ଔରଙ୍ଗାବାଦ: ମହାରାଷ୍ଟ୍ରର ଔରଙ୍ଗାବାଦ ଜିଲ୍ଲାର ଏକ ଗାଁରେ ଛାତ୍ରମାନେ ରୋବୋଟିକ୍ସ ଏବଂ ପ୍ରଯୁକ୍ତିବିଦ୍ୟା ବିଷୟରେ ଜ୍ଞାନ ହାସଲ କରିବା ପାଇଁ ଜିଲା ପରିଷଦ ସରକାରୀ ବିଦ୍ୟାଳୟରେ ଜାପାନୀ ଭାଷା ଶିଖୁଛନ୍ତି । ଉତ୍ତମ ରାସ୍ତା ଏବଂ ଅନ୍ୟାନ୍ୟ ଆବଶ୍ୟକୀୟ ମୌଳିକ ସୁବିଧା ହୁଏତ ଔରଙ୍ଗାବାଦ ଠାରୁ 25 କିଲୋମିଟର ଦୂରରେ ଥିବା ଗାଡିଭାଟ ଗ୍ରାମରେ ପହଞ୍ଚି ନଥାଇପାରେ, କିନ୍ତୁ ସ୍ଥାନୀୟ ଜିଲ୍ଲା ପରିଷଦ ବିଦ୍ୟାଳୟର ପିଲାମାନଙ୍କ ପାଇଁ ଇଣ୍ଟରନେଟ୍ ସେବା ଯୋଗାଇ ଦେଇଛନ୍ତି । ଏହା ସ୍କୁଲ ଛାତ୍ରଛାତ୍ରୀଙ୍କ ପାଇଁ ଏହା ଏକ ବର ଭଳି ପ୍ରମାଣିତ ହୋଇଛି ।
ଗାଡିଭାଟ ସରକାରୀ ବିଦ୍ୟାଳୟ ଗତ ବର୍ଷ ସେପ୍ଟେମ୍ବରରେ ଏକ ବିଦେଶୀ ଭାଷା କାର୍ଯ୍ୟକ୍ରମ ଆରମ୍ଭ କରିବାକୁ ନିଷ୍ପତ୍ତି ନେଇଥିଲା । ଏହାର କାର୍ଯ୍ୟକ୍ରମ ଅଧୀନରେ ଚତୁର୍ଥରୁ ଅଷ୍ଟମ ଶ୍ରେଣୀର ଛାତ୍ରମାନଙ୍କୁ ନିଜ ପସନ୍ଦର ଭାଷା ବାଛିବା ପାଇଁ କୁହାଯାଇଥିଲା ।
ତେବେ ଏନେଇ ସ୍କୁଲ ଶିକ୍ଷକ ଦାଦାସାହେବ ନବପୁଟ କହିଛନ୍ତି, ଆଶ୍ଚର୍ଯ୍ୟର କଥା ଯେ ଛାତ୍ରଛାତ୍ରୀଙ୍କ ମଧ୍ୟରୁ ଅଧିକାଂଶ କହିଥିଲେ ଯେ ସେମାନେ ରୋବୋଟିକ୍ସ ଏବଂ ଟେକ୍ନୋଲୋଜି ପ୍ରତି ଆଗ୍ରହୀ ଏବଂ ଜାପାନୀ ଭାଷା ଶିଖିବାକୁ ଚାହୁଁଛନ୍ତି । ଜାପାନୀ ଭାଷା ଶିକ୍ଷା ଦେବା ପାଇଁ କୌଣସି ଉପଯୁକ୍ତ ପାଠ୍ୟକ୍ରମ ଏବଂ ବୃତ୍ତିଗତ ମାର୍ଗଦର୍ଶନ ନଥିବା ସତ୍ତ୍ବେ ବିଦ୍ୟାଳୟ ପ୍ରଶାସନ ଇଣ୍ଟରନେଟରେ ଭିଡିଓ ଏବଂ ଅନୁବାଦ ପ୍ରୟୋଗରୁ ତଥ୍ୟ ସଂଗ୍ରହ କରିବାରେ ସଫଳ ହୋଇଥିଲା ।
ବିଦ୍ୟାଳୟର ଏହି ପଦକ୍ଷେପ ବିଷୟରେ ଜାଣିବା ପରେ ଜଗଦେଓ ବିଦ୍ୟାଳୟ ସହ ଯୋଗାଯୋଗ କରି ଅନଲାଇନ୍ କ୍ଲାସ୍ କରିବାକୁ ଇଚ୍ଛା ପ୍ରକାଶ କରିଥିଲେ । ବର୍ତ୍ତମାନ ଔରଙ୍ଗାବାଦର ଭାଷା ବିଶେଷଜ୍ଞ ସୁନୀଲ ଜଗଦେଓ ଛାତ୍ରମାନଙ୍କୁ ଜାପାନୀ ଭାଷା ଶିକ୍ଷା ଦେଉଛନ୍ତି ।
ସମସ୍ତ ଛାତ୍ରଙ୍କ ନିକଟରେ ଅନଲାଇନ୍ କ୍ଲାସ୍ ପାଇଁ ସ୍ମାର୍ଟଫୋନ୍ ନଥିବାରୁ ବିଦ୍ୟାଳୟ ଏକ 'ବିଶ୍ୱ ମିତ୍ର' ପଦକ୍ଷେପ ଆରମ୍ଭ କରିଥିଲା । ଯାହା ଅଧୀନରେ ଯେଉଁ ପିଲାମାନେ ଅନଲାଇନ୍ କ୍ଲାସରେ ଯାହା ଶିକ୍ଷା ପାଉଛନ୍ତି ସେମାନେ ନିଜ ସାଥୀ ଛାତ୍ରମାନଙ୍କୁ ପୁଣି ଶିକ୍ଷା ଦେଉଛନ୍ତି ।
