ନୂଆଦିଲ୍ଲୀ: ଲୋନରେ ମିଳୁଛି ପିଆଜ । ପିଆଜ ଦର ବୃଦ୍ଧିକୁ ନେଇ ସାରା ଦେଶରେ ଏନେଇ ହଇଚଇ ସୃଷ୍ଟି ହୋଇଥିବା ବେଳେ ଉତ୍ତରପ୍ରଦେଶର ବାରଣାସୀରେ ସମାଜବାଦୀ ପାର୍ଟୀର କିଛି ଯୁବ ୱିଙ୍ଗଙ୍କ ଦୋକାନରେ ପିଆଜ ଲୋନରେ ମିଳୁଛି । ତେବେ ପିଆଜ ଲୋନରେ ଦେବା ପାଇଁ ଦୋକାନୀ ଆଧାରକାର୍ଡ ବନ୍ଧା ରଖୁଛନ୍ତି ।
ସମାଜବାଦୀ ପାର୍ଟୀର ଜଣେ କାର୍ଯ୍ୟକର୍ତ୍ତାଙ୍କ କହିବା ଅନୁଯାୟୀ, ପିଆଜ ଦର ବୃଦ୍ଧି ପାଇଁ ଏହା ଆମର ବିରୋଧ ପ୍ରଦର୍ଶନ ଅଟେ । ଯେଉଁ କାରଣରୁ ଆମେ ପିଆଜ ଦେବାକୁ ଲୋକଙ୍କ ଠାରୁ ଆଧାରକାର୍ଡ ନଚେତ୍ ରୂପା ଅଳଙ୍କାର ବନ୍ଧା ରଖୁଛୁ ।
ପ୍ରକାଶ ଥାଉକି, ଗତ କିଛି ଦିନ ହେବ ପିଆଜ ଦର ଆକାଶ ଛୁଆଁ ରହିଛି । ଯାହାଫଳରେ ଲୋକେ ନାହିଁ ନଥିବା ଅସୁବିଧା ଭୋଗୁଛନ୍ତି । ହାଣ୍ଡିଶାଳର ମୁଖ୍ୟ ସାମଗ୍ରୀ ଥିବା ପିଆଜ ଦର 100 ଛୁଇଁ ଥିବାବେଳେ ପିଆଜ ଦର କମ୍ କରିବା ପାଇଁ ଦେଶବ୍ୟାପୀ ଆନ୍ଦୋଳନ ଚାଲିଛି ।
