ଲକ୍ଷ୍ନୌ: ଉତ୍ତରପ୍ରଦେଶ ବିଧାନସଭା ସମ୍ମୁଖରେ ନିଜ ଦେହରେ ନିଆଁ ଲଗାଇ ଆତ୍ମହତ୍ୟା ଉଦ୍ୟମ କରିଥିବା ମହିଳାଙ୍କ ବୁଧବାର ରାତିରେ ମୃତ୍ୟୁ ଘଟିଛି । ମୃତକ ହେଲେ ଅଞ୍ଜନା ତିଓ୍ବାରୀ । ଅଞ୍ଜନାକୁ ଆତ୍ମହତ୍ୟା ପାଇଁ ଉସକାଇବା ଅଭିଯୋଗରେ ଲକ୍ଷ୍ନୌ ପୋଲିସ ରାଜସ୍ଥାନର ପୂର୍ବତନ ରାଜ୍ୟପାଳଙ୍କ ପୁଅ ଆଲୋକ ପ୍ରସାଦଙ୍କୁ ଗିରଫ କରିଛି ।
ସୂଚନା ଅନୁଯାୟୀ, ମହାରାଜଗଞ୍ଜରେ ରହୁଥିବା ଅଞ୍ଜନା ତାଙ୍କ ସ୍ବାମୀ ଅଖିଳେଶ ତିଓ୍ବାରୀଙ୍କ ସହ ଛାଡ଼ପତ୍ର ପରେ ଆସିଫ ନାମକ ଏକ ଯୁବକକୁ ପ୍ରେମ କରୁଥିଲେ । ଆସିଫଙ୍କୁ ବିବାହ କରିବାକୁ ସେ ଇସଲାମ ଧର୍ମ ମଧ୍ୟ ଗ୍ରହଣ କରିଥଲେ । ଆସିଫ ଚାକିରୀ ବ୍ୟାପାରରେ ସାଉଦିଆରବ ଯାଇଥିବାବେଳେ ତାଙ୍କ ପରିବାର ଲୋକ ଅଞ୍ଜନାଙ୍କୁ ନାନା ନିର୍ଯାତନା ଦେଇ ଆସୁଥିଲେ ।
ଏହାପରେ ଅଞ୍ଜନା ମଙ୍ଗଳବାର ବିଧାନସଭା ସମ୍ମୁଖରେ ନିଜ ଦେହରେ ନିଆଁ ଲଗାଇ ଦେଇଥିଲେ । ଗୁରୁତର ଅବସ୍ଥାରେ ଅଞ୍ଜନାକୁ ନିକଟସ୍ଥ ମେଡ଼ିକାଲରେ ଭର୍ତ୍ତି କରାଯାଇଥିଲା । ତାଙ୍କ ଶରୀରର ପ୍ରାୟ 85 ଭାଗ ପୋଡ଼ି ଯାଇଥିବା ଡାକ୍ତର କହିଥିଲେ । ଶେଷରେ ବୁଧବାର ରାତିରେ ଜୀବନ ଯୁଦ୍ଧରେ ହାରି ଯାଇଛନ୍ତି ଅଞ୍ଜନା ।
ଘଟଣାରେ ରାଜସ୍ଥାନର ପୂର୍ବତନ ରାଜ୍ୟପାଳ ଶୁକଦେବ ପ୍ରସାଦଙ୍କ ପୁଅ ତଥା କଂଗ୍ରେସ ନେତା ଆଲୋକ ପ୍ରସାଦ ଅଞ୍ଜନାକୁ ଆତ୍ମହତ୍ୟା ପାଇଁ ଅଯଥା ଉସକାଉଥିବା ଜଣାପଡ଼ିଛି । ଘଟଣା ଘଟିବା ସମୟରେ ଆଲୋକଙ୍କୁ ବିଧାନସଭା ପରିସରରେ ମିଳିଥିଲା । ଏହି ମାମଲାରେ ସଂପୃକ୍ତ ଆଲୋକଙ୍କୁ ଲକ୍ଷ୍ନୌ ପୋଲିସ ଗିରଫ କରିଛି । ତେବେ ଏହା 'ପ୍ରେମ ଜିହାଦ' ସଂପର୍କିତ ମାମଲା କି ନାହିଁ, ଏ ଯାଏଁ ଜଣା ପଡ଼ିନାହିଁ । ପୋଲିସ ଏ ସଂକ୍ରାନ୍ତରେ ଅନୁସନ୍ଧାନ ଜାରି ରଖିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
