ଲକ୍ଷ୍ନୌ: ଉତ୍ତର ପ୍ରଦେଶ ବାରବାଙ୍କିରେ ବିଜେପି ଯୁବମୋର୍ଚ୍ଚା ନେତା ରାହୁଲ ସିଂହଙ୍କ ପତ୍ନୀଙ୍କର ହତ୍ୟାକାଣ୍ଡରେ ନୂଆମୋଡ । ଏହି ମାମଲାରେ ନେତା ରାହୁଲ ସିଂହଙ୍କ ଉପରେ ସନ୍ଦେହ କରି ତାଙ୍କ ବିରୁଦ୍ଧରେ ହତ୍ୟା ମାମଲା ରୁଜୁ କରିଛି ପୋଲିସ । ରାହୁଲଙ୍କ ସମେତ 6 ଜଣଙ୍କ ବିରୋଧରେ ହତ୍ୟା ଅଭିଯୋଗ ଆସିଛି ।
ସୂଚନା ଥାଉକି ବିଜେପି ନେତା ରାହୁଲ ନିଜ ପତ୍ନୀଙ୍କ ସହ କାରରେ ବୁଲିବାକୁ ଯାଉଥିଲେ । ରାସ୍ତାରେ ଏକ ବ୍ରିଜ ପାଖରେ କିଛି ଦୁର୍ବୃତ୍ତ ତାଙ୍କ କାରକୁ ଅଟକାଇ ଆକ୍ରମଣ କରିଥିଲେ । ତାଙ୍କୁ କାରରୁ ବାହାର କରି ମାରପିଟ କରିବା ପରେ ରାହୁଲ ଚେତାଶୂନ୍ୟ ହୋଇ ପଡିଥିଲେ । ସେପଟେ ପତ୍ନୀଙ୍କ ଠୁ ଲୁଟପାଟ କରିବା ପରେ ଦୁର୍ବୃତ୍ତମାନେ ତାଙ୍କୁ ଗୁଳି କରି ହତ୍ୟା କରିଥିବା ରାହୁଲ ଅଭିଯୋଗ କରିଥିଲେ ।
ସୂଚନା ଅନୁସାରେ ମୋହମ୍ମଦପୁର ଖାଲା ଥାନା ଅନ୍ତର୍ଗତ ଦୌଲତପୁରର ବାସିନ୍ଦା ରାହୁଲ ବର୍ତ୍ତମାନ ବିଜେପି ଯୁବ ମୋର୍ଚ୍ଚାର ନେତା ଅଟନ୍ତି । ସେପଟେ ଘଟଣା ସମ୍ପର୍କରେ ପୋଲିସକୁ ସୂଚନା ମିଳିବା ମାତ୍ରେ ପୋଲିସ ଘଟଣାର ତଦନ୍ତ ଆରମ୍ଭ କରିଛି । ପୋଲିସ ସ୍ନେହଲତାଙ୍କ ସ୍ବାମୀ ରାହୁଲଙ୍କ ଉପରେ ସନ୍ଦେହ କରି ତାଙ୍କ ବିରୋଧରେ ମାମଲା ରୁଜୁ କରିଛି । ଏହା ଏକ ପ୍ରିପ୍ଲାନ ହତ୍ୟା ବୋଲି ପୋଲିସ ସନ୍ଦେହ କରୁଛି । ତେବେ ରାହୁଲଙ୍କ ସମେତ 6 ଅଭିଯୁକ୍ତଙ୍କୁ ପୋଲିସ ଗିରଫ କରିନାହିଁ ।
