ନୂଆଦିଲ୍ଲୀ: ବର୍ଷ ଆରମ୍ଭରେ ମନରେ ଥିଲା କାହିଁ କେତେ ଆଶା, ଆକାଂକ୍ଷା ଆଉ ଉଦ୍ଦୀପନା । ପୁଳା ପୁଳା ସମ୍ଭାବନାର ସୁନ୍ଦର ଚିତ୍ର ଦେଖିଥିଲେ ବିଶ୍ବବାସୀ । ନୂଆବର୍ଷ, ନୂଆ ଜୋସରେ କ୍ୟାରିଅର ଠୁ ଭବିଷ୍ୟତ, ବ୍ୟବସାୟ ଠୁ ବିଶାଳ ବାଣିଜ୍ୟ ସାମ୍ରାଜ୍ୟ ନେଇ କାହିଁ କେତେ କଣ ଭାବି ଥିଲେ ସଭିଏଁ । ହେଲେ ଆସିଗଲା ମହାକାଳ କୋରୋନା, ଚାରିଆଡେ ଘୋଟିଗଲା ଭୟ, ଦୁଃଖ, ଦୁର୍ଦ୍ଦଶା, ନିରାଶାର ଆତଙ୍କ । ଏହାରି ଭିତରେ ଛଟପଟ ହେଉଥିବା ମଣିଷ ପାଇଁ ଏତିକିରେ ଅଟକିନଥିଲା କାଳର କଳାଦିନ । ମାଡିଆସିଥିଲା ଗୋଟିଏ ପରେ ଗୋଟିଏ ପ୍ରାକୃତିକ ବିପର୍ଯ୍ୟୟ, ଘଟିଥିଲା ଗୋଟିଏ ପରେ ଗୋଟିଏ ବିସ୍ଫୋରଣ । ବାରୁଦ ଗୋଦାମର ବିଭୀଷିକାରେ ଛିନଛତ୍ର ହୋଇଥିଲା ସବୁକିଛି । ତେବେ ଏସବୁ ଭିତରେ ଜୀବନ ମୃତ୍ୟୁର ଲୁଚକାଳି ଖେଳ ଘଟିଛି ବର୍ଷ 2020ରେ । କେଉଁଠି ମୃତ୍ୟୁକୁ ହରାଇ ଜୀବନ ଜିତିଛି ତ କେଉଁଠି ମୃତ୍ୟୁ ଆଗରେ ପରାଜିତ ହୋଇଛି ଜୀବନ ।
ପ୍ରାକୃତିକ ବିପତ୍ତି:-
ଏହି ବିପତ୍ତି ବର୍ଷରେ ପ୍ରକୃତି ମଧ୍ୟ ତା'ର କରାଳ ରୂପ ଦେଖାଇଛି । ବଙ୍ଗୋପସାଗରରେ ସୃଷ୍ଟ ଘୂର୍ଣ୍ଣିଝଡ ପରବର୍ତ୍ତି ସମୟରେ ବାତ୍ୟା ଅମ୍ଫାନର ରୂପ ନେଇଥିଲା । ଏହାର ପ୍ରଭାବରେ ପ୍ରଭାବିତ ହୋଇଥିଲା ଆମ ଦେଶ ଭାରତ ଓ ପଡୋଶୀ ବାଂଲାଦେଶ । ଭାରତରେ ଏହି ବାତ୍ୟା 85ରୁ ଊର୍ଦ୍ଧ୍ବ ନୀରିହ ଜୀବନ ନେଇ ଥିବାବେଳେ ଓଡିଶାରୁ 45 ଲକ୍ଷ ଲୋକେ ପ୍ରଭାବିତ ହୋଇଥିଲେ । ସେହିପରି ପଶ୍ଚିମବଙ୍ଗ ମେଦିନପୁର, ଦକ୍ଷିଣ 24 ପ୍ରଗଣା, କୋଲକାତା, ହାଓ୍ବଡା, ହୁଗୁଳିରେ ମଧ୍ୟ ବ୍ୟାପକ କ୍ଷୟକ୍ଷତି ଘଟିଥିଲା ।
