ବାଲେଶ୍ୱର: ରେଳ ଟ୍ରାକ ପାଇଁ ହଟିଲା ଜବର ଦଖଲ । ବାଲେଶ୍ୱର ଜିଲ୍ଲାରେ ରେଳ ଟ୍ରାକ ତୃତୀୟ ଲାଇନ କାର୍ଯ୍ୟ ଆରମ୍ଭ ପାଇଁ ସହରରୁ ରେଳ ପାର୍ଶ୍ଵରେ ଥିବା ଜବର ଦଖଲ ହଟାଇଛି ଜିଲ୍ଲା ପ୍ରଶାସନ । ଦୁଇଦିନ ଧରି ଏହି ଉଚ୍ଛେଦ ପ୍ରକ୍ରିୟା ଜାରି ରହିବାକୁ ଥିବା ବେଳେ ପ୍ରଥମ ଦିନରେ କୌଣସି ଅପ୍ରୀତିକର ପରିସ୍ଥିତି ଉପୁଜି ନାହିଁ । ଉଚ୍ଛେଦ ପ୍ରକ୍ରିୟା ସୁରୁଖୁରୁରେ ତ୍ୱରାନ୍ନିତ କରିବା ପାଇଁ ଦୁଇଦିନ ଉକ୍ତ ଅଞ୍ଚଳରେ କର୍ଫ୍ୟୁ ଜାରି କରାଯାଇଥିବା ଆଜି କର୍ଫ୍ୟୁ ମଧ୍ୟ ହଟାଯାଇଛି ।
ହଟିଲା କର୍ଫ୍ୟୁ:
ରେଳ ଧାରଣା ପାଇଁ ଉଚ୍ଛେଦ ବେଳେ ଯେପରି କୌଣସି ଅପ୍ରିତିକର ସ୍ଥିତି ନ ଉପୁଜେ ସେଥିପାଇଁ ବାଲେଶ୍ୱର ସହରର ଅରଡବଜାର ଠାରୁ ପରିବା ମାର୍କେଟ ଅଞ୍ଚଳ ପର୍ଯ୍ୟନ୍ତ କର୍ଫ୍ୟୁ ଜାରି କରାଯାଇଥିଲା । ଏହି ଅଞ୍ଚଳରେ ଏକାଧିକ ବ୍ୟକ୍ତି ଏକତ୍ରିତ ହେବା, ସଭା, ରାଲି ଉପରେ ପ୍ରଶାସନ ତରଫରୁ କଟକଣା ଲାଗୁ କରାଯାଇଥିଲା । ହରିପୁରରୁ ଦର୍ଜିପୋଖରୀ, କସିମିଳା ଠାରୁ ଫୁଲାଡି, ନୂଆବଜାର ରେଳ ଫାଟକରୁ ଗୋପାଳପୁର ଓ ପରିବା ମାର୍କେଟ ପର୍ଯ୍ୟନ୍ତ ଶନିବାର, ରବିବାର ସକାଳ 4ଟାରୁ ରାତି 10ଟା ପର୍ଯ୍ୟନ୍ତ କର୍ଫ୍ୟୁ ବଳବତ୍ତର ନେଇ ଘୋଷଣା କରାଯାଇଥିଲା । ହେଲେ ବର୍ତ୍ତମାନ ସ୍ଥିତି ଦେଖି ଏହି କର୍ଫ୍ୟୁ ହଟାଯାଇଛି ।
ଏହାମଧ୍ୟ ପଢନ୍ତୁ... ଜବରଦଖଲ ଜମିରେ ଥିବା ଅଟାଳିକାରେ ଚଢିବ ବୁଲଡୋଜର: ରାଜସ୍ୱ ମନ୍ତ୍ରୀ |
ଭୂମି ବନ୍ଦୋବସ୍ତ ଆଇନ ଅନୁସାରେ ଥଇଥାନ
ଜବର ଦଖଲ ଉଚ୍ଛେଦ ବେଳେ ବାଲେଶ୍ୱର ଉପଜିଲ୍ଲାପାଳ ପ୍ରଥମେଶ ରାଜସିର୍କେ କହିଛନ୍ତି, " ଉଚ୍ଛେଦ ପ୍ରକ୍ରିୟା ଠିକ ଭାବେ ହେବା ନେଇ ହରିପୁରରୁ ଦରଜି ପୋଖରୀ, କଷିମେଳା, ନୂଆବଜାର, ଅରଡ଼ ବଜାର ଅଞ୍ଚଳରେ କର୍ଫ୍ୟୁ ଜାରି କରାଯାଇଛି । ରେଳ ଲାଇନ ଯେତିକି ଥିଲା, ତୃତୀୟ ଲାଇନ ପ୍ରୋଜେକ୍ଟ ଅଛି ତା ପାଇଁ ଏ ଉଚ୍ଛେଦ ହେଉଛି । ଏହି ପ୍ରୋଜେକ୍ଟ ଦ୍ୱାରା ବହୁ ଲୋକ ଉପକୃତ ହେବେ । ସମୁଦାୟ 238ଟି ବସ୍ତି ଘର ଅଛି ଏବଂ 1500 ଲୋକ ଅଛନ୍ତି । ଯେହେତୁ ଏହା ରେଳ ଲାଇନ ଅଛି ଥଇଥାନ ପାଇଁ ଓଡିଶା ସରକାରଙ୍କ ଭୂମି ବନ୍ଦୋବସ୍ତ ଆଇନ ଅନୁସାରେ ସେମାନଙ୍କୁ ଥଇଥାନ କରି ପାରିବୁ । ଏଥିପାଇଁ 2 ତାରିଖଠାରୁ ତହସିଲ ଅଫିସରେ କ୍ୟାମ୍ପ ହୋଇଛି। ଏହି କ୍ୟାମ୍ପରେ ଲୋକମାନେ ଆସି ଆବେଦନ କରି ପାରିବେ । ସରକାରୀ ନିୟମ ଅନୁସାରେ ସେମାନଙ୍କୁ ଜମି ଯୋଗାଇ ଦିଆଯିବ । କୌଣସି ପ୍ରକାର ବିରୋଧ ନାହିଁ, ସମସ୍ତେ ସାହାଯ୍ୟ କରୁଛନ୍ତି । ନିଜେ ନିଜେ ତାଙ୍କର ଘର ସାମଗ୍ରୀ ବାହାରକୁ କାଢି ନେଉଛନ୍ତି । ରେଳ ଲାଇନ ଯେତେ ବଢିବ ଆମେ ଦୁର୍ଘଟଣାକୁ ଏଡ଼ାଇ ପାରିବା, ଏଥିପାଇଁ କାହାର ବିରୋଧ ନାହିଁ । ଏହା ରେଳ ବିଭାଗର, ଏହାକୁ ଜବର ଦଖଲ କରାଯାଇଛି । 30 ଦିନ ପୂର୍ବରୁ ସେମାନଙ୍କୁ ନୋଟିସ କରାଯାଇଛି, ଆଇନ ଅନୁସାରେ ସମସ୍ତ କାର୍ଯ୍ୟ କରାଯାଉଛି ।"
ଇଟିଭି ଭାରତ, ବାଲେଶ୍ୱର
