ନୂଆଦିଲ୍ଲୀ: ଫେସବୁକରେ ଆପତ୍ତିଜନକ ପୋଷ୍ଟ ମାମଲାରେ ଉପୁଜିଥିବା ବିବାଦ ଦିନକୁ ଦିନ ତୀବ୍ର ହେବାରେ ଲାଗିଛି । ଏହାକୁ ନେଇ କଂଗ୍ରେସ ମହାସଚିବ କେ.ସି ଭେନୁଗୋପାଳଙ୍କ ଲେଖିଥିବା ଚିଠିର ଜବାବ ରଖିଛି ଫେସବୁକ ।
ଫେସବୁକ କହିଛି ଯେ, ଆମେ ଅଣ ପକ୍ଷପାତୀ ଏବଂ ଆମର ପ୍ଲାଟଫର୍ମ ଏକ ଏପରି ସ୍ଥାନ, ଯେଉଁଠାରେ ଲୋକମାନେ ସ୍ବାଧୀନତାର ସହ ନିଜର ମତ ରଖିପାରିବେ। ଆମେ ପକ୍ଷପାତର ଅଭିଯୋଗକୁ ଗମ୍ଭୀରତାର ସହ ଗ୍ରହଣ କରୁ । ଏହାସହ ସମସ୍ତ ପ୍ରକାରର ଘୃଣା ଓ ଆପତ୍ତିଜନକ ମନ୍ତବ୍ୟର କଡା ନିନ୍ଦା କରୁ ବୋଲି ମତ ରଖିଛି ଫେସବୁକ ।
କେସି ଭେନୁଗୋପାଳ ଫେସବୁକର ସିଇଓ ମାର୍କ ଜୁକରବର୍ଗଙ୍କୁ ଇମେଲ ମାଧ୍ୟମରେ ଏକ ଚିଠି ଲେଖିଥିଲେ। ସେ ଜୁକରବର୍ଗଙ୍କୁ ପରାମର୍ଶ ଦେଇଥିଲେ ଯେ, ଫେସବୁକ ମୁଖ୍ୟାଳୟରୁ ଏକ ଉଚ୍ଚ ସ୍ତରୀୟ ଅନୁସନ୍ଧାନ ଆରମ୍ଭ କରୁ ଏବଂ 2 ମାସ ମଧ୍ୟରେ ଏହାକୁ ସମ୍ପୂର୍ଣ୍ଣ କରି ତଦନ୍ତ ରିପୋର୍ଟକୁ କମ୍ପାନୀ ବୋର୍ଡରେ ଦାଖଲ କରୁ। ଏହି ରିପୋର୍ଟକୁ ସାର୍ବଜନୀନ କରାଯିବା ଉଚିତ ବୋଲି ଭେନୁଗୋପାଳ ନିଜ ଚିଠିରେ ଉଲ୍ଲେଖ କରିଥିଲେ ।