କେବଳ ଅମ୍ଫାନ ନୁହେଁ ବର୍ଷ ଶେଷରେ ହୋଇଥିବା ନିଭାର ଓ ବୁରେଭିର ପ୍ରଭାବରେ ଦକ୍ଷିଣ ଭାରତୀୟ ରାଜ୍ୟଗୁଡିକୁ ଜଳପ୍ରଳୟର ସାମ୍ନା କରିବାକୁ ପଡିଥିଲା ।
ଦୀର୍ଘ 100 ବର୍ଷ ପରେ ହାଇଦ୍ରାବାଦରେ ଦେଖିବାକୁ ମିଳିଥିଲା ରେକର୍ଡ ଭଙ୍ଗା ବର୍ଷା । ପୂର୍ବରୁ ଦେଖିନଥିବା ବା ବିପର୍ଯ୍ୟୟର ଛବିକୁ ବାସ୍ତବରେ କଣ ଅନୁଭବ କରିନଥିବା ହାଇଦ୍ରାବାଦବାସୀ ଦେଖିଥିଲେ ବର୍ଷା ବିପତ୍ତି । ସହର ଠୁ ବସ୍ତି ସବୁଠି ହୋଇଯାଇଥିଲା ଜଳମଗ୍ନ । କେଇଘଣ୍ଟାର ବର୍ଷାରେ ଭାସିଯାଇଥିଲେ ନିର୍ଜୀବ ଠୁ ସଜୀବ । ନଓ୍ବାବ ସହର ଘଣ୍ଟା ଘଣ୍ଟା ଧରି ଯାନ୍ତ୍ରୀକ ସେବାରୁ ରହିଥିଲା ବିଛିନ୍ନ ।
ସେହିପରି ଲଗାଣ ବର୍ଷାର ପ୍ରଭାବରେ ଆସାମ ମଧ୍ୟ ପ୍ରଭାବିତ ହୋଇଥିଲା । ରାଜ୍ୟରେ ବନ୍ୟା ଯୋଗୁଁ 100ରୁ ଅଧିକ ଲୋକଙ୍କ ପ୍ରାଣହାନୀ ଘଟିବା ସହ 19 ଲକ୍ଷ 81 ହଜାର 801 ଜଣ ପ୍ରଭାବିତ ହୋଇଥିଲେ । ଏ ବିପତ୍ତିରୁ ଜୀବଜନ୍ତୁ ବା ବାଦ୍ ପଡିଥାନ୍ତେ କିପରି । ଏହାର ପ୍ରଭାବରେ କାଜିରଙ୍ଗା ଜାତୀୟ ଉଦ୍ୟାନରେ 14 ଗଣ୍ଡାଙ୍କ ସମେତ 137 ଜୀବଜନ୍ତୁ ପ୍ରାଣ ହରାଇଥିଲେ ।
ପ୍ରଳୟ ଛୋଟ ବଡ, ଧନୀ ଗରିବର ତାରତମ୍ୟ ଦେଖେନି । ତା' ଆଗରେ ସମସ୍ତେ ସମାନ । ସେ ଆସିଛି ମାନେ ଛାରଖାର କରି ନିଶ୍ଚୟ ଯିବ । ଅର୍ଥାତ ଚଳିତ ବର୍ଷର ବିପତ୍ତି ଆଗରେ କି ବିକଶିତ କି ବିକାଶଶୀଳ ଆଉ ବିକାଶଉନ୍ମୁଖୀ ସମସ୍ତେ ପ୍ରଭାବିତ ହୋଇଛନ୍ତି । ଆମେ ବର୍ତ୍ତମାନ ଆଲୋଚନା କରିବା ବ୍ରାଜିଲର ଆମାଜନ ରେନ୍ଫରେଷ୍ଟରେ ଘଟିଥିବା ଭୟାବହ ଅଗ୍ନିକାଣ୍ଡ ବିଷୟରେ । ବ୍ରାଜିଲର ଜାତୀୟ ମହାକାଶ ଗବେଷଣା ସଂସ୍ଥା INPE ତଥ୍ୟ ଅନୁଯାୟୀ ସେପ୍ଟେମ୍ବରରେ ଆମାଜନ ରେନଫରେଷ୍ଟରେ 8 ହଜାର 373 ଥର ଅଗ୍ନିକାଣ୍ଡ ଘଟିଛି । ବର୍ଷର ପ୍ରଥମ 9 ମାସରେ ଆମାଜନରେ ଅଗ୍ନିକାଣ୍ଡ 13% ବୃଦ୍ଧି ପାଇଛି ।
