ଭୋପାଳ: ମଧ୍ୟପ୍ରଦେଶର ଉଜ୍ଜୈନରେ ଥିବା ବିଶ୍ବ ପ୍ରସିଦ୍ଧ ବାବା ମହାକାଳଙ୍କର ଦର୍ଶନ ଓ ପୂଜା କରିବା ଏବେ ଭକ୍ତଙ୍କ ପାଇଁ ମହଙ୍ଗା ହୋଇଯାଇଛି । ପୂଜା ଓ ଅଭିଷେକ କରିବାପାଇଁ ଖର୍ଚ୍ଚ ହେଉଥିବା ରାଶିରେ ଏବେ ବୃଦ୍ଧି କରାଯାଇଛି। ମହା ରୁଦ୍ରାଭିଷେକ କରିବାପାଇଁ ପୂର୍ବରୁ 11 ହଜାର ଟଙ୍କାର ଦାନ ରାଶି ଦେଉଥିବାବେଳେ ଏବେ ମନ୍ଦିର ପ୍ରଶାସନ ପକ୍ଷରୁ ଏଥିରେ ବୃଦ୍ଧି କରାଯାଇ 15 ହଜାର କରାଯାଇଛି ।
ଏହାସହିତ ସାମାନ୍ୟ ପୂଜା, ଶିବ ମହିମା ପାଠ, ଶିବ ମହିମ ସ୍ତୋତ୍ର ଏବଂ ରୁଦ୍ର ପାଠ ଆଦିରେ ଦୁଇଗୁଣା ବୃଦ୍ଧି କରାଯାଇଛି । ଏହା ଚଳିତମାସ 5 ତାରିଖରୁ ଲାଗୁ ହୋଇଯାଇଛି। ଉଜ୍ଜୈନ ମହାକାଳେଶ୍ବର ମନ୍ଦିର ସମିତି ପକ୍ଷରୁ ଅକ୍ଟୋବର 10ରେ ବସିଥିବା ବୈଠକରେ ସମସ୍ତ ପ୍ରକାର ପୂଜା ପାଇଁ ଲାଗୁଥିବା ରାଶି ବୃଦ୍ଧି କରିବା ପାଇଁ ନିଷ୍ପତ୍ତି ନିଆଯାଇଥିଲା ।
ନୂତନ ଦାନ ରାଶି ଗତ ଗୁରୁବାର ଠାରୁ ଲାଗୁ ହୋଇଛି। ଏହା ପୂର୍ବରୁ ବୁଧବାର ପର୍ଯ୍ୟନ୍ତ 2003 ଡିସେମ୍ବର 24 ତାରିଖରେ ହୋଇଥିବା ନିଷ୍ପତ୍ତି ହିସାବରେ ରାଶି ପ୍ରଦାନ କରାଯାଉଥିଲା । ମନ୍ଦିର ସମିତିର ପ୍ରଶାସକ ଏସଏସ ରାଓ୍ବତ କହିଛନ୍ତି ଯେ, ମନ୍ଦିର ପୂଜା ପାଇଁ ଦାନରେ ପରିବର୍ତ୍ତନ 16 ବର୍ଷ ପରେ ବୃଦ୍ଧି କରାଯାଇଛି ।
ସମିତି ମନ୍ଦିରର ବିକାଶକୁ ଧ୍ୟାନରେ ରଖି ଏହି ନିଷ୍ପତ୍ତି ନେଇଛି । ଏହାଦ୍ବାରା ମନ୍ଦିରର ବିକାଶରେ ଶ୍ରଦ୍ଧାଳୁଙ୍କ ସହଯୋଗ ବଢିବ । ଶ୍ରଦ୍ଧାଳୁଙ୍କ ପାଇଁ ନୂଆ ନୂଆ ସୁବିଧା ମଧ୍ୟ କରାଯାଇପାରିବ । ତେବେ ମନ୍ଦିରରେ ଶ୍ରଦ୍ଧାଳୁଙ୍କୁ ମହା ରୁଦ୍ରାଭିଷେକ ପାଇଁ 15 ହଜାର ଟଙ୍କା ଦେବାକୁ ପଡିବ । ଆଗରୁ ଏହା 11 ହଜାର ଥିଲା । ମନ୍ଦିର ସମିତି ମହା ମୃତ୍ୟୁଞ୍ଜୟ ପାଠ କରିବା ପାଇଁ ଯଥାବିଧ 15 ହଜାର ଟଙ୍କା ଧାର୍ଯ୍ୟ କରିଛନ୍ତି।