ହାଇଦ୍ରାବାଦ: ଭଲ ସ୍ବାସ୍ଥ୍ୟ ସହ ନିରୋଗ ରହିବା ପାଇଁ ପ୍ରତିଦିନ ଆମେ ଫଳ ଓ ପରିବା ଖାଉଛେ । ପ୍ରତ୍ୟକ ଫଳ ଓ ପରିବାର ଅଲଗା ଅଲଗା ଫାଇଦା ରହିଛି । କେଉଁ ଫଳ ଓ ପରିବା ଖାଇବା ଦ୍ବାରା ରୋଗପ୍ରତିରୋଧକ ଶକ୍ତିରେ ବୃଦ୍ଧି ପାଇଥାଏ ତ ଆଉ କାହାକୁ ଖାଇବା ଦ୍ବାରା ଆଖିର ଦୃଷ୍ଟି ଶକ୍ତିରେ ବୃଦ୍ଧି ହୋଇଥାଏ । ଆଉ କିଏ ପାଚନ ପ୍ରକ୍ରିୟାରେ ବୃଦ୍ଧି କରିଥାଏ ତ ଆଉ କିଏ ହାର୍ଟ ପାଇଁ ବେଶ ଲାଭ ଦାୟକ ହୋଇଥାଏ । ଏହି ଫଳ ଓ ପରିବା ଭିତରେ ଗୋଟିଏ ହେଉଛି ଟମାଟୋ । ଏହା କେବଳ ଗୋଟିଏ ନୁହଁ ବରଂ 5 ପ୍ରକାରର କ୍ୟାନସର ଭଳି ଖତରନାକ ରୋଗ ସହ ଅନ୍ୟ ରୋଗରୁ ଆମକୁ ସୁରକ୍ଷିତ ରଖିଥାଏ । ଆସନ୍ତୁ ଜାଣିବା ଏହାର ବିଷୟରେ ।
ଆଖି ପାଇଁ ବେଶ ଲାଭଦାୟକ
ଦୃଷ୍ଟି ଶକ୍ତି ପାଇଁ ଏହା ବେଶ ଲାଭଦାୟକ ଅଟେ । ଟମାଟୋରେ ଭିଟାମିନ 'ଏ' ର ମାତ୍ରା ପ୍ରଚୁର ରହିଛି । ଯାହା ଆଖି ସହ ଯୋଡିହୋଇଥିବା ଅନେକ ରୋଗରୁ ରକ୍ଷା କରିବାକୁ ସାହାଯ୍ୟ ହୋଇଥାଏ । ଏଥିରେ ଥିବା ଏଣ୍ଟି-ଅକ୍ସିଡେଣ୍ଟସ ଫ୍ରୀ ରେଡିକଲସକୁ ରୋକିଥାଏ । ଯାହାଦ୍ବାରା ଦୃଷ୍ଟି ଶକ୍ତି ବୃଦ୍ଧି ପାଇଥାଏ ।
ହୃଦୟ ପାଇଁ ସ୍ବାସ୍ଥ୍ୟକର
ବର୍ତ୍ତମାନ ସମୟରେ ହୃଦ ରୋଗ ଏକ ସାଧାରଣ କଥା ହୋଇଗଲାଣି । ଡାଇବେଟିସ ରୋଗୀଙ୍କୁ ଏହି ରୋଗ ହେବାର ଅଧିକ ଆଶଙ୍କା ରହିଥାଏ । ଟମାଟୋରେ ଲାଇକୋପୀନ ରହିଥାଏ । ଯାହା ହାର୍ଟକୁ ସୁସ୍ଥ ରଖିବାରେ ସାହାଯ୍ୟ କରିଥାଏ । ଡାଇବେଟିସ ରୋଗୀଙ୍କ ଉପରେ ହୋଇଥିବା ଏକ ରିସର୍ଚ୍ଚରୁ ଜଣାପଡିଛି ଯେ, 30 ଦିନ ଧରି ଲଗାତାର ଏହର ସେବନ କରିବା ଦ୍ବାରା ତାଙ୍କ ରକ୍ତରେ ଲିପିଡ ପେରାଅକ୍ସିଡେଶନର ମାତ୍ରା କମ ହୋଇଥିବା ଦେଖିବାକୁ ମିଳିଥିଲା । ଯାହା ହୃଦ ରୋଗ ସହ ଜଡିତ ରୋଗଠାରୁ ଦୂରେଇ ରଖିବାରେ ସହାୟକ ହୋଇଥାଏ ।