ସେହିପରି ଇଣ୍ଡୋନେସିଆରେ ବର୍ଷର ଆରମ୍ଭକୁ ଛାରଖାର କରିଦେଇଥିଲା ପ୍ରଳୟଙ୍କାରୀ ବନ୍ୟା । ବନ୍ୟା କାରଣରୁ 4 ଲକ୍ଷରୁ ଅଧିକ ବିସ୍ଥାପିତ ହୋଇଥିବାବେଳେ 66 ଜଣଙ୍କ ଅକାଳରେ ଜୀବନ ଯାଇଥିଲା ।
ଏହାରି ମଧ୍ୟରେ ଆମ ଦେଶ ଭାରତରେ ଦେଖିବାକୁ ମଳିଥିଲା ଆଉ ଏକ ବିପତ୍ତି, ଯାହାର ନାଁ ହେଉଛି ପଙ୍ଗପାଳ ଆକ୍ରମଣ । ଏମାନେ କୌଣସି ଶତ୍ରୁ ଦେଶର ସୈନିକ ନୁହଁନ୍ତି, ତଥାପି ମାରାତ୍ମକ । ଯେଉଁ ପଙ୍ଗପାଳଙ୍କ ପ୍ରଭାବରେ ଗୁଜୁରାଟ, ହରିୟାଣା, ମଧ୍ୟପ୍ରଦେଶ, ପଞ୍ଜାବ, ରାଜସ୍ଥାନ ଓ ଉତ୍ତରପ୍ରଦେଶର ଅନେକ ଚାଷୀମାନେ ଚିନ୍ତାରେ ପଡି ଯାଇଥିଲେ । କାରଣ ଫସଲ ହାନୀକାରକ ଏହି କୀଟାଣୁ 35 ହଜାର ଲୋକଙ୍କ ଖାଦ୍ୟ ଏକା ସହିତ ଖାଇଯିବା ସହ ସବୁଜ ଶସ୍ୟକୁ ମଧ୍ୟ ନଷ୍ଟ କରିଦେଇଥାଆନ୍ତି ।
ବେରୁଟ୍ ବିସ୍ଫୋରଣ:-
ଅପରପକ୍ଷରେ ଯଦି ଆମେ ଅନ୍ତର୍ଜାତୀୟ କ୍ଷେତ୍ରରେ 2020 ମସିହାର ଗୁରୁତ୍ବପୂର୍ଣ୍ଣ ମାମଲା ଦେଖିବା ତାହେଲେ ଲେବନାନର ରାଜଧାନୀ ବେରୁଟରେ ଘଟିଥିବା ଭୟଙ୍କର ବିସ୍ଫୋରଣ ମଧ୍ୟ ମୃତ୍ୟୁର ବିଭୀଷିକା ରଚିଥିଲା । ଏଠାରେ ଅଗଷ୍ଟ 7ରେ ଏକ ବଡ ଧରଣର ବୋମା ବିସ୍ଫୋରଣ ହେବା ଫଳରେ 78 ଜଣଙ୍କର ପ୍ରାଣହାନୀ ଘଟିଥିଲା । ଏଥିସହ ପାଖାପାଖି 3 ହଜାର 700 ରୁ ଅଧିକ ଲୋକେ ଆହତ ହୋଇଥିଲେ । ତେବେ ବେରୁଟର ଏକ ଆମୋନିୟମ ନାଇଟ୍ରେଟ ଗଚ୍ଛିତ ଗୋଦାମରେ ବିସ୍ଫୋରଣ ଘଟିବାରୁ ଏପରି ଏକ ମହାବିପତ୍ତି ଦେଖିବାକୁ ମିଳିଥିଲା ।
ଆର୍ମେନିଆ-ଆଜରବୈଜାନ ଯୁଦ୍ଧ:-
