ନୂଆଦିଲ୍ଲୀ: ଭାରତ ଏବଂ ଚୀନ୍ ମଧ୍ୟରେ ସୀମା ବିବାଦକୁ ନେଇ ସାରା ଦେଶରେ ବିରୋଧ ଜାରି ରହିଛି । ଚାଇନାର ସ୍ମାର୍ଟଫୋନ୍ ଠାରୁ ମୋବାଇଲ୍ ଆପ୍ ପର୍ଯ୍ୟନ୍ତ ସବୁକୁ ବୟକଟ୍ କରିବାକୁ ଦାବି ହେଉଛି । ଏମିତିକି ସୋସିଆଲ ମିଡିଆ ପ୍ଲାଟଫର୍ମରେ 'ଚାଇନିଜ୍ ପ୍ରଡକ୍ଟ ବୟକଟ୍' ଅଭିଯାନ ମଧ୍ୟ ଆରମ୍ଭ ହୋଇଗଲାଣି । ନିକଟରେ ଭାରତୀୟ ସୁରକ୍ଷା ଏଜେନ୍ସି ଟିକଟକ୍ ଏବଂ ହାଲୋ ଭଳି ଚାଇନିଜ ଆପକୁ ରୋକିବା ପାଇଁ ସରକାରଙ୍କୁ ସୁପାରିଶ କରିଥିଲେ ।
ତେବେ ଏପରି ପରିସ୍ଥିତିରେ ଯଦି ଆପଣ ମଧ୍ୟ ନିଜ ଫୋନରୁ ଚାଇନିଜ ଆପକୁ ଡିଲିଟ୍ କରି ତାହା ବଦଳରେ କିଛି ଇଣ୍ଡିଆନ ଆପ୍ ଇନଷ୍ଟଲ କରିବାକୁ ଚାହୁଁଛନ୍ତି ତେବେ ଏହି ଖବରଟି ଆପଣଙ୍କ ପାଇଁ । ଆଜି ଆମେ ଆପଣଙ୍କୁ ଏମିତି କିଛି ମୋବାଇଲ୍ ଆପ୍ ବିଷୟରେ କହିବୁ, ଯାହା ଚାଇନାର ମୋବାଇଲ୍ ଆପ୍ ବଦଳରେ ଆପଣ ବିକଳ୍ପ ଭାବରେ ବ୍ୟବହାର କରିପାରିବେ ।
ଟିକଟକ୍ ବଦଳରେ ବ୍ୟବହାର କରନ୍ତୁ ଏହି ଆପ୍
ଆପଣ ଟିକଟକ୍ ପରିବର୍ତ୍ତେ ରୋପୋସୋ ମୋବାଇଲ୍ ଆପ୍ ବ୍ୟବହାର କରିପାରିବେ । ଏହି ଆପରେ, ଆପଣ ଟିକଟକ୍ ପରି ଭିଡିଓ ପ୍ରସ୍ତୁତ କରିପାରିବେ ଏବଂ ଏହାକୁ ସୋସିଆଲ୍ ମିଡିଆ ପ୍ଲାଟଫର୍ମରେ ସେୟାର ମଧ୍ୟ କରିପାରିବେ ।
ପ୍ରକାଶ ଥାଉ କି, ବର୍ତ୍ତମାନ ସୁଦ୍ଧା 50 ଲକ୍ଷରୁ ଅଧିକ ଉପଭୋକ୍ତା ଗୁଗୁଲ୍ ପ୍ଲେ ଷ୍ଟୋର୍ରୁ ଏହି ଆପ୍ ଡାଉନଲୋଡ୍ କରିସାରିଛନ୍ତି ।
ହେଲୋ ପରିବର୍ତ୍ତେ ସେୟାର ଚାଟ୍ ଆପ୍ ବ୍ୟବହାର କରନ୍ତୁ
ଯଦିଚ ଚାଇନିଜ୍ ଆପ୍ ହାଲୋକୁ ଲୋକମାନେ ବହୁଳ ବ୍ୟବହାର କରିଛନ୍ତି ମାତ୍ର ବର୍ତ୍ତମାନ ଏହାକୁ ମଧ୍ୟ ବୟକଟ୍ କରାଯାଉଛି । ଯଦି ଆପଣ ମଧ୍ୟ ଏହି ଆପକୁ ଡିଲିଟ୍ କରିବାକୁ ଭାବୁଛନ୍ତି ତେବେ ଆପଣ ଏହା ବଦଳରେ ସେୟାର ଚାଟ୍ ଆପ୍ ବ୍ୟବହାର କରିପାରିବେ ।
ସୂଚନାଯୋଗ୍ୟ, ଏହା ଏକ ଭାରତୀୟ ଆପ୍ । ଏହା 15ଟି ଆଞ୍ଚଳିକ ଭାଷାରେ ଉପଲବ୍ଧ ।
ୟୁସି ବ୍ରାଉଜରର ବିକଳ୍ପ ଗୁଗୁଲ୍ କ୍ରୋମ୍
ଯଦି ଆପଣ ଚାଇନିଜ୍ ମୋବାଇଲ୍ ଆପ୍ ୟୁସି ବ୍ରାଉଜରକୁ ଡିଲିଟ୍ କରିଛନ୍ତି, ତେବେ ଆପଣ ଗୁଗୁଲ୍ କ୍ରୋମ୍ ବ୍ୟବହାର କରିପାରିବେ ।
ପବଜି ପରିବର୍ତ୍ତେ ଏହା ବ୍ୟବହାର କରନ୍ତୁ
ଯଦି ଆପଣ ପବଜି ମୋବାଇଲ୍ ଗେମ୍ ପାଇଁ ଏକ ବିକଳ୍ପ ଖୋଜୁଛନ୍ତି, ତେବେ ଆପଣଙ୍କ ପାଇଁ ଆମେରିକୀୟ କମ୍ପାନୀ ଏପିକ୍ ଗେମ୍ସର ଫୋର୍ଟନାଇଟ୍ ଗେମ୍ ଏକ ଉତ୍ତମ ବିକଳ୍ପ ।
