କୋଲକାତା: ପଶ୍ଚିମବଙ୍ଗ ସରକାର ଚାଷୀଙ୍କୁ କେନ୍ଦ୍ର ଯୋଜନା ଓ ସୁବିଧାରୁ ବଞ୍ଚିତ କରୁଥିବା ନେଇ ସଙ୍ଗିନ ଅଭିଯୋଗ ସାମ୍ନାକୁ ଆସିଛି । ଏହା ଉପରେ ଚିନ୍ତା ପ୍ରକଟ କରିଛନ୍ତି ରାଜ୍ୟପାଳ ଜଗଦୀପ ଧନକର ।
ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଚିଠି ଲେଖିଛନ୍ତି ପଶ୍ଚିମବଙ୍ଗ ରାଜ୍ୟପାଳ ଜଗଦୀପ ଧନକର । ଏହି ଚିଠିରେ ପଶ୍ଚିମବଙ୍ଗରେ କୃଷକଙ୍କୁ ନ୍ୟାୟ ଦେବା ପାଇଁ ପଦକ୍ଷେପ ନେବାକୁ ଅନୁରୋଧ କରିଛନ୍ତି ରାଜ୍ୟପାଳ ।
ରାଜ୍ୟପାଳ ଏହି ଚିଠିରେ ଲେଖିଛନ୍ତି, ରାଜ୍ୟରେ 70 ଲକ୍ଷ ଚାଷୀଙ୍କୁ ପିଏମ-କିସାନ ସମ୍ମାନ ନିଧି ଯୋଜନାର ଲାଭରୁ ବଞ୍ଚିତ ରଖାଯାଇଛି । ସେ କହିଛନ୍ତି, ସମଗ୍ର ଦେଶରେ କୃଷକଙ୍କୁ 12000 ଟଙ୍କାର ସହାୟତା ଅର୍ଥ ମିଳିଛି । ହେଲେ ପଶ୍ଚିମବଙ୍ଗର କୃଷକଙ୍କୁ ରାଜ୍ୟସରକାର ଏହି ସହାୟତାର ଲାଭରୁ ବଞ୍ଚିତ ରଖିଛନ୍ତି । ରାଜ୍ୟସରକାରଙ୍କୁ କେବଳ କୃଷକଙ୍କୁ ଚିହ୍ନଟ କରିବାର ଥିଲା । ହେଲେ ସରକାର ତାହା କରିନାହାନ୍ତି । ଏହା ବଡ ଦୁଃଖଦାୟକ ବୋଲି ରାଜ୍ୟପାଳ କହିଛନ୍ତି ।