ସେହିପରି ସେପ୍ଟେମ୍ବର 2020 ରେ ଆରମ୍ଭ ହେଇଥିଲା ଆର୍ମେନିଆ ଏବଂ ଆଜରବୈଜାନ ମଧ୍ୟରେ ଯୁଦ୍ଧ । ଏହି ଯୁଦ୍ଧ 27 ବର୍ଷ ପୂର୍ବେ 1993 ରେ ସୋଭିଏତ ସଙ୍ଘର ବିଭାଗୀକରଣ ସହ ଜଡ଼ିତ ବୋଲି କୁହାଯାଏ । 6 ସପ୍ତାହ ଧରି ଚାଲିଥିବା ଏହି ଯୁଦ୍ଧ ଶେଷରେ ଋଷର ହସ୍ତକ୍ଷେପରେ ଶାନ୍ତ ହେଇଥିଲା । ଯୁଦ୍ଧର ପରିଣାମ ସ୍ଵରୁପ ଆର୍ମେନିଆକୁ ବୃହତ୍ତ କ୍ଷତି ସହିବାକୁ ପଡ଼ିଥିଲା ଏବଂ ନାଗର୍ଣ୍ଣୋ-କରାବାକ୍ ର 40 ପ୍ରତିଶତ ଅଞ୍ଚଳ ଆଜରବୈଜାନକୁ ଦେବାକୁ ପଡ଼ିଥିଲା ଆର୍ମେନିଆକୁ ।
ଆମେରିକା ନିର୍ବାଚନ:-
2020 ଆମରିକା ନିର୍ବାଚନରେ ଟ୍ବିଷ୍ଟ ଦେଖିବାକୁ ମିଳିଥିଲା । ପୂର୍ବରୁ କ୍ଷମତାରେ ଥିବା ରିପବ୍ଲିକାନ ପାର୍ଟିର ଡୋନାଲ୍ଡ ଟ୍ରମ୍ପଙ୍କୁ ହରାଇଥିଲା ଡେମୋକ୍ରାଟିକର ଜୋ ବିଡେନ । ନଭେମ୍ବର ୩ରେ ଆମେରିକାରେ ରାଷ୍ଟ୍ରପତି ନିର୍ବାଚନ ହୋଇ ଥିବାବେଳେ ୪ ଦିନର ଭୋଟ ଗଣତି ପରେ ଡେମୋକ୍ରାଟ ପ୍ରାର୍ଥୀ ଜୋ ବିଡେନ ବିଜୟୀ ହୋଇଥିଲେ । ତେବେ ଭାରତୀୟଙ୍କ ପାଇଁ ଚଳିତ ଆମେରିକା ନର୍ବାଚନ ମଧ୍ୟ ଖୁବ୍ ଖାସ ଥିଲା । କାରଣ ଭାରତୀୟ ବଂଶୋଦ୍ଭବ କମଳା ହାରିସଙ୍କର ଉପରାଷ୍ଟ୍ରପତି ଭାବେ ନିର୍ବାଚିତ ହେବା ଦେଶବାସୀଙ୍କୁ ଉତ୍ସାହିତ କରିଥିଲା । ଇତି ମଧ୍ୟରେ ଭାରତ ଏବଂ ଆମେରିକା ମଧ୍ୟରେ ଦିନକୁ ଦିନ ସମ୍ପର୍କ ସୁଦୃଢ ହେଉ ଥିବାବେଳେ ଆଗକୁ ଏହା ଅଧିକ ମଜବୁତ ହେବ ବୋଲି ଆଶା କରାଯାଉଛି ।
ଶିଶୁ ନିଖୋଜ ଓ ହତ୍ୟା ମାମଲା:-
