ସିପଲ୍ଲୀ ଅଞ୍ଚଳରେ ଥିବା ଏକ ସୁଲଭ ଶୌଚାଳୟକୁ ଯାଇଥିବାବେଳେ ଏଭଳି ଭୟଙ୍କର ବିସ୍ଫୋରଣ ହୋଇଥିବା ଜଣାପଡିଛି ।
ବିସ୍ଫୋରଣର ଶବ୍ଦ ଏତେ ଭୟଙ୍କର ଥିଲା ଯେ, ଏହାକୁ ଶୁଣିବା ପରେ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଥିଲା । ପ୍ରତ୍ୟେକ୍ଷଦର୍ଶୀଙ୍କ କହିବା ଅନୁସାରେ ରାଜୁ ଶୌଚାଳୟକୁ ପ୍ରବେଶ କରିବାର କିଛି ସମୟ ମଧ୍ୟରେ ହିଁ ହୋଇଥିଲା ବିସ୍ଫୋରଣ । ତେବେ ସ୍ଥାନୀୟ ଲୋକେ ତୁରନ୍ତ ରାଜୁକୁ ନିକଟସ୍ଥ ମେଡିକାଲରେ ଭର୍ତ୍ତି କରିଥିଲେ, ହେଲେ ଡାକ୍ତର ସେଠାରେ ପିଲାଟିର ମୃତ୍ୟୁ ହୋଇଥିବା ଜଣାପଡିଛି । ଏହାସହ ଘଟଣାସ୍ଥଳରୁ 8ଟି ବୋମା ଜବତ କରିଛନ୍ତି ବୋମା ନିଷ୍କ୍ରିୟକାରୀ ଦଳ।
ଅପରପକ୍ଷେ ଏହି ବିସ୍ଫୋରଣ ଘଟଣା ନେଇଛି ରାଜନୈତିକ ମୋଡ । ଆହୁରି ଅନେକ ବୋମା ମଧ୍ୟ ଗଚ୍ଛିତ ରଖାଯାଇଥାଇପାରେ ବୋଲି ଆଶଙ୍କା କରାଯାଉଥିବା କହିଛନ୍ତି ବଙ୍ଗାଓଁ ପୌରାଧ୍ୟକ୍ଷ ଗୋପାଳ ସେଠ୍ । ଆଉ କିଛି ଦିନ ପରେ ସେହି ସ୍ଥାନକୁ ଟିଏମସି ନେତା ଅଭିଷେକ ବାନାର୍ଜୀଙ୍କ ଗସ୍ତର କାର୍ଯ୍ୟକ୍ରମ ରହିଛି । ହେବାକୁ ଥିବା କାର୍ଯ୍ୟକ୍ରମକୁ ଭଣ୍ଡୁର କରିବାକୁ ବିରୋଧୀଙ୍କ ଏହା ହୀନ ଚକ୍ରାନ୍ତ ହୋଇଥାଇପାରେ ବୋଲି କହିଛନ୍ତି ପୌରାଧ୍ୟକ୍ଷ ।
ସେପଟେ ପଶ୍ଚିମବଙ୍ଗରେ ବାରମ୍ବାର ହେଉଥିବା ହିଂସା କାଣ୍ଡ ଓ ବୋମା ବିସ୍ଫୋରଣ ଘଟଣା ପାଇଁ ମମତା ସରକାର ଦାୟୀ ବୋଲି କହିଛନ୍ତି ବଙ୍ଗାଓଁର ବିଜେପି ବିଧାୟକ ଅଶୋକ କିର୍ତ୍ତନୀୟା । ବର୍ତ୍ତମାନ ପଶ୍ଚିମବଙ୍ଗର ସ୍ଥିତି ୟୁକ୍ରେନ ଠାରୁ ମଧ୍ୟ ଉଦବେଗଜନକ ହୋଇ ପଡିଛି ବୋଲି କହିଛି ରାଜ୍ୟ ବିଜେପି ।
ଗତ କିଛି ତିନ ତଳେ ବିରଭୂମ ଜିଲ୍ଲାରେ ଜଣେ ଟିଏମସି ନେତାଙ୍କ ବାସଭବନ ଉପରକୁ ବୋମାମାଡ ହୋଇଥିଲା । ସେହିପରି ଦକ୍ଷିଣ 24 ପ୍ରଗଣା ଜିଲ୍ଲାରେ ହୋଇଥିବା ଏକ ବିସ୍ଫୋରଣରେ ଗୋଟିଏ ପରିବାରର 3ଜଣ ସଦସ୍ୟ ପ୍ରାଣ ହରାଇଥିଲେ । ମେ ମାସ 16 ତାରିଖରେ ଲଗାତର ଦୁଇ ଦୁଇଟି ବିସ୍ଫୋରଣ ହୋଇଥିବାର ଖବର ମଧ୍ୟ ରହିଛି । ଯେଉଁଥିରେ ପୂର୍ବ ମେଦିନିପୁର ଜିଲ୍ଲାର 12 ଜଣଙ୍କ ଜୀବନ ଯାଇଥିଲା ।
