ଚେନ୍ନାଇ: ତାମିଲନାଡୁରେ କୋରୋନା ଆକ୍ରାନ୍ତଙ୍କ ସଂଖ୍ୟା ଥମିବାର ନାମ ନେଉନି । ରାଜ୍ୟରେ ଦୈନିକ ଆକ୍ରାନ୍ତଙ୍କ ସଂଖ୍ୟା 2000 ପାର କରିଛି । ଫଳରେ ଦେଶର ଦ୍ବିତୀୟ ରାଜ୍ୟ ଭାବେ ଏଠାରେ ପଜିଟିଭ ସଂଖ୍ୟା 50 ହଜାର ଟପିଛି ।
ଗୁରୁବାର ନୂଆ 2141 ମାମଲା ଚିହ୍ନଟ ହୋଇଥିବା ରାଜ୍ୟ ସ୍ବାସ୍ଥ୍ୟ ବିଭାଗ ସୂଚନା ଦେଇଛି । ପୂର୍ବ ସପ୍ତାହରେ ଏହା 2000 ତଳେ ଥିବା ବେଳେ ଚଳିତ ସପ୍ତାହରେ ଏହା ଉପରେ ଆକ୍ରାନ୍ତ ବାହାରିଛନ୍ତି । ବୁଧବାର ପ୍ରଥମ ଥର ଏହା 2000 ପାର କରିଥିବାବେଳେ ଲଗାତାର ଦ୍ବିତୀୟ ଦିନ ମଧ୍ୟ ଏହା ଜାରି ରହିଛି । ପୂର୍ବରୁ ଏତେ ସଂଖ୍ୟକ ପଜିଟିଭ ଚିହ୍ନଟ ହୋଇନଥିଲେ । ଏହାସହ ଏବେ ସୁଦ୍ଧା ତାମିଲନାଡୁରେ ମୋଟ୍ କୋରୋନା ଆକ୍ରାନ୍ତ 50 ହଜାର ପାର କରି 52 ହଜାର 334 ଛୁଇଁଛି ।
ସେହିପରି ରାଜ୍ୟରେ ମୃତ୍ୟୁ ସଂଖ୍ୟା 625 ପହଞ୍ଚିଛି । ଗତ 24 ଘଣ୍ଟାରେ 49ଟି ମୃତ୍ୟୁ ହୋଇଛି । ଏବେ ଯାଏଁ 27 ହଜାର 624 ଲୋକ ସୁସ୍ଥ ହୋଇସାରିଲେଣି । ପ୍ରକାଶ ଥାଉ କି ବୁଧବାର ପ୍ରଥମ ଥର ପାଇଁ 2000 ଆକ୍ରାନ୍ତ ବାହାରିବା ସହ ତାମିଲନାଡୁରେ କୋରୋନା ପଜିଟିଭ 50 ହଜାର ପାର କରିଥିଲା । ମହାରାଷ୍ଟ୍ର ପରେ ଦେଶର ଦ୍ବିତୀୟ ରାଜ୍ୟ ଭାବେ ଏଠାରେ ଆକ୍ରାନ୍ତଙ୍କ ସଂଖ୍ୟା 50 ହଜାର ପାର କରିଛି ।
