ନୂଆଦିଲ୍ଲୀ: ପଶ୍ଚିମବଙ୍ଗ ଏକ ଏୟାରବେସରୁ DRDO ‘ଅସ୍ତ୍ର’ ମିଶାଇଲର ସଫଳ ପରୀକ୍ଷଣ କରିଛି । ଆକାଶରୁ ଆକାଶକୁ ନିକ୍ଷେପିତ କରାଯାଉଥିବା ଏହି କ୍ଷେପଣାସ୍ତ୍ର ‘ଅସ୍ତ୍ର’ର ଲକ୍ଷ୍ୟଭେଦ କ୍ଷମତା ୭୦ କିମି । ଏହାର ପରୀକ୍ଷଣ ପାଇଁ ସୁଖୋଇ-୩୦ ଏମକେଆଇ ଲଢୁଆ ବିମାନ ବ୍ୟବହାର କରାଯାଇଥିଲା ।
ଅସ୍ତ୍ର ମିଶାଇଲ 'ବିଭିଆର'(ବେୟଣ୍ଡ ଭିଜୁଆଲ ରେଞ୍ଜ) ଏୟାର-ଟୁ-ଏୟାରକୁ ଲକ୍ଷ୍ୟଭେଦ କରି ପାରୁଥିବା ଏକ ଶକ୍ତିଶାଳୀ କ୍ଷେପଣାସ୍ତ୍ର ଅଟେ । ଏହାର ଲକ୍ଷ୍ୟଭେଦ କ୍ଷମତା ୭୦ କିଲୋମିଟର । ଏଥିସହ ଘଣ୍ଟା ପ୍ରତି 5555 କିଲୋମିଟର ବେଗରେ ଏହା ଲକ୍ଷ୍ୟସ୍ଥଳ ଆଡକୁ ଗତି କରିଥାଏ । ଏଥିସହ ଏହା ଏମିତି ଏକ କ୍ଷେପଣାସ୍ତ୍ର ଯାହା ଯେ କୌଣସି ପ୍ରତିକୂଳ ପରିବେଶରେ ବ୍ୟବହାରପଯୋଗୀ ଅଟେ । ଏହି ମିଶାଇଲ ଆକ୍ଟିଭ ରାଡାର ଟର୍ମିନାଲ ଗାଇଡେନ୍ସରେ ସଜ୍ଜିତ ଅଟେ ।
ଏହି ମିଶାଇଲକୁ ଡିଆରଡିଓ ମିରାଜ-୨୦୦୦ ଏଚ, ମିଗ-୨୯, ମିଗ-୨୯କେ, ମିଗ-୨୧ ବାୟସନ, ଏଲସିଏ ତେଜସ ଓ ସୁଖୋଇ ଏସୟୁ-୩୦ ଏମକେଆଇ ବିମାନରେ ଲଗାଇବା ପାଇଁ ବିକଶିତ କରାଯାଇଛି । ଏହା ସମ୍ପୂର୍ଣ୍ଣ ସ୍ବଦେଶୀ କ୍ଷେପଣାସ୍ତ୍ର ଅଟେ ।
ଏହି ମିଶାଇଲର ସଫଳ ପରୀକ୍ଷଣ ପରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଡିଆରଡିଓ ଓ ଭାରତୀୟ ବାୟୁସେନାକୁ ଶୁଭେଚ୍ଛା ଦେଇଛନ୍ତି ।
