ଲକ୍ଷ୍ନୌ : ପୁଣି ଫେରିଲା ମାରାତ୍ମକ ମୋବାଇଲ ଗେମ 'ମୋମୋ' । ଆଉ ଏହାର ଶିକାର ହୋଇଛନ୍ତି ଝାନସୀର ଜଣେ ନାବାଳକ । ଗେମର ଶେଷ ସୋପାନରେ ପହଞ୍ଚିବାକୁ ଯାଇ ନିଜ ବେକରେ ରଶି ଲଗାଇ ଜୀବନ ହାରିଛନ୍ତି ସେ । କିଛି ଦିନ ହେବେ ସେ ଏହି ଗେମରେ ବ୍ୟସ୍ତ ରହୁଥିବା ଜଣାପଡିଛି ।
ସୂଚନା ଅନୁସାରେ, ରାହୁଲ ପରିହାର ନାମକ ଏହି ନାବାଳକ ତାଳପୁର ପୋଲିସ ଷ୍ଟେସନ୍ ନିକଟସ୍ଥ ଜ୍ବଲା ମହାରାଜ ବଗିଚା ଅଞ୍ଚଳରେ ଜେଜେବାପା ମା' ଙ୍କ ସହ ରହୁଥିଲେ। ରାହୁଲଙ୍କ ପିତା ଆଗ୍ରାରେ ରହୁଥିବା ବେଳେ ମା' ନିଜ ବାପ ଘରେ ରୁହନ୍ତି । ପୋଲିସର ସୂଚନା ଅନୁସାରେ ରାହୁଲ ବ୍ୟବହାର କରୁଥିବା ମୋବାଇଲ ଫୋନରେ ମୋମୋ ଚ୍ୟାଲେଞ୍ଜ ଗେମ ରହିଛି । ଯାହାକୁ ଖେଳି ସେ ଆତ୍ମହତ୍ୟା କରିଥିବା ଜଣାପଡିଛି ।
