ନୂଆଦିଲ୍ଲୀ: ଟଙ୍କା ସବୁ ବିନାଶର କାରଣ ବୋଲି ଲୋକକଥା ରହିଛି । ଆଉ ଏହା ସତ ବୋଲି ଗତକାଲି ପ୍ରମାଣିତ ହୋଇଛି । ଗୋଟିଏ 2000 ଟଙ୍କିଆ ନୋଟ ପାଇଁ ନିଜ ଜୀବନକୁ ବାଜିରେ ଲଗାଇଛନ୍ତି ଜଣେ ଯୁବତୀ । ଏପରି ଘଟଣା ଦ୍ୱାରକା ମୋର ମେଟ୍ରୋ ଷ୍ଟେସନରେ ଘଟିଛି ।
ରିପୋର୍ଟ ଅନୁସାରେ ଜଣେ ୨୬ ବର୍ଷୀୟ ଯୁବତୀ ଚେତନା ଶର୍ମା ମଙ୍ଗଳବାର ସକାଳ 10ଟା 30 ମିନିଟରେ ଷ୍ଟେସନରେ ଛିଡା ହୋଇଥିଲେ । ତେବେ ତାଙ୍କ ପର୍ସରୁ ଏକ 2000 ଟଙ୍କିଆ ନୋଟ ଖସିଯାଇ ମେଟ୍ରୋ ରେଲୱେ ଟ୍ରାକରେ ପଡିଯାଇଥିଲା । ଏହାକୁ ଆଣିବାକୁ ସେ ଟ୍ରାକ ଉପରକୁ ଡିଆଁ ମାରିଥିଲେ । ସେତେବେଳେ ସାମନାରୁ ଟ୍ରେନ ଆସୁଥିଲା । କିନ୍ତୁ ତାଙ୍କୁ ଟଙ୍କା ଲୋଭ ଏମିତି ଘାରିଥିଲା ଯେ ସେ ଏଥିପ୍ରତି ଧ୍ୟାନ ଦେଇନଥିଲେ ।
ତେବେ ପ୍ରତ୍ୟକ୍ଷଦର୍ଶୀଙ୍କ କହିବାନୁସାରେ ମେଟ୍ରୋ ଟ୍ରେନ୍ ମାଡି ଆସୁଥିବା ଦେଖି ଚେତନା ଜୀବନ ବଞ୍ଚାଇବା ଲାଗି ଦୁଇ ଟ୍ରାକ ମଝିରେ ସ୍ଥିର ହୋଇ ଶୋଇ ପଡିଥିଲେ । ଏହାପରେ ତାଙ୍କ ଉପର ଦେଇ ଦୁଇଟି ବଗି ଅତିକ୍ରମ କରିଗଲା । ତେବେ ଲୋକଙ୍କ ଚିତ୍କାର ଶୁଣି ଡ୍ରାଇଭର ଟ୍ରେନ୍ ଅଟକାଇଥିଲେ । ଆଉ ଯୁବତୀ ଜଣକ ନିରାପଦରେ ବାହାରି ଆସିଥିଲେ ।
ଏହାପରେ ସେଣ୍ଟ୍ରାଲ ଇଣ୍ଡଷ୍ଟ୍ରିଆଲ ସିକ୍ୟୁରିଟି ଫୋର୍ସ(ସିଆଇଏସଏଫ) ତାଙ୍କୁ ଅଳ୍ପ ସମୟ ଲାଗି ଅଟକ ରଖିଥିଲେ । ସେ ଲିଖିତ କ୍ଷମାଯାଚନା କରିବା ପରେ ତାଙ୍କୁ ଛାଡି ଦିଆଯାଇଛି ।
