ନୂଆଦିଲ୍ଲୀ: ବର୍ତ୍ତମାନ ଚୀନ ବିରୋଧରେ ଦୁଇଟି ଯୁଦ୍ଧ ଲଢୁଛି ଭାରତ । ଗୋଟିଏ ହେଉଛି ସୀମା ବିବାଦ ଏବଂ ଅନ୍ୟଟି ହେଉଛି କୋରୋନା ଭାଇରସ । ଦେଶ ଉଭୟ ଯୁଦ୍ଧ ଜିତିବ ବୋଲି ସୋମବାର ପ୍ରେସ କନଫେରନ୍ସରେ କହିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ।
ସୂଚନା ଅନୁଯାୟୀ, ଗତ ଜୁନ୍ 15ରେ ଲଦାଖର ଗଲୱାନ ଘାଟିରେ ଭାରତ ଚୀନ ମୁହାଁମୁହିଁ ଘଟଣାରେ 20 ଭାରତୀୟ ଯବାନ ଶହୀଦ ହୋଇଛନ୍ତି ।
ଆମ ଡାକ୍ତର, ନର୍ସ ଏବଂ ଯବାନ ସମସ୍ତେ ଲଢେଇ ଜାରି ରଖିଛନ୍ତି ଏବଂ ଦେଶବାସୀ ସେମାନଙ୍କ ପଛରେ ଠିଆ ହୋଇଛନ୍ତି । ବର୍ତ୍ତମାନ ସମୟରେ ସମଗ୍ର ଦେଶକୁ ଏକଜୁଟ ହୋଇ ଏହି ଦୁଇ ଯୁଦ୍ଧ ଲଢିବାକୁ ପଡିବ । ତେଣୁ ଏହାକୁ ନେଇ ରାଜନୀତି କରିବା ଉଚିତ୍ ନୁହେଁ । ଆମକୁ ଚୀନ୍ ଏବଂ କୋରୋନା ବିରୋଧରେ ଲଢିବାକୁ ପଡିବ ବୋଲି କେଜ୍ରିୱାଲ କହିଛନ୍ତି ।
କୋରୋନା ସ୍ଥିତି ସମ୍ପର୍କରେ କହିବାକୁ ଯାଇ କେଜ୍ରିୱାଲ କହିଛନ୍ତି, ଦିଲ୍ଲୀରେ ବର୍ତ୍ତମାନ 25000 ଆକ୍ଟିଭ ଆକ୍ରାନ୍ତ ରହିଛନ୍ତି । ଗତ ସପ୍ତାହ ତୁଳନାରେ ବର୍ତ୍ତମାନ କେବଳ ଏକ ହଜାର ଆକ୍ଟିଭ ମାମଲା ବଢିଛି । ବର୍ତ୍ତମାନ ରାଜ୍ୟରେ 33 ହଜାର ଆକ୍ରାନ୍ତ ସୁସ୍ଥ ହୋଇ ଘରକୁ ଫେରିଛନ୍ତି । ଏଥିସହ ରାଜ୍ୟରେ ସ୍ଥିତି ବର୍ତ୍ତମାନ ନିୟନ୍ତ୍ରଣରେ ଥିବା କେଜ୍ରିୱାଲ କହିଛନ୍ତି ।