ଅନ୍ୟପଟେ ବର୍ଷର ଶେଷ ଭାଗକୁ ରାଜ୍ୟବାସୀଙ୍କୁ ଅତିଶୟ କରୁଛି ପରୀ ନିଖୋଜ ଓ ହତ୍ୟା ମାମଲା । ନୟାଗଡ ଜିଲ୍ଲା ଲକ୍ଷ୍ମୀପ୍ରସାଦ ପଞ୍ଚାୟତ ଯଦୁପର ଗାଁର ଅଶୋକ ସାହୁଙ୍କ 6 ବର୍ଷର ଝିଅ ପରୀ ଜୁଲାଇ 14 ତାରିଖରେ ନିଖୋଜ ହୋଇ ଯାଇଥିଲା । ଏହାର ଠିକ୍ 10 ଦିନ ପରେ ଅର୍ଥାତ୍ 23 ତାରିଖରେ ଗାଁ ନିକଟରୁ ପରୀର ଖଣ୍ଡ ବିଖଣ୍ଡିତ ମୃତଦେହ ଗଳିତ ଅବସ୍ଥାରେ ଏକ ବସ୍ତାରୁ ଉଦ୍ଧାର କରାଯାଇଥିଲା । ପରେ ମାମଲା ଧିରେ ଧିରେ ଶୀତଳ ହୋଇ ଯାଇଥିଲା । ମାତ୍ର ଶୀତ ଅଧିବେଶନ ଆରମ୍ଭରେ ପରୀର ବାପା ମାଆ ବିଧାନସଭା ସମ୍ମୁଖରେ ଆତ୍ମାହୂତି ଉଦ୍ୟମ କରିବା ପରେ ମାମଲା ଗୁରୁତର ହେବାକୁ ଲାଗିଲା । ମାମଲାରେ ମନ୍ତ୍ରୀ ଅରୁଣ ସାହୁଙ୍କ ସମ୍ପୃକ୍ତି ଥିବା ଅଭିଯୋଗ କରି ବିରୋଧୀ ମନ୍ତ୍ରୀଙ୍କ ଇସ୍ତଫା ଦାବିର ଅଡିବସିଲେ । ଏମିତିକି ବିଧାନସଭା ଶୀତ ଅଧିବେଶନକୁ ପରୀ ପ୍ରସଙ୍ଗ ଉସ୍ମ କରିଦେଲା । ଶେଷରେ ରାଜ୍ୟସରକାର ଶୀତ ଅଧିବେଶନକୁ ମାତ୍ର 10 ଦିନ ମଧ୍ୟରେ ବନ୍ଦ କରିଦେଲେ । ଅନ୍ୟପଟେ ମାମଲାରେ ନୂଆ ନୂଆ ମୋଡ ଦେଖିବାକୁ ମିଳିଲା । କିଏ ପରୀକୁ ବଳି ଦିଆଯାଇଛି କହୁ ଥିବାବେଳେ ପୁଣି ପରୀକୁ ଦୁଷ୍କର୍ମ ଓ ହତ୍ୟା କରାଯାଇଥିବା ଭଳି ସଙ୍ଗୀନ ଅଭିଯୋଗ ଆସୁଛି ।
ଜାତୀୟ କ୍ରାଇମ୍ ବ୍ୟୁରୋ ଏନସିଆରବି ତଥ୍ୟ ଅନୁଯାୟୀ ରାଜ୍ୟରେ ଗତବର୍ଷ 4 ହଜାର 315 ଶିଶୁ ନିଖୋଜ ହୋଇଛନ୍ତି । ଅର୍ଥାତ୍ ଦିନକୁ 12 । ତେବେ ଏହି ନିଖୋଜ ଶିଶୁମାନେ ଯାଉଛନ୍ତି କୁଆଡେ, କିଏ ତାଙ୍କୁ ଅପହରଣ କରୁଛି ଏବଂ କାହିଁକି ଏନେଇ ଉଠିଛି ବଡ ପ୍ରଶ୍ନ ।
ବାସ୍ତବରେ ଏବର୍ଷ ପ୍ରତିଟି ମନରେ କିନ୍ତୁ, କାହିଁକିର ଅଭୁଲା ଛାପ ଛାଡିଦେଇ ଯାଇଛି । ଯେମିତି ପ୍ରତିଟି ଆତ୍ମା କହୁଛି ଏମିତି ବର୍ଷ ଆଉ କେବେ ନ ଆସୁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
