ରାୟପୁର: ଦେଶର ଏକାଧିକ ରାଜ୍ୟରେ ବିଧାନସଭା ନିର୍ବାଚନ ଥିବା ବେଳେ ପଶ୍ଚିମବଙ୍ଗ ଓ ଆସାମରେ ବିଜେପି ବହୁମତ ସହ ସରକାର କରିବାକୁ ଯାଉଛି । ଆଜି ରାୟପୁରରେ ଆୟୋଜିତ ଏକ ଦଳୀୟ ବୈଠକ ପରେ ଏହି ଦୃଢୋକ୍ତି ସହ ଗଣମାଧ୍ୟମକୁ ସୂଚନା ଦେଇଛନ୍ତି ବିଜେପି ଉପସଭାପତି ତଥା ଛତିଶଗଡ ପୂର୍ବତନ ମୁଖ୍ୟମନ୍ତ୍ରୀ ରମଣ ସିଂ ।
ରାୟପୁରରେ ଆୟୋଜିତ ବୈଠକ ପରେ ରମଣ କହିଛନ୍ତି ପଶ୍ଚିମବଙ୍ଗ, ଆସାମ, ତାମିଲନାଡୁ, କେରଳ,ପୁଡୁଚେରୀରେ ହେବାକୁ ଥିବା ନିର୍ବାଚନ ଉପରେ ଉକ୍ତ ବୈଠକରେ ଆଲୋଚନା ହୋଇଛି । ସେହିପରି ପଶ୍ଚିମବଙ୍ଗରେ ବିଧାନସଭା ନିର୍ବାଚନ ଉପରେ ସମଗ୍ର ଦେଶର ନଜର ଥିବାବେଳେ ପଶ୍ଚିମବଙ୍ଗରେ ବିଜେପି ସରକାର କରିବାକୁ ଯାଉଥିବା ସେ ଦାବି କରିଛନ୍ତି । କେବଳ ପଶ୍ଚିମବଙ୍ଗ ନୁହେଁ ବରଂ ଆସାମରେ ହେବାକୁ ଥିବା ବିଧାନସଭା ନିର୍ବାଚନରେ ମଧ୍ୟ ଦଳ କ୍ଷମତାକୁ ଆସିବାକୁ ଯାଉଥିବା କହିଛନ୍ତି ରମଣ ସିଂ ।
ସେହିପରି ସେ ଦେଶରେ ଚାଲିଥିବା କୃଷକ ଆନ୍ଦୋଳନକୁ ନେଇ ମଧ୍ୟ ନିଜର ପ୍ରିତିକ୍ରିୟା ରଖିଛନ୍ତି । ରମଣ କହିଛନ୍ତି କେନ୍ଦ୍ର ଆଣିଥିବା ନୂଆ କୃଷି ଆଇନକୁ କେହି ବିରୋଧ କରୁନାହାନ୍ତି । ତେବେ ଏହାକୁ ନେଇ କେବଳ ରାଜନୀତି କରାଯାଉଛି । ବିରୋଧିମାନେ ଏହି ଆନ୍ଦୋଳକୁ ପ୍ରଭାବିତ କରୁଛନ୍ତି । କିନ୍ତୁ କୃଷକ ମାନେ ଏହି ଆଇନ ବିରୋଧରେ ନାହାନ୍ତି ବରଂ ଏହାକୁ ନେଇ ସେମାନେ ଖୁସି ଅଛନ୍ତି । ଦେଶର ବିଭିନ୍ନ ସ୍ଥାନରେ ଏହି ଆଇନକୁ ସ୍ବାଗତ ମଧ୍ୟ କରାଯାଉଛି। ଏହି ଆନ୍ଦୋଳନକୁ ବଞ୍ଚାଇ ରଖିବା ପାଇଁ କଂଗ୍ରେସ ଓ ବାମ ଦଳ ପକ୍ଷରୁ ଏକ ଷଡଯନ୍ତ୍ର ଚାଲିଛି ବୋଲି କହଛନ୍ତି ରମଣ ।
ବ୍ୟୁରୋ ରିପୋର୍ଟ, ଇଟିଭି ଭାରତ
